"თორნიკე დღეს სკოლისკენ მიმავალ მეგობარს ეუბნება "დილა მშვიდობისა"... არცერთმა ბავშვმა არ უნდა დაკარგოს მეგობარი" - ოქროყანაში ავარიისას გარდაცვლილი არასრულწლოვნის მეგობრის დედის ემოციური პოსტი
გასულ კვირაში, ოქროყანაში მომხდარ ავარიას 8 წლის ბავშვის სიცოცხლე ემსვერპლა. ტრაგედიის შესახებ არაერთმა დაწერა სოციალურ ქსელში, მათ შორის თბილისის საკრებულოში, ფრაქცია "თბილისი საქართველოსთვის" წევრმა, გიორგი შარაშიძემ. მისი ინფორმაციით, ოქროყანის იმ ადგილს, სადაც უბედური შემთხვევა მოხდა, "სიკვდილის ზონას" უწოდებენ.
"ადგილობრივი მოსახლეობა ამ ადგილს "სიკვდილის ზონას" უწოდებს, რადგან აქ უამრავი ადამიანი დასახიჩრდა წლების განმავლობაში და რამდენიმე გარდაიცვალა. მათ შორის იყო 8 წლის გიორგი, რომელიც რამდენიმე დღის წინ ემსხვერპლა ავტოავარიას...
მიუხედავად იმისა, რომ ადგილობრივ მოსახლეობას დასახმარებლად არაერთხელ მიუმართავს თბილისის მერიისთვის, პასუხი დღემდე არ აქვთ და პრობლემა დღემდე გადაუჭრელია. არადა სიჩქარის შემზღუდავ ბარიერს, ან საგზაო ნიშანსაც კი შეეძლო გადაერჩინა ადამიანის სიცოცხლე" - დაწერა "ფეისბუქში" გიორგი შარაშიძემ.
არასრულწლოვნის ტრაგიკულ გარდაცვალებას გამოეხმაურა გიორგის მეგობრის ერთ-ერთი მშობელი, რომელმაც სოციალურ ქსელში ბავშვის საფლავზე გადაღებული ფოტო გამოაქვეყნა და თბილისის მერიას ოქროყანაში უსაფრთხო გადასასვლელის გაკეთებისკენ მოუწოდა.
"თორნიკე დღეს სკოლისკენ მიმავალ მეგობარს ეუბნება "დილა მშვიდობისა". გიო შაბათს ოქროყანა-მთაწმინდის გზაზე დაიღუპა. მანქანა დაეჯახა. არცერთმა ბავშვმა არ უნდა დაკარგოს მეგობარი ასეთი პატარა! თბილისის მერიამ უნდა მოგვისმინოს! ოქროხანას ბავშვებს უსაფრთხო გადასასვლელი სჭირდებათ!" ~