"კრემლში გადაწყვიტეს, რომ სიკვდილზე გაეგზავნეთ... მოგიწევთ იცხოვროთ მათ გვერდით, ვინც ახლა გარბის საქართველოში, მონღოლეთში" - რეზნიკოვი რუს ოფიცებს
უკრაინის თავდაცვის მინისტრი, ოლექსი რეზნიკოვი რუს სამხედროებს მოუწოდებს, არ დაკარგონ დრო და გადაარჩინოს რუსეთი ტრაგედიისგან, ხოლო რუსული არმია დამცირებისგან. ვიდეომიმართვაში, რომელიც რეზნიკოვმა გაავრცელა, მინისტრი რუს სამხედროებს არწმუნებს, რომ რუსეთის ფედერაციის ხელმძღვანელობამ მოატყუა, უღალატა მათ და სიკვდილისთვის გაწირა, ვლადიმერ პუტინის მოჩვენებითი მიზნების გამო. რეზნიკოვის განცხადებით, უკრაინელები თავს იცავენ, რუსები კი თანამებრძოლებს კრძალავენ.
"თქვენი მედესანტეები ახლა დნეპრის მარჯვენა სანაპიროზე იხოცებიან. ვიღაცამ კრემლში გადაწყვიტა, რომ ისინი სიკვდილზე გაეგზავნა. ხაფანგში გაგიშვეს. თქვენ სისხლით იხდით ვიღაცის ფანტაზიებისა და ცრუ მიზნების გამო. ახლა ისინი არ გისმენენ, რადგან ახლა თქვენი მოსმენა ნიშნავს შეცდომების აღიარებას. მოსკოვს კი სიმართლე არ მოსწონს. მათთვის უფრო ადვილია იმის თქმა, თუ როგორ დაიღუპეთ გმირულად ნატო-ს გამოგონილ ლაშქართან ბრძოლაში“, - აცხადებს რეზნიკოვი.
მისი თქმით, რუსეთის პრეზიდენტი, ვლადიმერ პუტინი ბუნკერში იმალება და დარტყმას საკუთარ თავზე არ იღებს.
"ბევრმა თქვენგანმა უკვე გაიგო, რომ სამართლიანი საქმისთვის თავის გასაწირად არ გამოუგზავნიხართ. იქნებ ამიტომაა, რომ თქვენი პრეზიდენტი ბუნკერში იმალება და დარტყმას თავის თავზე არ იღებს? მას ეშინია თქვენი გამჭრიახობის, თქვენი ზიზღისა და სამართლიანი რისხვის“, - აცხადებს რეზნიკოვი.
მისი თქმით, რუსეთის სარდლობას უკვე ესმის, რომ "ომის ხაფანგში“ გაება და ყველაფერს გააკეთებს იმისათვის, რომ თავიანთი არასწორი გათვლები, ქვეშევრდომებს მიაწეროს.
"ომის შემდეგ თქვენ შეხედავთ თქვენი ჯარისკაცების ქვრივებსა და ობლებს თვალებში, რადგან მათთან კრემლიდან არავინ გამოვა. თქვენ მოგიწევთ იცხოვროთ მათ გვერდით, ვინც ახლა მობილიზაციას გაურბის ფინეთში, საქართველოში, ყაზახეთსა და მონღოლეთშიც კი და ისინი დარწმუნებულები იქნებიან, რომ სწორად მოიქცნენ“, - აღნიშნა მინისტრმა.
მან ხაზი გაუსვა, რომ უკრაინელებს არ სჭირდებათ რუსული მიწა და საკმარისი საკუთარი ტერიტორია აქვთ.
"ჩვენ სიცოცხლეს, უსაფრთხოებას და სამართლიანობის გარანტიას ვაძლევთ ყველას, ვინც დაუყოვნებლივ უარს იტყვის ბრძოლაზე. თქვენ ჯერ კიდევ შეგიძლიათ იხსნათ რუსეთი ტრაგედიისგან, ხოლო რუსული არმია დამცირებისგან. მაგრამ დრო მიდის. ნუ დაკარგავთ მას“, - აცხადებს რეზნიკოვი.
ნახეთ ასევე: