"რადარებზე არ ჩანს ოპოზიციური ერთობა - არ იქნება ერთობა, არ იქნება ვადამდელი არჩევნები" - ნინო ბურჯანაძე
"ზოგადად, ხელისუფლების წინააღმდეგ ბრძოლა, მითუმეტეს ისეთ ქვეყნებში, როგორიც საქართველოა შესაძლებელია მხოლოდ და მხოლოდ მაშინ, როდესაც ოპოზიცია არის ერთიანი - თუ ოპოზიციას უნდა, რომ მიაღწიოს ვადამდელ არჩევნებს, ამას სჭირდება ერთობა" - ამის შესახებ "ერთიანი საქართველოს“ ლიდერმა, ნინო ბურჯანაძემ "პალიტრანიუსის“ გადაცემაში "360 გრადუსი“ განაცხადა.
მისი თქმით, მნიშვნელოვანია ოპოზიციურ სპექტრში პარტიული განსხვავება გვერდზე იქნას გადადებული.
როგორც ბურჯანაძემ აღნიშნა, დღეს ოპოზიციის ერთობა არ ჩანს და შესაბამისად, არც ვადამდელი საპარლამენტო არჩევნების დანიშვნის შესაძლებლობა არსებობს.
"ჯერჯერობით არ ჩანს რადარებზე ოპოზიციური ერთობა და შესაბამისად, არ ჩანს ის შედეგიც, რაც ამ ოპოზიციურმა ერთობამ უნდა მოიტანოს. არ იქნება ოპოზიციური ერთობა, არ იქნება ვადამდელი არჩევნები. ეს არის ორჯერ ორი ოთხი, ძალიან ნათელია ეს ჩემთვის. ოპოზიციაც სხვაგვარად უნდა იქცეოდეს დღევანდელ ვითარებაში და ხალხმაც ალბათ, სხვანაირად უნდა ამოიღოს ხმა. არ არის აუცილებელი მოგწონდეს ესა თუ ის პარტია, რომ გამოხვიდე. სოციალური პროტესტი იყოს და არა პოლიტიკური. რომ გშია, გამოდი და თქვი, რომ გშია, ყოველგვარი პოლიტიკური მოტივაციის გარეშე.
ზოგადად, ხელისუფლების წინააღმდეგ ბრძოლა, მითუმეტეს ისეთ ქვეყნებში, როგორიც საქართველოა, შესაძლებელია მხოლოდ და მხოლოდ მაშინ, როდესაც ოპოზიცია არის ერთიანი. ამიტომ, ჩემს პოზიციას ემთხვევა ბატონი სააკაშვილის პოზიციაც, რაც სწორი პოზიციაა, რადგან თუ ოპოზიციას უნდა, რომ მიაღწიოს ვადამდელ არჩევნებს ამას სჭირდება მხოლოდ ერთობა. გვერდზე გადაიდოს ყველანაირი განსხვავებები და ვადამდელი არჩევნები იქნას მოპოვებული“, - განაცხადა ნინო ბურჯანაძემ.