მიზეზები, რომლებიც დაგარწმუნებთ, რომ დროა, პროდუქტების შეძენა ონლაინ დაიწყოთ

ელექტრონული კომერცია ერთ-ერთი ყველაზე სწრაფად მზარდი სექტორია, რომელიც პროგნოზების თანახმად 2023 წელს მსოფლიოს მასშტაბით საცალო გაყიდვებში 22%-იან წილს დაიკავებს, მაშინ, როცა 2019 წელს 14,1% იყო.

აღნიშნული პროგნოზი ნიშნავს იმას, რომ ელექტრონული კომერცია ჩვენი ცხოვრების ნაწილად იქცა. კრიტიკულ მომენტებში, როცა ბავშვს ვერავის ვუტოვებთ და ვერც მაღაზიაში გავდივართ, როცა უამინდობა გვიშლის ხელს, ანდაც სტუმრებს ველოდებით და ვერაფრის მომზადებას ვასწრებთ, ასევე მაშინ, როცა ჩვენთვის სასურველი ნივთი ოკეანის გადაღმაა, ონლაინ შოპინგს მივმართავთ. სწორედ ცხოვრების გამარტივების შესაძლებლობამ გახადა იგი შექმნის დღიდან პოპულარული, პანდემიის დროს კი, როცა სხვა ალტერნატივა არ გვქონდა - აუცილებელიც.

და მაინც, რატომ ღირს ონლაინ შოპინგი კიდევ უფრო მეტად დავნერგოთ ჩვენს ყოველდღიურობაში?

სიმარტივე და კომფორტი

ონლაინ შოპინგის უპირატესობებზე საუბრისას პირველი რაც გვახსენდება, სწორედ ეს ორი მთავარი მახასიათებელია: სიმარტივე და კომფორტი. სახლიდან გაუსვლელად, რბილ სავარძელში, ტელევიზორის წინ მოკალათებულებს შეგვიძლია ერთი აპლიკაციით შევუკვეთოთ ყველაფერი, რაც გვჭირდება, შეძენილ პროდუქტს კი ადგილზე მოგვართმევენ. რა უნდა იყოს ამაზე მარტივი?

თუ აქამდე იმავე შენაძენის გასაკეთებლად ჩაცმა, გარეთ გასვლა, შემდეგ მაღაზიაში პროდუქტების არჩევა, ბოლოს კი პროდუქტებით დატვირთულს სახლში უკან დაბრუნება გვიწევდა, დღეს ეს 2-საათიანი პროცესი 10 წუთში ეტევა. სანამ შეკვეთას ველოდებით, შეგვიძლია სხვა უფრო საინტერესო და ნაყოფიერი საქმით დავკავდეთ.

აღნიშნული სერვისი განსაკუთრებით კომფორტულია მათთვის, ვისაც მცირეწლოვანი ბავშვები ჰყავს და პროდუქტების შესაძენად სახლიდან ხშირად გასვლას ვერ ახერხებს.

დროის დაზოგვის შესაძლებლობა

გადატვირთული ცხოვრების რეჟიმის მქონე ადამიანებისთვის მნიშვნელოვანია თავისუფალი დრო საყვარელ ადამიანებთან ერთად გაატარონ, დაკავდნენ საინტერესო აქტივობებით, ისეირნონ ბუნებაში ან სულაც გამოიძინონ.

როცა სამუშაო საათების დასრულების შემდეგ დამატებითი დრო სუპერმარკეტში პროდუქტების შესაძენად უნდა გაატარო, უფრო გეზღუდება საყვარელი საქმისთვის ან დასვენებისთვის გამოყოფილი მნიშვნელოვანი საათები. გამოძახების სერვისის და ზოგადად, ონლაინ შოპინგის ერთ-ერთი უმთავრესი უპირატესობა სწორედ დროის დაზოგვის შესაძლებლობაა, ამიტომაც იზრდება მასზე მოთხოვნა.

ონლაინ შეთავაზებები

ახალი მომხმარებლების შესაძენად და ძველის შესანარჩუნებლად კომპანიები მომხმარებელს სხვადასხვა ონლაინ აქციას სთავაზობენ.

როცა შესაძლებლობა გაქვს, მაგალითად, სასურსათო მარკეტის ფასდაკლებით აპლიკაციაშიც ისარგებლო, ადგილზე მისვლაში დრო რატომ უნდა დაკარგო? ონლაინ შოპინგზე გაზრდილი მოთხოვნისა და მაღალი კონკურენციის გამო საქართველოში კომპანიები ონლაინ შოპინგის უფრო და უფრო გაუმჯობესებულ სერვისს გვთავაზობენ. მათ შორის არის „2 ნაბიჯის“ აპლიკაცია (ანდროიდისთვის და IOS-სთვის), რომელშიც მომხმარებელს ხვდება ადგილზე არსებული ყველა ფასდაკლება.

პროდუქციის შესახებ დეტალური ინფორმაციის მიღების შესაძლებლობა

ნებისმიერი პროდუქტის შეძენისას, იქნება ეს საკვები, საკანცელარიო ნივთები თუ ტანსაცმელი, დროის შეზღუდული რესურსის გამო ნაკლებად ვაკვირდებით მის შემადგენლობას, წარმოშობას და ა. შ.

აღნიშნული საკითხი სხვაგვარად დგას ონლაინ შოპინგის შემთხვევაში: უფრო სწრაფად და მარტივად იღებ ინფორმაციას, მაგალითად, იოგურტის შემცველობის შესახებ, ვიდრე მაღაზიაში, სადაც ცდილობ რიგში დროულად ჩადგომა მოასწრო. აპლიკაციაში უფრო თვალსაჩინოდ არის წარმოდგენილი მისი შემადგენლობა, სწრაფად შეგიძლია მისი წაკითხვა და შესაბამისი გადაწყვეტილების მიღება. ასევე, უკეთ ხედავ ვადებსაც და შენახვის პირობების შესახებ მითითებულ ინფორმაციასაც, რასაც შეიძლება მაღაზიაში ნაკლები ყურადღება დაუთმო.

ფასების მარტივად შედარების შესაძლებლობა

როცა პროდუქტების შესაძენად ერთ მაღაზიაში შედიხარ, დროის შეზღუდული რესურსის გამო, სხვა შეთავაზებებზე აღარ იწყებ ფიქრს და ხანდახან მეტსაც იხდი იმაში, რისი შეძენაც უფრო ხელმისაწვდომ ფასად შეგეძლო.

ელექტრონული კომერცია მეშვეობით შეგიძლია რამდენიმე მომწოდებლის ფასები ერთმანეთს შეადარო და საუკეთესო ფასად შეიძინო სასურველი პროდუქტი. ეს მნიშვნელოვანი უპირატესობა როგორც დროის, ისე ფინანსური რესურსის დაზოგვის საშუალებას გვაძლევს.

NS