"იმედის სხივი კრიზისებით ჩაბნელებულ მსოფლიოში" - ანტონიო გუტერეში უკრაინიდან მარცვლეულის ექსპორტის მოლაპარაკებებზე
ჩვენ ვნახეთ მნიშვნელოვანი წინგადადგმული ნაბიჯი უკრაინული საკვები პროდუქტების შავი ზღვის გავლით ექსპორტის უზრუნველსაყოფად, - ამის შესახებ გაერო-ს გენერალური მდივანი, ანტონიო გუტერეში აცხადებს, რომელიც რუსეთს, უკრაინას, თურქეთსა და გაეროს ოფიციალურ პირებს შორის მარცვლეულის ექსპორტის საკითხზე თურქეთში გამართულ მოლაპარაკებებს ეხმაურება.
"იმედის სხივი კრიზისებით ჩაბნელებულ მსოფლიოში. სტამბულში ჩვენ ვნახეთ დიდი წინგადადგმული ნაბიჯი შავი ზღვის გავლით უკრაინული სასურსათო პროდუქტის ექსპორტის უზრუნველსაყოფად. მივესალმები ყველას ერთგულებას, ვინც მუშაობს ჩვენი საერთო კაცობრიობისთვის შეთანხმების მიღწევაზე“, - წერს გუტერეში “ტვიტერზე“.
გუშინ, თურქეთის თავდაცვის მინისტრმა, ჰულუსი აკარმა განაცხადა, რომ რუსეთს, უკრაინას, თურქეთსა და გაეროს ოფიციალურ პირებს შორის სტამბოლში გამართული მოლაპარაკებების შედეგად, მარცვლეულის ექსპორტზე შეთანხმების მიღწევა მოხერხდა. საუბარია მილიონობით ტონა უკრაინულ მარცვლეულზე, რომელიც რუსეთის საზღვაო ბლოკადის ფონზე, შავი ზღვის პორტებშია ჩარჩენილი.