"გამომძიებლებმა უნდა გაარკვიონ, სალომე გაიყვანეს თუ თვითონ გავიდა სახლიდან, სად მიდის მისი კვალი" - რას ამბობენ იტალიაში, 5-დღიანი ძებნის შემდეგ ნაპოვნი გოგონას ახლობლები?

ხუთდღიანი გაუჩინარების შემდეგ, გუშინ, იტალიაში, ქართველი ემიგრანტი სალომე ტეტუნაშვილი ფსიქიატრიული საავადმყოფოს მიმდებარე ტერიტორიაზე იპოვეს. ახალგაზრდა ქალი შაბათს ქალაქ ნეაპოლიდან, იმ სახლიდან გაუჩინარდა, სადაც დამხმარედ მუშაობდა. გავრცელებული ინფორმაციით, ქალი უმძიმეს ფსიქოლოგიურ მდგომარეობაშია.

სალომე ტეტუნაშვილი გუშინ პოლიციის განყოფილებაში დაკითხეს. მან გამომძიებლებს პირველი ჩვენება უკვე მისცა.

იტალიაში მცხოვრები ინგა სიხარულიძე "ტვპირველთან" აცხადებს:

"ახლა ყველაფერი სათვალთვალო კამერების ჩანაწერებზეა დამოკიდებული - გამომძიებლებმა უნდა გაარკვიონ, გაიყვანეს თუ თვითონ გავიდა სახლიდან, სად მიდის ტეტუნაშვილის კვალი, სწორედ ჩანაწერების გაშიფვრის შემდეგ გახდება ცნობილი.

მეხსიერების ჩავარდნები აქვს, რაღაც დეტალები ახსოვს, რაღაცას ვერ იხსენებს. აცხადებს, რომ სახლიდან გამოვიდა, თუმცა არ ახსოვს, ზარი მიიღო თუ საკუთარი ნებით გავიდა.

ის არ ამბობს, რომ საავადმყოფოში მანქანით დატოვეს, აცხადებს, რომ ახსოვს ბიჭების დიდი ჯგუფი, უთხრეს, რომ გარკვეული მიმართულებით წასულიყო და საავადმყოფოშიც ასე 2 დღეში აღმოჩნდა. საკმაოდ შორია, 24 კილომეტრი ახალგაზრდა გოგომ ჩუსტებით როგორ გაიარა?! თავი სტკივა და ნიკაპი აქვს დაზიანებული, თუმცა არ ახსოვს, როგორ მიიღო დაზიანებები, ამბობს, მე, მგონი, დავარტყიო... ეს არის მისი პასუხი".

სპეციალურად შექმნილ ჯგუფებში, რომელშიც იტალიაში მცხოვრები ქართველი ემიგრანტები არიან გაწევრიანებულები, უამრავი ვერსია ვრცელდება. ისინი ბევრ საეჭვო გარემოებაზე წერენ და მათ შორის უნდობლობას უცხადებენ ოჯახს, სადაც სალომე მუშაობდა.

ახალგაზრდა ქალის გამოჩენა ქართველების მიერ ნეაპოლში ჩატარებულ საპროტესტო აქციას დაემთხვა. ისინი ვარაუდობენ, რომ გამტაცებელს ხმაურის შეეშინდა და სალომე გამოაჩინა.

სალომე ტეტუნაშვილის ძმამ ბადრი ტეტუნაშვილმა სოციალურ ქსელში სტატუსი გამოაქვეყნა, რომელშიც წერს, რომ მისი და ახლა დედასთან ერთად იმყოფება და ის ძლიერ სტრესშია.

ბადრი ტეტუნაშვილი:

"როგორც იცით, 5-დღიანი ძებნის შემდეგ ჩემი და, სალომე ტეტუნაშვილი ვიპოვეთ, რაც მთავარია ცოცხალი. ის იმყოფება ძლიერი სტრესის ქვეშ, ნეაპოლში, დედასთან ერთად. ამ წუთას სხვა რაიმე დამატებითი ინფორმაციის არ გვაქვს. მიმდინარეობს გამოძიება და ყველაფერი იმედი გვაქვს, რაც შეიძლება მალე იქნება ცნობილი. ძალიან დიდი მადლობა ქართველ ემიგრანტებს, წარმოუდგენელი გვერდში დგომისთვის, არ იშურებდნენ ძალას, რომ სალომე გვეპოვა, არ ტოვებდნენ დედას, ლეილა წიქარიშვილს არც ერთი წუთით მარტო, ეს ადამიანური თანადგომა ყველაზე ძვირფასი იყო ჩვენთვის. მადლობა და ვამაყობთ თქვენით. ასევე ძალიან დიდი მადლობა საქართველოს საგარეო საქმეთა სამინისტროს, კონსულს ქალბატონ ნატალია კორძაიას, რომელიც ოჯახის მიმართვისთანავე ჩაერთო საკითხში, გამუდმებით ყველაფერს აკეთებდა, რომ დაეჩქარებინა პროცესები და ყველანაირად დაგვხმარებოდა. ოჯახს უკვე გვყავს ადვოკატი, რომელიც იმედი გვაქვს, ძალიან სწრაფად მიიყვანს გამოძიებას ბოლომდე და გვეცოდინება ყველა დეტალი. კიდევ ერთხელ დიდი მადლობა ყველა ადამიანს! თქვენ შეძელით ჩვენი გაძლიერება, ამ ურთულესი 5 დღის განმავლობაში.