"რა არის საზეიმო იმაში, რომ ერთ მოძალადე კაცს ხახვივით შერჩა ყველაფერი" - რას წერს მებო ნუცუბიძე ბასილაშვილზე?
მომღერალი მებო ნუცუბიძე ნიკოლოზ ბასილაშვილის მიმართ გამოტანილ განაჩეზე წერს. მისი თქმით, სასიხარულო არაფერია იმაში, რომ მოძალადე კაცს ყველაფერი შერჩა.
"რამდენიმე რამ მაოცებს და ხმამაღლა ვიკითხავ:
- რა არის საზეიმო იმაში, რომ ერთ მოძალადე კაცს ხახვივით შერჩა ყველაფერი, რაც უთქვამს და რაც გაუკეთებია საკუთარი ცოლისთვის?
- თუ წაიკითხეთ ან მოისმინეთ, როგორ ესაუბრებოდა ან როგორ ექცეოდა ის საკუთარ ცოლს, ამის მერე, რატომ ან როგორ მიგაჩნიათ ისევ კაი ტიპად?
- თუ არ წაგიკითხავთ და არც არაფერი მოგისმენით ამ საქმის შესახებ, მაშინ, ასე ზერელად რანაირად შეგიძლიათ ლამაზი თვალებისა და ცნობილი სახელის გამო გაამართლოთ და მისი "გამარჯვება" იზეიმოთ?- ყოველთვის ქალებს რატომ ამტყუნებთ?
- ამდენი ზიზღი საიდან გაქვთ?
- თქვენი ოჯახის წევრს, თქვენს მეგობარს ან უბრალოდ - თქვენთვის ძვირფას ადამიანს რომ მოქცეოდა ვინმე ასე, მაინც დაიწყებდით სასამართლოს უზენაესობაზე საუბარს?
- რას იტყოდით იმ ადამიანზე, ვინც ასე ექცევა ან/და ესაუბრება ოჯახის წევრს, თუკი ის ცნობილი და შედარებით წარმატებული არ იქნებოდა?- ჩოგბურთს თუ უყურებთ, რატომ გგონიათ, რომ კარგი ჩოგბურთელია?
- და თუ არ უყურებთ, მაშინ რატომ ითავსებთ საჩოგბურთო ექსპერტების როლს?- მხოლოდ ქალების მიმართ განხორციელებული ძალადობის საქმეებზე მოძალადის გამამართლებელი განაჩენის მიღების შემთხვევაში ენდობით ასე ბრმად სასამართლო სისტემას თუ ზოგადადაც ასეთი მიამიტები ხართ?" - წერს ნუცუბიძე.
ცნობისთვის, ფიზიკურ და ფსიქოლოგიურ ძალადობაში ბრალდებული ჩოგბურთელი ნიკოლოზ ბასილაშვილი სასამართლომ უდანაშაულოდ ცნო. განაჩენის გამოცხადებას მხოლოდ ბრალდებული ნიკოლოზ ბასილაშვილი ესწრებოდა, სასამართლოზე არ გამოცხადებულა ნელი დოროყაშვილი.
ნიკოლოზ ბასილაშვილის წინააღმდეგ წარმოებულ საქმეზე 2 წლის განმავლობაში სასამართლოში არაერთი მტკიცებულება გამოიკვლიეს, მათ შორის, დაკითხნენ როგორც დაცვის მხარის, ასევე ბრალდების მხარის მოწმეები.
პროკურატურა აცხადებდა, რომ საქმეში ნიკოლოზ ბასილაშვილის მიმართ წარდგენილი ბრალდების დამადასტურებელი არაერთი მტკიცებულება ჰქონდათ წარდგენილი. ასევე, ბრალდების მხარე განმარტავდა, რომ დაზარალებულ ნელი დოროყაშვილის მიერ სასამართლოში მიცემული რამდენიმე საათიანი ჩვენება ზუსტად თანხვედრაში იყო საქმეში არსებულ მტკიცებულებებთან.
საპირისპიროს აცხადებდა დაცვის მხარე. ადვოკატების თქმით, ნიკოლოზ ბასილაშვილის მხრიდან არც ფიზიკურ და არც ფსიქოლოგიურ ძალადობას არ ჰქონია ადგილი. უფლებადამცველების განცხადებით, ნელი დოროყაშვილმა სასამართლოში ცრუ ჩვენება მისცა.