"თავდაცვის მინისტრმა იზრუნა ცოტნეს ჯანმრთელობისთვის და უმნიშვნელოვანესი საჩუქარი გაგვიკეთა..." - რას წერს კონსტანტინე გამსახურდია?
ცოტნე გამსახურდია, რომელიც 2019 წლის 19 დეკემბერს საკუთარ საცხოვრებელ სახლთან დაჭრეს, ამჟამად სარეაბილიტაციო კურსს საქართველოში, წეროვანი სარეაბილიტაციო ცენტრში გადის. საქართველოს პირველი პრეზიდენტის შვილის ჯანმრთელობის შესახებ დროდადრო ინფორმაციას მისი მეუღლე და ძმა ავრცელებენ.
ამჟამად კონსტანტინე გამსახურდია სოციალურ ქსელში მორიგ პოსტს აქვეყნებს და თავდაცვის მინისტრს მადლობას უხდის. როგორც ირკვევა, ჯუანშერ ბურჭულაძემ ცოტნეს მსოფლიოში არსებული საუკეთესო ელექტრო ეტლი აჩუქა.
"ცოტნეს რეაბილიტაციისთვის გადადგმული თითოეულ ნაბიჯი ნამდვილი ზეიმია მთელი ოჯახისთვის. ამჯერად, ჩვენი ოჯახის სახელით, უდიდესი მადლიერება მინდა გამოვხატო თავდაცვის მინისტრის, ბატონ ჯუანშერ ბურჭულაძის მიმართ, რომელმაც იზრუნა ცოტნეს ჯანმრთელობისა და რეაბილიტაციისთვის და უმნიშვნელოვანესი საჩუქარი გაგვიკეთა - უზრუნველყო ცოტნე დღესდღეობით მსოფლიოში არსებული საუკეთესო ელექტრო ეტლი-ტრანსფორმერით, რომელიც რეაბილიტაციისთვის მნიშვნელოვან ძალიან ბევრ საჭირო ფუნქციას ითავსებს.
ეს მრავალფუნქციური ეტლი მხოლოდ გერმანიაში მზადდება. უღრმესი მადლობა ბატონო ჯუანშერს, ასევე თავდაცვის სამინისტროს და ჩვენი დიპლომატიური უწყების ყველა წარმომადგენელს, რომლებიც ჩართულები იყვნენ ამ ეტლის შეძენასა და საქართველოში გადმოგზავნაში" - წერს კონსტანტინე გამსახურდია.