"უკრაინას მხარდაჭერას გავუწევთ იქამდე, ვიდრე რუსეთი არ დაასრულებს საზარელ ომს" - ბორის ჯონსონი
დიდი ბრიტანეთის პრემიერ-მინისტრის ბორის ჯონსონის განცხადებით, მისი ქვეყანა არასდროს აღიარებს რუსეთის მიერ ყირიმის ან უკრაინის რომელიმე სხვა ტერიტორიის ანექსიას.
მან აღნიშნული განცხადება "ყირიმის პლატფორმის“ მეორე სამიტზე, ვირტუალურად გამოსვლისას, განაცხადა.
როგორც ჯონსონმა აღნიშნა, დიდი ბრიტანეთი ოფიციალურ კიევს სამხედრო, ჰუმანიტარულ, ეკონომიკურ და დიპლომატიურ მხარდაჭერას გაუწევს მანამ, სანამ "რუსეთი არ დაასრულებს ამ საზარელ ომს და არ გაიყვანს საკუთარ ძალებს მთელი უკრაინიდან“.
"პუტინი გეგმავს მთელ უკრაინას გაუკეთოს ის, რაც მან ყირიმს გაუკეთა. ის ამზადებს მეტ ანექსიას და უფრო მეტ ყალბ რეფერენდუმს“, - განაცხადა ჯონსონმა.
ჯონსონმა რუსეთის პრეზიდენტი ვლადიმერ პუტინი დაადანაშაულა იმ ფაქტის იგნორირებაში, რომ რუსეთმა არაერთგზის აღიარა ყირიმი უკრაინის ნაწილად.
ბრიტანეთის პრემიერმა კრემლის ლიდერი მრავალი საერთაშორისო შეთანხმების დარღვევაშიც დაადანაშაულა.