უცხოელი ლექტორები და სწავლების ამერიკული მეთოდი - ვებსტერის უნივერსიტეტი საქართველოშია

ვებსტერის უნივერსიტეტი უკვე საქართველოშია და 2022 წლიდან სტუდენტების მიღებას იწყებს. პირველ ეტაპზე, ამერიკული უმაღლესი სასწავლებელი 5 პროგრამით შემოვიდა: საბაკალავრო საფეხური - საერთაშორისო ურთიერთობები, ბიზნესის ადმინისტრირება მენეჯმენტი, მასკომუნიკაციები; სამაგისტრო საფეხური - საერთაშორისო ურთიერთობები, ბიზნესის ადმინისტრირება; მომდევნო წლიდან კი აღნიშნულ ჩამონათვალს მედიის კვლევების სამაგისტრო პროგრამაც დაემატება.

აშშ-ში აკრედიტებული ვებსტერის უნივერსიტეტი მსოფლიოს 10 ქვეყანაშია წარმოდგენილი და საერთაშორისო სტუდენტების მხრიდან დიდი მოთხოვნით ხასიათდება. ვებსტერის უნივერსიტეტი აკრედიტებულია აშშ-ს The Higher Learning Commission (HLC) - ის მიერ, აკრედიტაცია ფარავს საბაკალავრო და სამაგისტრო პროგრამებს მსოფლიოს ყველა კამპუსში, საქართველოს ჩათვლით.

ვებსტერის უნივერსიტეტის გახსნასთან დაკავშირებით საქართველოს ეწვია ტაშკენტის ფილიალის წარმომადგენელი, რექტორის ასისტენტი ემინ ტაშირ ოღლუ ჰაჯიევი, რომელმაც Ambebi.ge-სთან დეტალურად ისაუბრა, რა ახალი შესაძლებლობები იქმნება ჩვენს ქვეყანაში სტუდენტებისა და საგანმანათლებლო ბაზრისთვის:

2-წლიანი მუშაობის შემდეგ, ვებსტერის უნივერსიტეტი საქართველოშია. რა სარგებლის მომტანი იქნება ეს ჩვენი ქვეყნისთვის?

მე უნივერსიტეტის საქართველოში შემოსვლის პროცესში ინტენსიურად ვიყავი ჩართული და ამით ძალიან აღფრთოვანებული ვარ. წარმოშობით ბაქოდან ვარ და საქართველოთი ყოველთვის მოხიბლული ვიყავი, ყველა აქაური ვიზიტი საინტერესო და სასიამოვნო იყო.

ჩემი აზრით, საქართველო ყოველთვის ცენტრი იყო იმ ყველაფრისა, რაც სამხრეთ კავკასიაში ხდებოდა და ვფიქრობ, რომ ვებსტერის უნივერსიტეტის აქ არსებობა ძალიან სასარგებლო იქნება როგორც თქვენი ქვეყნისთვის, ისე ახლოს მდებარე სახელმწიფოებისთვის. ვიმედოვნებ, ბევრი საერთაშორისო სტუდენტი გამოიყენებს ამ შესაძლებლობას და დაიწყებს ვებსტერის საქართველოს ფილიალში სწავლას.

რა არის ვებსტერის უნივერსიტეტის პროგრამების მთავარი უპირატესობა და რატომ სარგებლობს ის დიდი პოპულარობით მსოფლიოს მასშტაბით? რატომ უნდა ჩადონ ინვესტიცია სტუდენტებმა ვებსტერში მიღებულ ცოდნაში?

განათლება უძრავი ქონების მსგავსი ინვესტიცია არ არის, რომელსაც დღეს შეიძენ და რამდენიმე წლის შემდეგ უფრო ძვირად გაყიდი. ის განსხვავებული ინვესტიციაა. შენ მასში იხდი, სწავლობ და შემდეგ იწყებ შენი პროფესიით მუშაობას. ჩვენი სტუდენტების 94% პროგრამის დასრულებიდან 4 თვეში სასურველ სამსახურში საქმდება.

ჩვენ ტაშკენტში გვყავს 2 000 კურსდამთავრებული და მთელი მსოფლიოს მასშტაბით დიდი ქსელი გვაქვს, 10 ქვეყანაში ვართ წარმოდგენილი, რაც სტუდენტს ბევრ შესაძლებლობას აძლევს. მაგალითად, როდესაც საქართველოში სტუდენტი სწავლების პირველ წელს დაასრულებს, მას შეეძლება, 2 სემესტრის განმავლობაში სხვა ქვეყანაში ისწავლოს: ერთი სემესტრი გაატაროს ათენში, მეორე ჟენევაში ან სხვა ქალაქები აირჩიოს. მნიშვნელოვანია, რომ ასე მიიღებენ არამხოლოდ ხარისხიან განათლებას, არამედ საზღვარგარეთ გააფართოებენ თავიანთ კავშირებს, შეხვდებიან ბევრ ადამიანს და თავიანთი სამომავლო საქმიანობისთვის ცოდნას კიდევ უფრო გაიღრმავებენ.

რა უპირატესობები აქვს კონკრეტულად ამერიკულ განათლებას და რატომ არის ის ჩვენთვის მნიშვნელოვანი?

ამერიკული განათლება განსხვავდება როგორც ბრიტანული, ისე გერმანული და პოსტ-საბჭოთა ქვეყნების განათლების სისტემებისგან. ვებსტერის უნივერსიტეტის სასწავლო პროგრამა მუშაობს ასე: სტუდენტები მხოლოდ ლექციებს კი არ ესწრებიან ან საგნებს მხოლოდ ტრადიციული მეთოდით კი არ გადიან, არამედ ისინი მონაწილეობას იღებენ ზოგადი განათლების ისეთ კურსში, როგორიც არის გლობალური მოქალაქეობის პროგრამა (Global Citizenship Program). უნივერსიტეტის მისიაა, გაზარდოს გლობალური მოქალაქეობის პროგრამა, კავშირები და ჩვენ ამისათვის შესაბამისი კურსები გვაქვს.

სწავლების აღნიშნული მეთოდის მეშვეობით სტუდენტები მიიღებენ მრავალფეროვან განათლებას, ისწავლიან კრიტიკულ აზროვნებას, ბევრს წაიკითხავენ და იმსჯელებენ. მნიშვნელოვანია, რომ ამერიკული სისტემა სტუდენტებს აძლევს თავისუფლებას და საინტერესოა ისიც, რომ ვებსტერის კლასები არის მცირე ზომის და ჯგუფები სხვადასხვა საგანზე მუდმივად იცვლება, რაც სტუდენტს უბიძგებს, მუდმივად კონკურენტული და მომზადებული იყოს.

აქვს თუ არა საქართველოს პოტენციალი, რეგიონულ საგანმანათლებლო ჰაბად იქცეს და რა წვლილს შეიტანს აღნიშნულ პროცესში ვებსტერის უნივერსიტეტი?

საქართველოში ამ მხრივ პოზიტიური კლიმატია, რადგან ქვეყანას შეუძლია იყოს აკადემიურ ჰაბი. ისტორიულად აქ იყვნენ დიდებული მკვლევრები, ექიმები, მეცნიერები და ქვეყანას ამისთვის შესანიშნავი კლიმატი აქვს. უბრალოდ ის კიდევ ერთხელ უნდა განვაახლოთ და ახალ-ახალი საგანმანათლებლო გამოწვევის შემოტანით ჩვენ ამას შევძლებთ. ჩვენ შევძლებთ, სტუდენტებს ვუჩვენოთ, რომ განათლება ისევ ერთ-ერთი საუკეთესო ინვესტიციაა.

როგორ ითანამშრომლებს ვებსტერის უნივერსიტეტის ტაშკენტის ოფისი თბილისთან?

მოგეხსენებათ, „ვებსტერის უნივერსიტეტი“ საერთაშორისო მასშტაბისაა, ჩემი დილა შეიძლება დაიწყოს სინგაპურიდან მოსული შეტყობინებებით, დღის განმავლობაში ვიმუშაო ტაშკენტისთვის, შემდეგ ევროპისთვის, იქნება ეს ჟენევა თუ ვენა ან ათენი და დღის ბოლოს ყველაფერი დამთავრდეს სენტ-ლუისით. კითხვას რომ დავუბრუნდეთ, მე „ვებსტერის უნივერსიტეტისთვის“ ვმუშაობდი ტაილანდში და შემდეგ გადავედი ტაშკენტში, საიდანაც საქართველოში ჩამოსვლა და შეხვედრების გამართვა უფრო მარტივია. რა თქმა უნდა, ჩვენ ყოველთვის ვითანამშრომლებთ, მაგალითად, ფაკულტეტებზე მობილობასთან დაკავშირებით და სხვა.

ჩვენ გვაქვს პროგრამა, რომელიც არა მხოლოდ საერთაშორისო სტუდენტებისთვის ვებსტერის სხვადასხვა ფილიალში სწავლებას უკავშირდება, არამედ პროფესორებს შესაძლებლობას აძლევს, სემესტრულად სხვადასხვა ქვეყანაში ასწავლონ. რა თქმა უნდა, ეს ქმნის ახალ გამოწვევებსაც, რადგან პროფესორები მუდმივად ერთსა და იმავე ქვეყანაში და ერთი უნივერსიტეტის კამპუსში არ იქნებიან, იმოგზაურებენ და ახალ გამოცდილებას მიიღებენ, რაც მათთვის ერთგვარი კულტურული ტრენინგი იქნება.

ეს სისტემა როგორც პროფესორებს, ისე სტუდენტებს ახალ შესაძლებლობებს მისცემს. მაგალითად, ბიზნესის მიმართულება დაფუძნებულია „ქეისებით“ სწავლებაზე, რომელიც შეესაბამება იმ ქვეყანას, სადაც პროგრამა ისწავლება. შეიძლება, სასწავლო პროგრამა ყველა ქვეყნისთვის ერთი და იგივე იყოს, მაგრამ „ქეისებით“ სწავლება იქნება განსხვავებული. მაგალითად, უზბეკეთში ყურადღება დაეთმობა General Motors-სს, რადგან ის აქ ფართოდ არის წარმოდგენილი, ხოლო შვეიცარიაში - „როლექსს“. შესაბამისად, როდესაც პროფესორები მოგზაურობენ, მათ უწევთ ახალ-ახალი ქეისებით სწავლება, რაც ზრდის მათს ცოდნას, თვალსაწიერს, აუმჯობესებს გადაწყვეტილების მიღების უნარს და სხვა. ეს ძალიან დასაფასებელია.

დაბოლოს, რა სამომავლო გეგმები აქვს „ვებსტერის უნივერსიტეტს“ საქართველოში, განსაკუთრებით, ჯერ კიდევ არსებული პანდემიური მდგომარეობის გათვალისწინებით?

ბევრი უნივერსიტეტი და სკოლა სწავლების დისტანციური ან ჰიბრიდული მეთოდისთვის ჯერ კიდევ არ იყო მზად. საბედნიეროდ, „ვებსტერის უნივერსიტეტმა“ ჰიბრიდული მოდელი ფაქტობრივად, 3 დღეში დანერგა. მიუხედავად ამისა, იმედი გვაქვს, რომ პანდემია მალე დასრულდება, შეზღუდვები მოიხსნება და სწავლების ტრადიციულ ფორმატს დავუბრუნდებით.

ახლა საქართველოში 5 პროგრამით შემოვედით, თუმცა ეს ჯერ დასაწყისია. იმედი გვაქვს, რომ სტუდენტების დაინტერესებასთან ერთად, პროგრამების რაოდენობა გაიზრდება. „ვებსტერის უნივერსიტეტის“ სათაო ოფისში ახლა 160 პროგრამაა და, იმედი გვაქვს, რომ მათი ჩამონათვალი საქართველოშიც გაფართოვდება და ამ პროცესში არ გავჩერდებით.

R