"რა რუდუნებითაც დაგმეთ სტუდენტები, იმავე რუდუნებით მხარდაჭერა რომ გამოგეცხადებინათ, აქამდე არ მივიდოდა საქმე" - როგორ ეხმაურებიან სტუდენტების პროტესტს: განსხვავებული შეფასებები
გუშინ ხმაური იყო თბილისის სახელმწიფო უნივერსიტეტში, სადაც სტუდენტები რექტორის კაბინეტში შეიჭრნენ. ისინი აცხადებდნენ, რომ ვიდრე მათი მოთხოვნები არ დაკმაყოფილდებოდა, კაბინეტს არ დატოვებდნენ.
როგორც ირკვევა, ისინი წარმოადგენენ ორგანიზაციას "ბრძოლა განათლებისთვის" და მოითხოვენ რექტორის გადაყენებას, რადგან, მათივე განცხადებით, უნივერსიტეტმა არ გაითვალისწინა სტუდენტების მოთხოვნა სემესტრის ბოლომდე სწავლის ჰიბრიდული რეჟიმი შენარჩუნებულიყო.
მათი თქმით, რექტორი გიორგი შერვაშიძე მათ უარს ეუბნება უნივერსიტეტში მიმდინარე სემესტრის ბოლომდე სწავლების ჰიბრიდული რეჟიმის შემოღებაზე, რის გამოც, რეგიონებში მცხოვრებ სტუდენტებს თბილისში ბინების დაქირავებისა და აუდიტორიებში ლექციებზე დასწრების პრობლემა ექმნებათ.
საკმაოდ მძიმე საყურებელია ის ვიდეოები, რაც გავრცელდა. სტუდენტები არ ერიდებიან უნივერსიტეტის თანამშრომლების სიტყვიერ და ფიზიკურ შეურაცხყოფას.
მომხდარს განსხვავებული გამოხმაურება მოჰყვა საზოგადოებაში. ნაწილი სტუდენტებს მწვავედ აკრიტიკებს და ამბობენ, რომ ძალადობა დაუშვებელია. ზოგიერთი კი მიიჩნევს, რომ სტუდენტებს უნივერსიტეტის ადმინისტრაციამ არ მოუსმინა, რამაც შესაბამისი შედეგი გამოიღო:
ოთო აბესაძე:
ის რაც თსუ - ში ხდება, არის ძალიან ცუდი. არანაირი გამართლება არ აქვს ძალადობას. დადგა საჭიროება ჰიბრიდული სწავლების? ყველაფერს ვაკეთებთ პროფესორები ამისთვის ხელებით, ფეხებით, 2 ლეპტოპით მიმყავს ლექცია/სემინარები, რომ ამომწურავად მიიღოს ყველამ ცოდნა ვინმე დაინტერესებულა, როგორი რთულია პროფესორისთვის სრულყოფილად გადასცეს ცოდნა სტუდენტებს, თან აუდიტორიაში და თან ორ ლეპტოპში ისე, რომ თანაბრად მიიღოს ყველამ ხარისხიანი ინფორმაცია?
ვინმეს გიფიქრიათ იმაზე, რომ თან აუდიტორიაში უნდა ახსნა დაფაზე, პარალელურად zoom - ით აკეთო ექსელში ამოცანები და თან აუხსნა ორივე განზომილებას ხარისხიანად (online/offline) ვერ ახერხებენ სტუდენტები ჩამოსვლას გამოცდებისთვის თბილისში? კი ბატონო, ყველა დიდ ქალაქში მოეწყო საგამოცდო ცენტრი. ეხლაც აი ამ წამსაც ელექტრონულ გამოცდებს ვაკეთებდი. აი ეს ვაგხანალია, რაც მოხდა თსუ-ში, არის თითოეულ პროფესორზე “სილის გაწვნა”. პროტესტი არის სხვა რამ და ძალადობა არის მარაზმი. არ იმსახურებს თსუ ამას და არ ვიმსახურებთ ჩვენ, პროფესორები ამას. დღეს დეკანსა და დაცვის თანამშრომლებთან ერთად მეც მომხვდა თქვენს მიერ მოქნეული ხელი. მომხვდა იმიტომ, რომ ყველაფერს ვაკეთებ ჩემი სტუდენტების კომფორტისთვის და სანაცვლოდ, თსუს-თან ერთად ეს დარტყმა მივიღე მეც.
პეტრე კოლხი:
ძალიან დასანანია, რაც უნივერსიტეტში ხდება.ძალიან არ უხდება მის კედლებს და იმ გარემოს, სადაც პროფესიასთან ერთად, თაობები ურთიერთობებს, მიდგომებს, ადამიანობას სწავლობდა.დაიკარგა პატივისცემა და თავაზიანობა ერთმანეთის მიმართ…მახსოვს, ლექტორი რომ ჩაივლიდა დერეფანში, კედელთან ავიტუზებოდით, ნაბიჯებით მთელი ამბავი მოჰქონდა…ეს არ იყო შიში, არც კომპლექსი, მოწიწება და კრძალვა იყო…არ მიყვარს, ახალგაზრდებს ყველაფერს რომ უწუნებენ… საოცრად გონიერი, აზრიანი, ნიჭიერი თაობა მოდის… უფროსი თაობა კი მეტ პატივისცემას და გაფრთხილებას იმსახურებს…ერთ-ერთი მცნებაც ამას გვეუბნება ,,პატივი ეც მამასა შენსა და დედასა შენსა”…. ეს მარტო მშობლების პატივისცემას არ გულისხმობს, თუმცა, თუ სხვას ჩაწიხლავ და გადათელავ, აღარც მშობლის პატივისცემა გამოდის…გული მტკივა, განვიცდი…ვიტყვი იმასაც, რომ ეს მარტო სტუდენტების ბრალი არ არის, მათ ჩვენ მივეცით ძალიან ცუდი მაგალითი… ისინი გაწევ-გამოწევას ხედავენ პარლენტში, ოჯახში, ძალადობას გაურბიან ეკლესიიდან… არ მიკვირს, რომ ასე იქცევიან, მაგრამ მაინც ძალიან ცუდი საყურებელია!..
მერაბ მეტრეველი:
ყველა კერძო უმაღლესი სასწვლებელი უნდა გავიტანოთ თბილისიდან. თბილისში უნდა დარჩეს ისინი, რომლებიც კომუნისტების დროსაც იყვნენ: თსუ, სამედიცონო, თეატრალური და ა.შ. დანარჩრნებს ანუ კერძოებს და მათ შორის ყველაზე პრესტიჟულებს მთავრობამ უნდა შესთავაზოს შეღავათები (ვთქვათ ყველა გადასახადისგან გათავისუფლება 10 წლით) იმის სანაცვლოდ, რომ გადავიდნენ თუნდაც თბილსთან ახლოს მდებარე რეგიონულ ცენტრებში, როგორებიცაა: თელავი, გორი, რუსთავი...ახლო ქალაქებს იმიტომ ვასახელებ, რომ პროფესურა ძირითადად თბილისში ცხოვრობს და სიარული რომ არ გაუჭირდეთ. თუმცა თუ ვინმე მოახერხებს და მოინდომებს ლიხს იქითაც გადასვლას: ქუთაისში, ზუგდიდში, ფოთში და ა.შ. კიდევ უფრო მეტად უნდა წაახალისონ. ამ ცვლილებით რამდნეიმე კურდღელს დავიჭერთ:
1) განიტვირთება თბილისი, სადაც ისედაც ყველაფერი ერთადაა თავმოყრილი
2) დაიტვირთება და გამოცოცხლდება პატარა ქალაქები.
3) სტუდენტებს ბინა და ზოგადად, ცხოვრება დაუჯდებათ იმის ნახევარი ფასი, რაც თბილისში.
4) ხოლო პატარა ქალაქის მცხოვრებლებს მიცემათ ბინების გაქირავების საშუალება.
5) ამ ქალაქებში დამატებით გაჩნდება კაფეები, კლუბები და ა.შ.
ზურა სიხარულიძე:
ყველანაირი ძალადობა დაუშვებელია, მით უმეტეს, უნივერსიტეტში!!! მაგრამ რა არის ამის მიზეზი - ზუსტად პოსტპანდემიური პერიოდი. ჩვენ დავკარგეთ და აი, ამ სტუდენტებმაც იმ ორი წლის მანძილზე პირდაპირი კომუნიკაციის უნარი ერთმანეთშიც და მათთანაც. იმათ ჩამოუყალიბდათ ასეთი ტიპის ქცევითი მოდელი, ეს არც მათი ბრალია, არც არავისი, ეს სიტუაციურად ხდება, ამიტომ ქაოტურად არ უნდა მომხდარიყო სწავლის გაგრძლება, უნდა მომზადებულიყო რაღაც გარდამავალი პერიოდი და ადაპტირება უნდა მომხდარიყო მათ ცნობიერებაში, რომ უნივერსიტეტის კედლებს და ჩვეულ რეჟიმს დაუბრუნდნენ. ძაან მძიმე კრიზისია ეხლა უმაღლესი განთლების სისტემაში. ბევრი ქვეყანა დარჩა ჰიბრიდულ მოდელზე და ნელ ნელა გადავლენ ან დარჩებიან ამ მოდელზე. ამიტო სულ ვიძახდი, რომ პოსტკოვიდური პერიოდი იქნება მძიმე, ბევრი რამ იქნებოდა შეცვლილი და ამისთვის უნდა მოვმზადებულიყავით. არავის არ გაუვა ულტიმატუმის ენით საუბარი და ყველა წაგებული დარჩება
დათო ლიკლიკაძე:
ჩემი სოლიდარობა და სრული მხარდაჭერა სტუდენტებს. მეამბოხეებს, რომლებსაც ორი თვეა არავინ მოუსმინა და ვინც მოუსმინა, იმანაც გადააგდო. ჩემი მხარდაჭერა იმ ახალგაზრდებს, რომლებიც მხოლოდ იმიტომ ითხოვდნენ, რასაც ითხოვდნენ, რომ ბინის ქირას ვერ იხდიან და იმიტომაც ვერ ჩადიან თბილისში. ამაზე ვინმეს გიფიქრიათ? მე მიფიქრია.
ბინის ქირასაც ვუხდიდით ქართველი ხალხი და ბენზინსაც და არ იკადრეს პარლამენტარებმა ქუთაისში სიარული პარლამენტისთვის. და რა არის იმაში გაუგებარი, რომ სტუდენტი ვერ ჩადის თბილისში? ახლა არ გამომიხტეთ აქციის ფორმაზე. ფორმა მიუღებელია, მაგრამ პროტესტი სრულიად მისაღები. იქნებ რომ მოგვესმინა ამ ახალგაზრდებისთვის, გამოსაშვები აგრესიაც არ გვქონოდა. გიფიქრიათ? მე მიფიქრია.
ნატა ასათიანი:
რაც არ უნდა სამართლიანი იყოს მოთხოვნები (თუმცა ჩემი პოზიცია ამ უსამართლობაზე ერთ-ერთმა პირველმა ადრე საჯაროდ უკვე დავაფიქსირე), ამ ფორმით ასაკოვანი ადამიანების, ჩვენი პროფესორების ფიზიკური შეურაცხყოფა და ამგვარად "მიზნის" მიღწევა ამორალური და დაუშვებელია. დღეს სტუდენტებმა რეალობის განცდა დაკარგეს და გადავიდნენ მორალურ ზღვარს. ბევრი სტუდენტური პროტესტი მახსოვს და მაშინ სოლიდარული ვიყავი მათი. სამართლიანი და მართლაც შესრულებადი მოთხოვნები კი პოლიციისა და ხელკეტების ძალით იხშობოდა. დღეს სხვა ვითარებაა. ჩვენ მაქსიმალურად ვცდილობთ, რომ სამართალდამცავებსა და სტუდენტებს შორის შეხება თავიდან ავიცილოთ. იმედი მაქვს, ყველა დაფიქრდება თავის საქციელზე და მალე გამოიტანს დასკვნებს. ჩემი დიდი პატივისცემა პროფესორ რამაზ ხომერიკს, ზუსტი და საბუნებისმეტყველო მეცნიერებათა ფაკულტეტის დეკანს და დაცვის ოთხ თანამშრომელს, რომლებიც საავადმყოფოში გადავიყვანეთ!
სოფო ხორგუანი:
რა რუდუნებითაც ყველამ დაგმეთ ის სტუდენტები, იმავე რუდუნებით მათთვის მხარდაჭერა რომ გამოგეცხადებინათ, აქამდე არ მივიდოდა საქმე. ციციკორეების მადლით!
გიორგი კალატოზიშვილი:
ასე ექცევიან დღეს პროფესორს. ჩემთვის მიუღებელია ასეთი აგრესია, ასეთი საქციელი. სტუდენტი ასე არ უნდა იქცეოდეს! უნივერსიტეტის ვებგვერდზე რამაზ ხომერიკზე ასეთი რამ წავიკითხე: "რამაზ ხომერიკი მისი დეკანობის პერიოდში ყოველწლიური სამეცნიერო კონფერენციის გამარჯვებულ სტუდენტსა თუ სტუდენტთა ჯგუფს (თითოეული დეპარტამენტიდან) საკუთარი ხელფასიდან 600 ლარით აჯილდოვებდა".
ბუბა კუდავა:
რა კადრებიც უნივერსიტეტიდან ვრცელდება, ეს არის ჩვეულებრივი კრიმინალი და ადამიანების, უნივერსიტეტის თანამშრომლების ცემა-ტყეპას პროტესტთან არავითარი საერთო არა აქვს!
ბაჩო ხუროშვილი:
მთელი ცხოვრება სტუდენტების მხარეს ვიდექი და მხარს ვუჭერდი გულრწფელ პროტესტს. ხო და იმას, რაც დღეს თბილისის სახელმწიფო უნივერსიტეტში ხდება, არაფერი აქვს საერთო ამ უნივერსიტეტის ღირებულებებთან და არის სირცხვილი. ეს ლაფი ამ ინსტიტუციას არ დაუმსახურებია და არც თქვენ ხართ ის ხალხი, რომელიც თსუ-ს სახედ შეგვიძლია აღვიქვათ! დაიმახსოვრეთ და შეეგუეთ, რომ თბილისის სახელმწიფო უნივერსიტეტი არც ცარიელი კედლებია და არც ცარიელი სახელი. ესაა უძველესი ქართული უნივერსიტეტი, რომელიც დღემდე იყო და არის წამყვანი ქართული სამეცნიერო კერა. და ვინ ლანძღავს? ის პროფესორები, ბლოგი რომ არ დაუწერიათ ცხოვრებაში, არა თუ სტატია? ის ხალხი, პროფესიულ და უმაღლეს განათლებას რომ ვერ არჩევს? ის ხალხი, უნივერსიტეტი რომ სარკეებიანი საპირფარეშო ჰგონია? დიახ, ბევრი პრობლემა აქვს თსუ-ს და ბევრი რამაა დროულად მოსაგვარებელი, მაგრამ თქვენ სად გაიზარდეთ?
მამის და ბაბუის ასაკის ხალხზე ხელი როგორ აღმართეთ? ხელი როგორ მოკიდეთ იმ ხალხს, თქვენი წონა მონოგრაფიები რომ აქვთ ნაწერი და თქვენი თმის რაოდენობის სტუდენტი რომ ჰყავთ აღზრდილი! რომელ ონლაინ გამოცდას ითხოვთ, დეიდაშვილის მეგობარმა, ვინმე გიორგიმ რომ უნდა დაწეროს თქვენს ნაცვლად? გამობრძანდით უნივერსიტეტიდან და მოიხადეთ ბოდიში, პირველ რიგში პროფესორებს და ლექტორებს მოუბოდიშეთ, საგანზე მოხალისეობრივად, 90 ლარად რომ გემსახურებიან.
გიორგი ლობჟანიძე:
რა კადრებიც უნივერსიტეტიდან ვრცელდება, ეს არის ჩვეულებრივი კრიმინალი და ადამიანების, უნივერსიტეტის თანამშრომლების ცემა- ტყეპას პროტესტთან არავითარი საერთო არა აქვს!
გიგი თევზაძე:
რაც სტუდენტები VS თსუ ადმინისტრაცია ამბავზე კომენტარებს ვკითხულობ, გახარია დამაკლდა:"ინსტიტუციაზე შეტევა უნდა დაისაჯოსო", რომ გამოვა და იტყვის."მთელი სიმკაცრითო"."გადასარჩენია ინსტიტუციაო. აბა რა გგონიათო". ნუ, თვალსაც ჩაგიკრავთ, ალბათ.