"ამას გამიზნულად არასდროს გავაკეთებდი" - დემნა გვასალია Balenciaga-ს სკანდალური კამპანიის გამო ბოდიშს იხდის
Balenciaga-ს შემოქმედებითმა ხელმძღავენლმა დემნა გვასალიამ, ბოლო პერიოდში, მის ირგვლივ განვითარებული სკანდალის თაობაზე პირველი საჯარო განცხადება გააკეთა. საკუთარ ინსტაგრამგვერდზე დიზაინერი "არასწორი შემოქმედებითი გადაწყვეტილების მიღების გამო" ბოდიშს იხდის.
ბრენდს ორი სარეკლამო კამპანიის გამო, რომლებიც 16 და 21 ნოემბერს გამოვიდა, პედოფილიასა და ბავშვთა პორნოგრაფიის გავრცელებაში ადანაშაულებენ.
"მინდა, პირადად მოვიხადო ბოდიში არასწორი შემოქმედებითი გადაწყვეტილების მიღების გამო — საჩუქრების კამპანიის კონცეფციაში ბავშვების მონაწილეობისთვის. ვიღებ პასუხისმგებლობას მომხდარზე. შეუსაბამო იყო ბავშვების მიერ იმ ნივთების პოპულარიზაცია, რომელთაც მათთან არაფერი აკავშირებთ.
რამდენადაც მე ვცდილობ, ჩემი შემოქმედებით, ამა თუ იმ საკითხზე დაფიქრებისკენ მოვუწოდო ადამიანებს. ამას გამიზნულად არასოდეს გავაკეთებდი ისეთი საშინელი ფორმით, რასაც ბავშვზე ძალადობა ჰქვია — ამას ვგმობ. მორჩა.
მე ამისგან უნდა ვისწავლო. უნდა მოვუსმინო და დავუკავშირდე ბავშვთა დაცვის ორგანიზაციებს, რათა გავიგო, როგორ შემიძლია მათ დავეხმარო ამ შემზარავ პრობლემასთან გამკლავებაში.
ბოდიშს ვუხდი ყველას, ვინც თავი შეურაცხყოფილად იგრძნო კამპანიის გამო. Balenciaga უზრუნველყოფს, რომ არა მხოლოდ სათანადო ზომები იქნას მიღებული სამომავლოდ მსგავსი შეცდომის თავიდან ასაცილებლად, არამედ, რითაც შეგვიძლია, ვიზრუნოთ ბავშვთა კეთილდღეობის დაცვაზე". - წერს გვასალია.
ასევე იხილეთ: