ვინ არის საბერძნეთში მოკლული 41 წლის ქართველი - "მკვლელმა თევდორაძეს საკონტროლო ტყვია 5 წლის შვილის თვალწინ ესროლა"
საბერძნეთში, ახალი წლის ღამეს, ცოლ-შვილის თვალწინ, 41 წლის შოთა თევდორაძე ("„შოთიკო“) ჩაცხრილეს. ცნობილი გახდა, რომ მოკლული მამაკაცი ე.წ. კრიმინალური სამყაროს წარმომადგენელი იყო. ბერძნული მედია მას რუსული მაფიის წევრად მოიხსენიებს, მკვლელობის მოტივად კი "ქურდული გავლენების" განაწილებას განიხილავს.
მკვლელობაში ეჭვმიტანილებს საბრძნეთის პოლიცია მთელი ქვეყნის მასშტაბით ეძებს.
მოკლულის ცხედარს მის მშობლიურ ქალაქში - ქუთაისში რამდენიმე დღეში გადაასვენებენ.
სააგენტო "პრაიმ კრაიმის" ცნობით, მკვლელობა ათენში, 2 იანვარს, გვიან ღამით მოხდა. "2 იანვარს, ათენში, დაახლოებით ღამის პირველ საათზე, ქუთაისელი ქურდული დიასპორის ერთ-ერთი ლიდერი, 41 წლის შოთა თევდორაძე საკუთარ სახლთან, ცეცხლსასროლი იარაღით მოკლეს. მკვლელმა თევდორაძეს საკონტროლო ტყვია 5 წლის შვილის თვალწინ ესროლა", - ვკითხულობთ გამოქვეყნებულ ინფორმაციაში.
არ გამორიცხავენ, რომ ეს ანგარიშსწორება 2 წლის წინანდელ ამბავს უკავშირდებოდეს, როდესაც კრიმინალური სამყაროს ძველი და ახალი თაობის წარმომადგენლები ერთმანეთს გეგა მოდებაძის ქურდულ სტატუსთან დაკავშირებით დაუპირისპირდნენ. კერძოდ, შოთა თევდორაძეს 63 წლის თბილისელი "კანონიერი ქურდი" ვაჟა ბიგანიშვილი ("ვაჟა თბილისსკი") დაუპირისპირდა.
ორ კრიმინალს შორის დაპირისპირება მაშინ დაიწყო, როცა 2015 წელს, ქუთაისური კლანის წარმომადგენლებმა, მათ შორის კი თევდორაძემ, ბიგანიშვილის ე.წ. ნათლული გეგა მოდებაძე "კანონიერ ქურდად" არ აღიარეს, მეტიც, სასტიკად სცემეს, რაშიც სწორედ თევდორაძეს ადანაშაულებდნენ. რამდენიმე წლის შემდეგ, "კრიმინალური ავტორიტეტის" დათო სებისკვერაძის ხელმძღვანელობით ჩატარებულ "სხოდკაზე", სადაც ნაცემი გეგა მოდებაძის ამბავი წყდებოდა, ვაჟა ბიგანიშვილი არ დაეთანხმა გადაწყვეტილებას და დატოვა შეკრება. ბიგანიშვილი და მისი მომხრეები მიიჩნევდნენ, რომ "შოთიკო" "არაქურდულად" მოიქცა და მასთან შერიგება შეუძლებელი იყო.
ამ კონფლიქტის შედეგად, ვაჟა ბიგანიშვილმა, რომელიც "ქურდულ სამყაროში" საკმაოდ გავლენიან და დამოუკიდებელი გადაწყვეტილებების მიმღებ პირად მიიჩენვა, რამდენიმე "კანონიერი ქურდის" ღირსება ეჭვქვეშ დააყენა, მათ შორის იყვნენ შოთა თევდორაძე, "კვატია", "ნიჟარაძე", ზაზა ამბროლაძე და ლაშა ჯოლოღუა.
შოთა თევდორაძე 1980 წლის 27 ოქტომბერს ქალაქ ქუთაისში დაიბადა, "კანონიერ ქურდად" 2000 წელს, 20 წლის ასაკში აკურთხეს. თევდორაძე პირველად 2003 წელს ხულიგნობის გამო დააკავეს, ქუთაისის სასამართლომ 1, 6 წელი მიუსაჯა, რომელიც რუსთავის კოლონიაში მოიხადა. 2005 წელს, ციხიდან გამოსვლის შემდეგ, მან რუსეთს შეაფარა თავი, სადაც სასჯელი რამდენჯერმე მოიხადა.