"სახიფათოა იმის ვარაუდი, რომ “ომიკრონი“ კორონავირუსის უკანასკნელი ვარიანტია" - ტედროს გებრეისუსი
ჯანდაცვის მსოფლიო ორგანიზაციის ხელმძღვანელის, ტედროს ადანომ გებრეისუსის განცხადებით, სახიფათოა იმის ვარაუდი, რომ “ომიკრონი“ კორონავირუსის უკანასკნელი ვარიანტია და რომ მსოფლიო პანდემიის დასასრულისკენ მიემართება.
მისი თქმით, „ომიკრონ“ ვარიანტი პირველად დაახლოებით 9 კვირის წინ გამოვლინდა და მას შემდეგ დაინფიცირების 80 მილიონზე მეტი შემთხვევა დაფიქსირდა, ანუ იმაზე მეტი, ვიდრე 2020 წლის მანძილზე.
ამასთან, ჯანდაცვის მსოფლიო ორგანიზაციის ხელმძღვანელმა ხაზი გაუსვა, რომ თუკი სტრატეგიები და ინსტრუმენტები, როგორიცაა ტესტირება და ვაქცინები, ყოვლისმომცველად იქნება გამოყენებული, მიმდინარე წელს შესაძლებელია პანდემიის მწვავე ფაზიდან თავის დაღწევა.