"ოპერაციაზე იყო, როგორც ქირურგის ასისტენტი, თუმცა მისი მსვლელობისას არ გარდაცვლილა... გამთენიისას ინფარქტით დაიღუპა" - რა ამბობენ ზესტაფონის კლინიკაში, გარდაცვლილ ექიმზე?
სოციალურ ქსელში გავრცელებული ინფორმაციით, ზესტაფონში, ექიმი როსტომ შველიძე პროფესიული მოვალეობის შესრულების დროს გარდაიცვალა.
"ეს არის კაცი, რომელიც 8 საათი იდგა ოპერაციაზე, ოპერაციის მიმდინარეობისას თავად გახდა ცუდად, მაგრამ ვერ შეწყვიტა ბრძოლა ახალგაზრდა სიცოცხლის გადასარჩენად. ბატონი როსტომ შველიძე პროფესიული მოვალეობის შესრულებისას გარდაიცვალა. გვერდის ადმინისტრაცია ღრმა მწუხარებას გამოთქვამს უსამძიმრებს ოჯახის წევრებს, კოლეგებსა და სრულიად ქართულ სამედიცინო საზოგადოებას. ყოველთვის გვემახსოვრება, რომ შენ აირჩიე ფიცის ერთგულება, სიცოცხლის ფასად #გმირო“, - ვკითხულობთ Facebook გვერდის "ყველაფერი მედიცინაზე“ მიერ გავრცელებულ ინფორმაციაში.
ინფორმაცია კლინიკაში გადავამოწმეთ და აღმოჩნდა, რომ ბატონი როსტომი, ოპერაციის დროს არ გარდაცვლილა. ზესტაფონის კლინიკა "ჯეო ჰოსპიტალის“ დირექტორი, ქირურგი ირაკლი ლაღიძე ჩვენთან საუბარში ამბობს, რომ აღნიშნული ოპერაცია სამ საათს გაგრძელდა და როსტომ შველიძე ოპერაციაზე ქირურგის ასისტენტი იყო.
ირაკლი ლაღიძე:
"ბატონო როსტომი ოპერაციის დროს არ გარდაცვლილა. ინფორმაცია სოციალურ ქსელში სხვადასხვა ინტერპრეტაციით გავრცელდა. იმ დღეს მორიგე იყო. ოპერაცია, რომელსაც ესწრებოდა, სამ საათს გაგრძელდა და ღამის 11 საათზე დასრულდა. პაციენტი სიცოცხლისთვის შეუთავსებელი დაზიანებებით იყო შემოყვანილი და სამწუხაროდ, გარდაიცვალა. როსტომ შველიძე ცუდად გამთენიისას, შვიდის ნახევარზე გახდა, კარდიოგენური შოკი განვითარდა, ინფარქტი იყო, ვერაფერი მოვასწარით..."
ცნობისთვის, პაციენტი, რომელიც იმ დღეს ოპერაციის დროს გარდაიცვალა, ზესტაფონში სისხლიან გარჩევას ემსხვერპლა. არსებული ინფორმაციით, გუშინ ზესტაფონის მუნიციპალიტეტში სოფელ წიფლავაკეში 23 წლის ბიჭი თანასოფლელმა სანადირო თოფით სასიკვდილოდ დაჭრა. ჭრილობები სიცოცხლესთან შეუთავსებელი აღმოჩნდა და ის კლინიკაში გარდაიცვალა.
იხიელთ ასევე: