უარი რუსეთის მოთხოვნას - კრემლს წერილობითაც უპასუხეს
"შეერთებულმა შტატებმა მოსკოვს წერილობითი პასუხი გასცა, რომელიც მიზნად ისახავს რუსეთის მიერ უკრაინაში შეჭრის შეკავებას", - ამის შესახებ აშშ-ის სახელმწიფო მდივანმა ენტონი ბლინკენმა განაცხადა. პასუხი რუსეთის საგარეო საქმეთა სამინისტროს რუსეთში აშშ-ის ელჩმა ჯონ სალივანმა პირადად მიაწოდა.
როგორც ამერიკელმა დიპლომატმა ჟურნალისტებს სახელმწიფო დეპარტამენტში განუცხადა, წერილობითი დოკუმენტი ხაზს უსვამს სფეროებს, სადაც აშშ-მა განაცხადა, რომ ხედავს რუსეთთან პროგრესის პოტენციალს - შეიარაღების კონტროლი, გამჭვირვალობა და სტაბილურობა.
- ბლინკენმა თქვა, რომ აშშ-ის პასუხი რუსეთის მიმართ "ასახავს დიპლომატიურ გზას, თუ რუსეთი ამას აირჩევს“ და დასძინა, რომ იგი მოელის შემდგომ დისკუსიას რუსეთის საგარეო საქმეთა მინისტრ სერგეი ლავროვთან უახლოეს დღეებში.
"დოკუმენტი, რომელიც ჩვენ მივაწოდეთ, მოიცავს შეერთებული შტატების, ჩვენი მოკავშირეების და პარტნიორების შეშფოთებას რუსეთის ქმედებებთან დაკავშირებით, რომლებიც ძირს უთხრის უსაფრთხოებას, პრინციპულ და პრაგმატულ შეფასებას რუსეთის მიერ წამოყენებული წინადადების შესახებ და ჩვენს წინადადებებს იმ სფეროებისთვის, სადაც შეგვიძლია, ვიპოვოთ საერთო ენა", - განაცხადა ბლინკენმა. მისივე თქმით, აშშ-ის პასუხი ადასტურებს იმას, რაც აშშ-მა და ნატო-მ საჯაროდ განაცხადეს, შეინარჩუნონ ნატო-ს ღია კარის პოლიტიკა და უარი თქვან რუსეთის მოთხოვნაზე, რომ ნატო-მ არასდროს უნდა მიიღოს უკრაინა ალიანსში წევრად.
- "არ არის ცვლილება. არ იქნება ცვლილება", - თქვა ბლინკენმა აშშ-ს მიერ ნატოს ღია კარის პოლიტიკის მხარდაჭერაზე.
"ჩვენ ნათლად ვაცხადებთ, რომ არსებობს ძირითადი პრინციპები, რომელთა დასაცავად მზად ვართ, მათ შორის უკრაინის სუვერენიტეტი და ტერიტორიული მთლიანობა და სახელმწიფოების უფლება, აირჩიონ საკუთარი უსაფრთხოების ზომები და ალიანსები“, - დასძინა მან.
- ნატო-ს გენერალური მდივანი, იანს სტოლტენბერგი კი აცხადებს, რომ ნატო-ს საქართველოსა და უკრაინასთან მტკიცე და მჭიდრო პარტნიორობა აკავშირებს.
"პატივს ვცემთ თითოეული ქვეყნის სუვერენულ უფლებას, აირჩიოს უსაფრთხოების როგორი სისტემის ნაწილი სურს იყოს, ან არ იყოს და ეს არის მიზეზი იმისა, რომ ჩვენ, რა თქმა უნდა, პატივს ვცემთ საქართველოსა და უკრაინის გადაწყვეტილებას, ნატო-ში გაწევრიანებაზე განაცხადის გაკეთების შესახებ.
მტკიცედ ვუჭერთ მხარს იმ ძირითად პრინციპებს, რომლებსაც ევროპული უსაფრთხოება ემყარება მრავალი წლის განმავლობაში, ათწლეულების განმავლობაში. ეს არის ის, რომ ჩვენ პატივს ვცემთ თითოეული ერის სუვერენულ უფლებას, აირჩიოს თუ რა სახის უსაფრთხოების როგორი სისტემის ნაწილი სურს იყოს, ან არ იყოს და ეს არის მიზეზი იმისა, რომ ჩვენ, რა თქმა უნდა, პატივს ვცემთ საქართველოსა და უკრაინის გადაწყვეტილებას ნატო-ში გაწევრიანებაზე განაცხადის გაკეთების შესახებ და ასევე, მიზეზი იმისა, რომ ჩვენ ორივე ქვეყანასთან ძალიან მტკიცე და მჭიდრო პარტნიორობა გვაქვს,“- აღნიშნა სტოლტენბერგმა.
მანვე განაცხადა, რომ რუსეთმა უნდა გაიყვანოს თავისი ძალები უკრაინიდან, საქართველოდან და მოლდოვადან, სადაც ისინი ამ ქვეყნების თანხმობის გარეშე არიან განლაგებული. სტოლტენბერგმა აღნიშნა, რომ ნატო რუსეთთან კომპრომისზე არ წავა არცერთი ქვეყნის, მათ შორის უკრაინის, ალიანსში გაწევრიანების უფლებასთან დაკავშირებით.
სტოლტენბერგმა დასძინა, რომ პოლიტიკური მოლაპარაკებების წარმატების იმედით, ნატო ყველაზე უარესისთვის ემზადება.
ცნობისთვის, გასული წლის 17 დეკემბერს, რუსეთის საგარეო საქმეთა სამინისტრომ გამოაქვეყნა შეთანხმებათა 2 პროექტი უსაფრთხოების გარანტიების შესახებ, რომელთან დაკავშირებითაც მოსკოვს გააჩნია მოლოდინი აშშ-სა და ნატოსგან, რომ უარს იტყვიან აღმოსავლეთით ნატოს შემდგომ გაფართოებაზე.