ფინეთის პრეზიდენტი აცხადებს, რომ მზადაა, ნატოში გაწევრიანებასთან დაკავშირებით რეჯეფ თაიფ ერდოღანს შეხვდეს
ფინეთის პრეზიდენტი საულ ნიინისტო აცხადებს, რომ მზადაა თურქეთის პრეზიდენტს რეჯეფ თაიფ ერდოღანს ნატოში გაწევრიანებასთან დაკავშირებით შეხვდეს, - ინფორმაციას თურქული სახელმწიფო მედიასაშუალება „ანადოლუ“ ავრცელებს.
CNN-ის ინფორმაციით, კი ფინეთის პრეზიდენტმა განაცხადა, რომ ის "ცოტა დაბნეულია" თურქეთის პრეზიდენტის რეჯეფ თაიფ ერდოღანის კომენტარების გამო, რომელმაც აღნიშნა, რომ ფინეთისა და შვედეთის ნატოში გაწევრიანების შესაძლებლობას "დადებითად" არ განიხილავს.
საულ ნიინისტოს თქმით, ის დაბნეულია, რადგან დაახლოებით ერთი თვის წინ, სატელეფონო საუბარი ჰქონდა თურქეთის ლიდერთან, რა დროსაც ერდოღანმა განაცხადა, რომ ნატოში ფინეთის წევრობას დადებითად შეაფასებდა.
"მადლობა გადავუხადე მას და ძალიან კმაყოფილი იყო ჩემი მადლიერებით. ასე რომ, თქვენ უნდა გესმოდეთ, რომ მე ცოტა დაბნეული ვარ. ის, რაც ორი დღის წინ მოვისმინეთ, განსხვავებული იყო გუშინდელთან შედარებით. ვფიქრობ, რომ ის, რაც ახლა ჩვენ გვჭირდება არის ძალიან მკაფიო პასუხი. მე მზად ვარ, ახალი დისკუსია გავმართო პრეზიდენტ ერდოღანთან მის მიერ წამოჭრილ პრობლემებთან დაკავშირებით", - დასძინა ფინეთის პრეზიდენტმა.
შეგახსენებთ, ერდოღანმა განაცხადა, რომ თურქეთი მხარს ვერ დაუჭერს ალიანსის გაფართოებას, რადგან ფინეთი და შვედეთი "ბევრი ტერორისტული ორგანიზაციის სახლია".
აღსანიშნავია, რომ ნებისმიერ ქვეყანას, რომელიც ნატოში გაწევრიანებას ცდილობს, სამხედრო ალიანსის წევრების ერთსულოვანი მხარდაჭერა სჭირდება.
შეგახსენებთ, დღეს ფინეთმა ოფიციალურად გამოაცხადა, რომ ნატოს წევრობისთვის მიმართავს.