"მათ ორი გზა აქვთ, ან ლეგალურად შეიძინონ ფილმები და სერიალები, ან გააუქმონ ვებგვერდები" - რატომ გაითიშა საიტები: adjaranet.com, iMovies.cc?

"საიტი რეკონსტრუქციის პროცესშია“ - ეს წარწერები, წუხელ გვიან ღამით, საიტებზე adjaranet და imovies გაჩნდა. ვებგვერდები, რომლითაც ყოველდღიურად უამრავი ადამიანი სარგებლობდა, გათიშულია, ფილმების ყურება კი - შეუძლებელია.

ჯერ კიდევ რამდენიმე თვის წინ Facebook-მა და instagram-მა ჰოლივუდის კინოსტუდიების - "დისნეი", "პარამაუნტი", "ვორნერი", "უნივერსალი", "სონი, "ნეტფლიქსი" - გაერთიანება MPA (Motion Picture Association)-ის მიმართვის საფუძველზე ქართულ პირატულ საიტებს (adjaranet.com, iMovies.cc, croconet.com, qartulad.com srulad.com geosaitebi.ge, hoovies.net, movies.ge), რომლებიც წლების განმავლობაში უკანონოდ, ინტელექტუალური საკუთრების სრული უგულებელყოფით ავრცელებდნენ და არეკლამებდნენ მოპარულ ფილმებს და სერიალებს, "ფეისბუქ" და "ინსტაგრამ" პლატფორმებზე გვერდები წაუშალა.

მაშინ საქართველოს ანტიმეკობრეული ცენტრის აღმასრულებელი დირექტორი ზურაბ ბეჟაშვილი აცხადებდა, რომ ინტელექტუალური საკუთრების დაცვის პროცესი კიდევ უფრო მასშტაბურ ფორმას მიიღებდა. მოსალოდნელი იყო, რომ google-ის საძიებო სისტემა და google-ის სხვა ინფრასტრუქტურა, პირატულ საიტებს შეზღუდავდა.

ნორმატიული აქტი, რომელიც პირატული პროდუქციის გავრცელებას კრძალავს, მარეგურილებელმა კომისიამ მიიღო და გუშინ შევიდა ძალაში. საიტების წარმომაგდენელი ამ ეტაპზე კომენტარს არ აკეთებს... საქართველოს საავტორო უფლებათა ასოციაციის თავმჯდომარე გიგა კობალაძე ambebi.ge-სთან საუბარში ამბობს, რომ საიტებს ორი გზა აქვთ, ან ლეგალურად შეიძინონ ფილმები და სერიალები, რომელსაც საიტებზე ათავსებენ, ან გააუქმონ ვებგვერდები.

- ამ საიტებზე ფილმები უკანონოდ იყო განთავსებული, არ ჰქონდათ ამის უფლება ამ საიტების მეპატრონეებს, ეს მეკობრული პროდუქცია იყო. შესაბამისად, მარეგულირებელმა მოითხოვა ლეგალურობის დამადასტურებელი მტკიცებულებები და რომ ვერ წარუდგინეს, ამის შემდეგ, მას ჰქონდა კანონით მინიჭებული უფლებამოსილება, რომ დომენები გაეთიშა.

- ამ ეტაპზე საიტებს აწერია, მიმდინარეობს საიტის რეკონსტრუქცია...

- ეს უკვე მათი ნებაა, რაც უნდა ის დააწერონ, მაგრამ ამ შემთხვევაში მათ აქვთ ორი გზა, ერთი რომ გადავიდნენ ლეგალურ საწყისებზე, ის კონტენტი რაც აქვთ, შეიძინონ მათზე უფლებები და ლეგალურად დაიწყონ ინტერნეტმაუწყებლობა და მეორე, საერთოდ დახურონ საკუთარი ვებგვერდები. მე, როგორც ვიცი, ეს გამოიწვია იმან, რომ საქართველოში ალტერნატივა უკვე გაჩნდა, აქამდე ალტერნატივა არ არსებობდა.

- cavea+-ს გულისხმობთ?

- დიახ, აქამდე ჩემი ინფორმაციით, ერთ-ერთი მიზეზი, რატომაც აქამდე მარეგულირებელი თავს იკავებდა დომენის გათიშვისგან, იყო ის, რომ არ არსებობდა ალტერნატივა. ახლა უკვე არის არამარტო უცხოური ალტერნატივა, არამედ ქართულიც, რამაც გაუმარტივა მარეგულირებელს ამ გადაწყვეტილების მიღება. მოვიდა დრო, რომ გადავიდეთ ცივილიზებულ ურთიერთობებზე და იმ ხალხსაც საკუთარი შრომისთვის საზღაური გადავუხადოთ.