"ეს პუტინისტი, თავისი მრევლიანად, ჯოჯოხეთში მოხვდება" - თამარ ჩერგოლეიშვილი ქუთათელ-გაენათელი მიტროპოლიტის განცხადებას ეხმაურება
"ეს პუტინისტი თავისი მრევლიანად ჯოჯოხეთში მოხვდება", - ასე გამოეხმაურა "ევროპული საქართველოს" ერთ-ერთი ლიდერი თამარ ჩერგოლეიშვილი სოციალურ ქსელში ქუთათელ-გაენათელი მიტროპოლიტის, იოანეს (გმარეკელი) განცხადებას, რომელშიც მან უკრაინისთვის იარაღის მიწოდებას "ცალმხრივი წაქეზება" უწოდა.
"მძიმე სანახავი, მოსასმენი და გასაგებია, როდესაც ორი ერთმორწმუნე ერი, მონათესავე, ასე რომ ვთქვათ, ბიძაშვილები ერთმანეთს გადაემტერებიან, ერთი უფრო ძლიერი და მეორე უფრო სუსტია, თუმცა არც ისე სუსტია და სისხლი იღვრება, ძირითადად უდანაშაულო ხალხის.
ვიღაცა სამხედრო ბრძანებას ასრულებს, ვიღაცა ბრძოლის ველზე აღმოჩნდა. ნასროლი ჭურვი ერთ მხარეს მის სახლს მოხვდა. ეს დიდი ბოროტებაა. რამ გამოიწვია პოლიტოლოგების საქმეა ეს გამოიკვლიონ, მაგრამ მე სხვა რამე მაკვირვებს - როდესაც ორი ძმა, ორი მეზობელი ერთმანეთში ჩხუბობს, გარშემომყოფები აშველებენ ხოლმე, შუაში ჩადგებიან და ცდილობენ, დაამშვიდონ და დააწყნარონ, რა გაქვთ სადავო, როგორ მოვაგვაროთ, ან გამოსავალი ვიპოვოთ. აქ, ერთი მხარის ცალმხრივ წაქეზებას ვხედავთ - აი, შენ დამატებითი იარაღი, აი, შენ ფული. კარგია, რომ უკრაინაში ჰუმანიტარული დახმარება იგზავნება და მშვიდობიან მოქალაქეებს, გასაჭირში მყოფთ ეს ეხმარება, მაგრამ ამ დროს, იარაღის მიწოდება ეს არის ცეცხლზე ნავთის დასხმა. კი, გასაგებია, რომ თუ იმას მეტი აქვს, ამასაც რომ ჰქონდეს, მაგრამ მეტი სისხლი დაიღვრება, მეტი უდანაშაულო ადამიანი დაიხოცება..", - განაცხადა მეუფე იოანემ ტელეკომპანია "რიონის“ ეთერში. (იხილეთ განცხადება სრულად)
მეუფე იოანე გამრეკელს აქამდეც გამოარჩევდა რუსეთისადმი ლოიალური განცხადებები. ქართული მედია წერდა იმასაც, რომ მას ურთიერობა ჰქონდა რუსეთის მთავრობის დაქვემდებარებაში არსებულ “პრიმაკოვის ფონდთან” და ასევე საქართველოში არსებულ ჰომოფობიურ ჯგუფებთან.
იხილეთ ასევე: