9
მაისიდღის ზოგადი ასტროლოგიური პროგნოზი
ძლიერმა წვიმამ და სეტყვამ გორის მუნიციპალიტეტი დააზარალა. ხანგრძლივი წვიმის შედეგად წარმოქმნილმა ნიაღვრებმა ქალაქის რამდენიმე მონაკვეთი დატბორა.
ყველაზე რთული ვითარება გორში, წმინდა წყლის ტერიტორიაზე, ე.წ. ბარაკების დასახლებასა და კომბინატის დასახლების ორ ლოკაციაზეა. ამასთანავე, რამდენიმე ქუჩაზე წყალი შევარდა საცხოვრებელი სახლების პირველ სართულზე.
შიდა ქართლის გუბერნატორის მოვალეობის შემსრულებლის, სიმონ გულედანის ინფორმაციით, გორის გარდა რეგიონის სხვა მუნიციპალიტეტებში ძლიერ წვიმას ანალოგიური პრობლემები არ შეუქმნია.
"ინტენსიურმა წვიმამ დააზარალა გორის მუნიციპალიტეტი. ძირითადად პრობლემები შეიქმნა გორის რამდენიმე უბანში. ინტენსიური წვიმის შედეგად წარმოქმნილმა ნიაღვრებმა დატბორა რამდენიმე საცხოვრებელი სახლის პირველი სართული და ასევე ეზოები.
ამ დროისთვის ყველაზე საყურადღებო ვითარებაა გორში კომბინატის დასახლებასა და სოფელ ტინისხიდს შორის არსებულ მონაკვეთზე, სადაც სარკინიგზო გადასასვლელი ხიდის ქვეშ არსებული მონაკვეთი დაიტბორა.
აღნიშნულ ლოკაციაზე ერთ-ერთმა ავტომობილმა გამოსვლა ვეღარ შეძლო და მძღოლი და სატრანსპორტო საშუალებაც შინაგან საქმეთა სამინისტროს შესაბამისმა დანაყოფებმა გამოიყვანეს. საბედნიეროდ, შემთხვევის შედეგად არავინ დაშავებულა. რაც შეეხება სეტყვით მიყენებულ ზიანს, ჯერჯერობით სოფლებიდან ამასთან დაკავშირებით შეტყობინება არ გვაქვს", - განაცხადა სიმონ გულედანმა.
მისივე თქმით, შესულია 70-მდე შეტყობინება.
ფოტოები: ია თინიკაშვილი
ნახეთ ვიდეოკადრები:
