"ეს პატარა ბიჭი სახლიდან ომში გაპარული ილიაა... მებრძოლი სულის ბიჭი იყო" - ილია ელოშვილის უცნობი კადრები აფხაზეთის ომიდან: რას წერს გარდაცვლილის მეგობარი?

პიარის სპეციალისტი ეკა ჟვანია გარდაცვლილ ილია ელოშვილის შესახებ წერს. ის სოციალურ ქსელში კადრებს ავრცელებს, რომელიც აფხაზეთის ომის დროსაა გადაღებული. როგორც ის წერს, კონკრეტულ ვიდეოში, სადაც ბერეტიანი მებრძოლი ჩანს, სწორედ ილია ელოშვილია აღბეჭდილი.

"ეს პატარა ბიჭი, სახლიდან ომში გაპარული ილიაა. დიახ ეს ბუნჩულა, კეთილი, ადამიანი აფხაზეთის ომგამოვლილი, მებრძოლი სულის ბიჭი იყო. როცა ვნახე სამინისტროში 2012 წელს, ჩემი სკოლელი, ჩემი უბნელი ისე გამიხარდა.. ჩემთვის უცხო და "რაღაცნაირ" გარემოში ბედის საჩუქრად დამხვდა. რთული პირადი პერიოდი ჰქონდა ემოციურად, "მელაპარაკე დედუ"...

ძალიან დიდიხანია არ გვილაპარაკია. დღეს დილიდან "ველაპარაკები", "ვეჩხუბე" კიდეც... ბერეტი როგორ გიხდებოდა, ატარეთქო და - ტეხავს ახლა მინისტრის ტოლა კაცი ბერეტით ხომ არ ვივლიო და უხერხულად იცინოდა. აი რომ სიამოვნებს კომპლიმენტი და თან არ იმჩნევს.

ბევრ რამეს არ იმჩნევდა. ბევრს. დილიდან ვალაგებდი ტექსტს და დავჩლუნგდი მგონი არეულად ვწერ. ვერ გამოვხატავ. უბრალოდ მინდა ასეთი დაგამახსოვრდეთ: - მებრძოლი ბიჭი, რომელსაც ბერეტი ძალიან უხდებოდა" - წერს ჟვანია.

ცნობისთვის, თბილისის მერის მოადგილე ილია ელოშვილი საკუთარ სახლში გარდაცვლილი იპოვეს. შსს-მ გამოძიება თვითმკვლელობამდე მიყვანის მუხლით დაიწყო.

ელოშვილი 47 წლის იყო, მას მეუღლე და ორი შვილი დარჩა. ელოშვილი თბილისის მერის მოადგილის თანამდებობას 2021 წლიდან იკავებდა, იქამდე ენერგეტიკის მინისტრი, მანამდე კი ენერგეტიკის მინისტრის მოადგილე იყო.