"კოვიდი გადაიტანა და...“ - როგორია ნიკოლოზ ბასილაშვილის ჯანმრთელობის მდგომარეობა, რომელმაც რამდენიმე დღის წინ თამაში სუნთქვის გართულების გამო შეწყვიტა

მსოფლიოში ცნობილ და ყველზე წარმატებულ ქართველ ჩოგბურთელს, ნიკოლოზ ბასილაშვილს სიდნეიში, ATP თასის მატჩის ნაადრევად დასრულება მოუწია.

სპორტსმენს სუნთქვის გაძნელება აღენიშნებოდა და ამის გამო, ნიკოლოზ ბასილაშვილისა და ბერძენი ჩოგბურთელის, სტეფანოს ციციპასის თამაში შეჩერდა.

• ციციპასისა და ბასილაშვილის დაპირისპირებამ მხოლოდ 26 წუთს გასტანა. ანგარიში ბერძენის სასარგებლოდ - 4:1 იყო, როდესაც ბასილაშვილმა სამედიცინო დახმარებისთვის პაუზა აიღო.

მას სუნთქვა უჭირდა. ექიმებთან კონსულტაციის შემდეგ კი მატჩი შეწყდა.

"29 წლის ჩოგბურთელმა შორიახლოს დაარტყა. შემდეგ ის ნელი ნაბიჯით გაემართა თავისი გუნდის სკამამდე და ცდილობდა ღრმად ამოესუნთქა და წყალი მიეღო. ექიმს ხელის ჟესტებით მიანიშნებდა, რომ მკერდის არეში რაღაც აწუხებდა.

ამბობდა: "ყოველი დარტყმისას სუნთქვა მიჭირსო“.

Ambebi.ge ნიკოლოზ ბასილაშვილის ოჯახს დაუკავშირდა იმის გასარკვევად, თუ როგორია ახლა მისი ჯანმრთელობს მდგომარეობა.

როგორც ჩოგბურთელის დედამ, ნატალია ნაჭყებიამ გვითხრა, ნიკამ რამდენიმე კვირის წინ კორონავირუსი გადაიტანა და პოსტკოვიდური სიმპტომები აწუხებდა. მისივე ინფორმაციით ბასილაშვილი ახლა თავს კარგად გრძნობს.

"ახლა უკეთ არის. კოვიდი გადაიტანა და პოსტკოვიდური სიმპტომები აწუხებდა“, - გვითხრა ნიკოლოზის დედამ.