"პანდემიის განსხვავებულ ფაზაში ვართ... კორონავირუსზე ტესტების გაკეთება ლობიოს დათვლას დაემსგავსა" - როგორია ეპიდვითარება სამხრეთ აფრიკაში, სადაც ომიკრონი პირველად გამოვლინდა
კორონავირუსის ომიკრონ შტამი, რომელიც უკვე მთელ მსოფლიოს მოედო და აქამდე არსებულ შტამებს შორის ყველაზე უფრო გადამდებად მიიჩნევა, თავდაპირველად სამხრეთ აფრიკაში გამოვლინდა.
ომიკრონის გავრცელების პიკი სამხრეთ აფრიკაში დეკემბერში იყო, სადაც 12 დეკემბერს 37 000 შემთხვევა აღწერეს, რის შემდეგაც შემთხვევებმა კლება დაიწყო. ახლა კი ინფიცირების ყოველღიური მაჩვენებელი ასეთია:
- 24 იანვარი 1997 შემთხვევა
- 25 იანვარი 3197 შემთხვევა
- 26 იანვარი 4511 შემთხვევა
რაც შეეხება გარდაცვალების სტატისტიკას:
- 24 იანვარი - 88 გარდაცვლილი
- 25 იანვარი - 132 გარდაცვლილი
- 26 იანვარი - 94 გარდაცვლილი.
ამ დროისთვის ქვეყანაში კორონავირუსის 66 410 აქტიური შემთხვევაა.
საინტერესოა, რომ სამხრეთ აფრიკამ უარი თქვა ომიკრონის გამო მკაცრი შეზღუდვების დაწესებაზე და გააკრიტიკა სხვა ქვეყნების მთავრობები, რომლებმაც კოვიდის ამ ახალი შტამის გავრცელების პარალელურად, სამხრეთ აფრიკასთან ავიამიმოსვლა შეაჩერეს.
ადგილობრივი მეცნიერები დაეთანხმნენ მთავრობის მიდგომას, რომ არ შემოეღოთ მკაცრი რეგულაციები. და ახლა მიიჩნევენ, რომ სხვა ქვეყნებმაც უნდა გაითვალისწინონ მათი მაგალითი.
ჩვენ გვჯერა, რომ ვირუსი არ აღმოიფხვრება ადამიანის პოპულაციიდან. ჩვენ უნდა ვისწავლოთ მასთან ერთად ცხოვრება და ის ისწავლის, როგორ იცხოვროს ჩვენთან ერთად“, - ამბობს ინფექციურ დაავადებათა მკვლევარი, პროფესორი მართა ნუნეში BBC-სთან.
პროფესორ შაბირ მადჰის შეფასებით - "ჩვენ ახლა პანდემიის განსხვავებულ ფაზაში ვართ.“
მისივე განმარტებით, სამხრეთ აფრიკამ შეწყვიტა კარანტინი და კონტაქტების მოკვლევა. მანვე მოუწოდა მთავრობას შეწყვიტოს კორონავირუსზე ტესტების გაკეთება, რადგანაც ეს არასაჭიროა და "ლობიოს დათვლას“ ჰგავს.
პროფესორი მიიჩნევს, რომ ამის ნაცვლად პრიორიტეტული უნდა იყოს ჰოსპიტალიზების საჭიროების მინიმალიზება. ის ასევე აღნიშნავს, რომ ზოგიერთია ვაქცინებს არაეფექტიანად მიიჩნევს, რაც მცდარი მიდგომაა, ვინაიდან ის ომიკრონ შტამის შემთხვევაშიც ხელს უშლის დაავადების მძიმედ მიმდინარეობას.
პროფესორ სელიმ ქარიმის თქმით, სხვა ქვეყნებმა უნდა იცოდნენ, რომ რადგანაც ინფიცირების მაჩვენებელი სწრაფად იზრდება, მოსალოდნელია, რომ ის სწრაფად შემცირდება და პიკი მალე გადაივლის.