განსაკუთრებულ დავალებათა დეპარტამენტის თანამშრომელმა მასთან ურთიერთობაში მყოფი ქალის მეუღლეს "მესენჯერში" მიწერა, რომ ცოლი ღალატობდა - საგამოძიებო სამსახური
განსაკუთრებულ დავალებათა დეპარტამენტის თანამშრომელმა მასთან ურთიერთობაში მყოფი ქალის მეუღლეს "მესენჯერში" მიწერა, რომ ცოლი ღალატობდა.
ინფორმაციას სპეციალური საგამოძიებო სამსახური ავრცელებს.
- მათი ინფორმაციით, შსს-ს თანამშრომელმა ქალის მეუღლეს ინტიმური შინაარსის ფოტოსურათი გაუგზავნა, სადაც ცოლი ნახევრად შიშველ მდგომარეობაში იყო.
"დანაშაულში მხილებულია შინაგან საქმეთა სამინისტროს, განსაკუთრებულ დავალებათა დეპარტამენტის ინსპექტორი გ.ლ., რომელმაც მასთან ურთიერთობაში მყოფ ქალბატონს პირადი ცხოვრების საიდუმლო გაუვრცელა. კერძოდ, 2022 წლის მარტის თვეში, მეგობარ ქალთან ურთიერთობის გაწყვეტით გაბრაზებულმა გ.ლ-მ, შურისძიების მიზნით მასთან ურთიერთობაში მყოფი ქალის მეუღლეს, სოც. ქსელის "მესენჯერის" საშუალებით ქალის ნახევრად შიშველი, ინტიმური შინაარსის ფოტოსურათი გაუგზავნა და მიწერა, რომ ცოლი ღალატობდა. აღნიშნული ქმედების შედეგად, დაზარალებულს მორალური სახის ზიანი მიადგა.
დაზარალებული ქალის მიერ სპეციალური საგამოძიებო სამსახურისთვის მომართვიდან მალევე, გატარებული ოპერატიული და საგამოძიებო მოქმედებების შედეგად, განსაკუთრებულ დავალებათა დეპარტამენტის ინსპექტორი დაკავებულ იქნა საქართველოს სისხლის სამართლის კოდექსის 157-ე პრიმა მუხლით" - ნათქვამია ინფორმაციაში.
ცნობისთვის, სპეციალურმა საგამოძიებო სამსახურმა, მიმდინარე წლის ოქტომბერსა და ნოემბერში ჩატარებული საგამოძიებო და საპროცესო მოქმედებების შედეგად, არასათანადო მოპყრობის და ძალადობის ფაქტები გამოავლინა, რის შემდეგაც 4 სამართალდამცავის მიმართ სისხლისსამართლებრივი დევნა დაიწყო.