,,კარგი პედაგოგი ასწავლის, თვითონაც მუდმივად სწავლობს და მუდმივ ძიებაშია“ - ინტერვიუ კახეთის რეგიონის დაწყებითი საფეხურის კითხვის საუკეთესო მასწავლებელთან
თავად ამბობს, რომ ადამიანების სითბოს შემგროვებელია. უკვე 30 წელია ასწავლის სკოლაში და ყველა მისი გაკვეთილი დაუვიწყარი თავგადასავალია. ფიქრობს, რომ ამ წლებმა ისე გაირბინა, ვერც იგრძნო. გზას, რომელსაც სახლიდან სკოლამდე გადის, სახლიდან სახლამდე მიმავალ გზას ადარებს - აქ მისთვის ყველაფერი ნაცნობი და საყვარელია. ყველა გაკვეთილისათვის დღემდე განსაკუთრებულად ემზადება. სოფელ გომბორის საჯარო სკოლაში,,მარეხი მასწ” ყველასთვის საყვარელი მასწავლებელი და მეგობარია. ამ ტიტულსაც სიამაყითა და პასუხისმგებლობით ატარებს.
როგორია კახეთის რეგიონის საუკეთესო მასწავლებლის რჩევა დამწყები პედაგოგებისათვის და რა არის მისთვის პედაგოგობის მთავარი საზომი. პროფესია, რომელიც პროფესიაზე მეტია - მარეხი დიდებაშვილის ისტორია.
რატომ გადაწყვიტეთ გამხდარიყავით მასწავლებელი და როგორ დაიწყო თქვენი პედაგოგიური ბიოგრაფია?
დედისერთა ვარ და სულ მენატრებოდა ბავშვები. სკოლაში რომ მიმიყვანეს, ისე მომეწონა, აღარ მოვყვებოდი სახლში. სკოლის და ბავშვების გარეშე უკვე არ შემეძლო. მშობლები მუშაობდნენ და მარტო რომ არ ვყოფილიყავი, ბავშვები მომყავდა სახლში. ერთად ვამზადებით გაკვეთილებს, ვხატავდით, ვთამაშობდით... სკოლა და ბავშვები - ეს ის გარემო იყო, სადაც ყველაზე კარგად ვგრძნობდი თავს და პროფესიის არჩევა არ გამჭირვებია.
გაიხსენეთ თქვენი პირველი გაკვეთილი, რა იყო თქვენი პირველი ემოცია?
პირველი გაკვეთილის სირთულე ისევ ბავშვებმა დამაძლევინეს. მესამე კლასში მქონდა პირველი გაკვეთილი და ისე თბილად შემხვდნენ, დღესაც მახსოვს მათი სიყვარულით ანთებული თვალები.
თქვენი ყოფილი მოსწავლეები ამბობენ, რომ ყველაზე რთული წლები თქვენმა გაკვეთილმა გადაატანინა. ფეხით მოდიოდნენ სხვა სოფლიდან, რომ სკოლა არ გაეცდინათ. თქვენ როგორ გაიხსენებდით იმ პერიოდს?
- მართლა მძიმე პერიოდი იყო 90-იანი წლები, ბავშვებს სკოლაში მოსასვლელად 3-4 კილომეტრის ფეხით გამოვლა უწევდათ. წვიმისა და თოვლის დროს ისეთი სველები მოდიოდნენ, რომ ღუმელის გარშემო ვატარებდი გაკვეთილს, თან ტანსაცმელს და ფეხსაცმელს ვაშრობდი. 8 მოსწავლე მყავდა და დედა ყოველდღე მატანდა საჭმელს მათთვის. სასწავლო ნივთებსაც ხშირად ვყიდულობდი. პატარები უფროს კლასელებს ელოდებოდნენ, რომ შორი გზა უკან ერთად გაევლოთ. მეც მათთან ვრჩებოდი და კლასგარეშე წიგნებს ვკითხულობდით. ვუმსუბუქებდით ერთმანეთს მძიმე წლებს.
როგორია თქვენი და თქვენი ყოფილი მოსწავლეების შეხვედრა?
საოცარი განცდა მეუფლება ყოველთვის, იმდენი სითბო და სიყვარული იღვრება მათი თვალებიდან. მე მათი სიყვარული მაძლიერებს და მაძლევს სტიმულს.
რას ნიშნავს იყო კარგი პედაგოგი?
- კარგი პედაგოგი ასწავლის, თვითონაც მუდმივად სწავლობს და მუდმივ ძიებაშია.
გვითხარით, რა არის მთავარი კარგი გაკვეთილის ჩასატარებლად?
- მრავალფეროვანი და სახალისო აქტივობები.
მთავარი სტიმული?
- ჩემი საქმის უზომო სიყვარული.
თქვენ ბრძანდებით კახეთის რეგიონის დაწყებითი განათლების საუკეთესო მასწავლებელი ქართულ ენასა და ლიტერატურაში. რატომ გადაწყვიტეთ ამ კონკურსში მონაწილეობის მიღება?
-ჩვენი სკოლა ჩართული იყო ახალი სკოლის მოდელის მხარდამჭერ პროექტში. მე ვიყავი ლიდერი მასწავლებელი ქართულის მიმართულებით. ქალბატონი მიმოზა ტყებუჩევა (89-ე სკოლის დირექტორი და ი. ჯავახიშვილის უნივერსტეტის პროფესორი) უძღვებოდა ჩვენს ტრენინგებს. მან ნახა ჩემი მუშაობა და მომცა სტიმული მონაწილეობა მიმეღო ამ კონკურსში, შედეგი მოულოდნელი და სასიხარულო იყო.
პანდემია და მასწავლებელი - რა რეალობის წინაშე დაგაყენათ პანდემიამ?
პანდემიამ დიდი გამოწვევების წინაშე დაგვაყენა. განსაკუთრებით რთული იყო შარშანდელი წელი, ყველას არ ჰქონდა წვდომა ინტერნეტზე, თიმსის პლატფორმაც უცხო იყო მშობლისთვისაც და ბავშვისთვისაც, თუმცა თანდათან ყველაფერი მოგვარდა და გაგვიადვილდა მუშაობა.
რას მიიჩნევთ თქვენს მთავარ გამოწვევად და ასევე ყველაზე დიდ მიღწევად?
სწავლისადმი სწორი დამოკიდებულებების ჩაამოყალიბება და მოსწავლეთა მოტივაციის ამაღლება სახალისო აქტივობებით. წერა-კითხვის შესწავლასთან ერთად აუცილებელია აკადემიურ უნარებზე მუშაობა, რომლებიც ქმნიან ბაზისს, რაზეც დაშენდება სხვა, უფრო კომპლექსური უნარები. ჩვენი სკოლის კონტიგენტის 48% აზერბაიჯანელია. შესაბამისად გვაქვს ენობრივი ბარიერი. ზღაპრებით, მოთხრობებით, ლექსებითა და შემოქმედებითი აზროვნებით ვცდილობ გავამრავალფეროვნო მათი ლექსიკონი. ამ მიზნით დავაარსეთ ლიტერატურული სალონი „ჩვენ“. აქ ვაწყობთ წიგნების ერთობლივ კითხვას, ვმსჯელობთ, ვდგამთ სასკოლო სპექტაკლებს, ვაკეთებთ ჩანახატებს.
რას ურჩევდით დამწყებ პედაგოგებს?
ისაგზლონ ბავშვების სიყვარული და ყველაფერი გამოუვათ.
USAID-ის საბაზისო განათლების პროგრამამ მასწავლებელთა აღიარების რეგიონული კონკურსი 2021 წელს პირველად ჩაატარა. გუდავაძე-პატარკაციშვილის ფონდმა კონკურსი სამ რეგიონში დააფინანსა. ამ კონკურსის მთავარი მიზანი კითხვისა და მათემატიკის საუკეთესო მასწავლებლების გამოვლენა და მასწავლებლის პროფესიის პოპულარიზაცია იყო.
<iframe src="https://www.facebook.com/plugins/video.php?height=314&href=https%3A%2F%2Fwww.facebook.com%2FUSAIDEDU%2Fvideos%2F922347715003799%2F&show_text=false&width=560&t=0" width="560" height="314" style="border:none;overflow:hidden" scrolling="no" frameborder="0" allowfullscreen="true" allow="autoplay; clipboard-write; encrypted-media; picture-in-picture; web-share" allowFullScreen="true"></iframe>
NS