"შოკი იყო... ზედიზედ სამჯერ მოვისმინეთ და მაინც არ მჯეროდა... მერე დაიწყო ჩემთვის ძალიან რთული პერიოდი" - სანდრა რულოვსი სააკაშვილისა და ლიზა იასკოს ურთიერთობაზე
საქართველოს ყოფილმა პირველმა ლედიმ, სანდრა რულოვსმა, გიორგი თარგამაძის საავტორო გადაცემა "დროებაში" დეტალურად ისაუბრა იმ განცდებზე, რაც მას მიხეილ სააკაშვილისა და ლიზა იასკოს ერთობლივი ვიდეოს ნახვის შემდეგ დაეუფლა. სანდრა რულოვსის თქმით, ყოფილი მეუღლისა და იასკოს ურთიერთობა მისთვის "სიურპირიზი" იყო და ამის შესახებ უმცროსი შვილისგან შეიტყო. როგორც სანდრა რულოვსი ჰყვება, მას რთული ფსიქოლოგიური ეპიზოდების გავლა მოუწია იმისთვის, რომ სააკაშვილისა და ლიზა იასკოს ურთიერთობის ფაქტის საბოლოოდ მიღება შეძლებოდა.
"ზუსტად იმ დროს, როცა დადასტურდა, რომ მიშა აიყვანეს და ვნახეთ მისი მომღიმარი ფოტოები რუსთავის ციხიდან, გავრცელდა სხვა ვიდეოც... ამის შესახებ გავიგე ნიკოლოზისგან. მან ტელეფონში მაჩვენა და ერთად ვუყურეთ ამ ვიდეოს. ეს იყო შოკი ნიკოლოზისა და ჩემთვის! ზედიზედ სამჯერ მოვისმინეთ და მაინც არ მჯეროდა. ფსიქოლოგიაში ამას უარყოფის ფაზას უწოდებენ. ეს არის თავდაცვის მექანიზმი, როდესაც ვერ უყურებ რეალობას თავლებში, რადგან არის დარტყმა.
პირველი ფაზა იყო უარყოფა - არა არსებობს, ალბათ ეს არ არის ნამდვილი. მაგრამ შემდეგ დავრწმუნდი, რომ ეს მართლა მიშა იყო, აშკარად ემშვიდობებოდა წარსულს, მადლობები მიხადა... მივხვდი, რომ მომიწევდა ამის აღიარება. ფორმა, მთელი ქვეყნის წინაშე, მიუღებელი იყო. არც დროული იყო, რადგან ყველა მიშას დაკავებაზე, გამბედაობაზე იყო გადართული და უცებ პირად სფეროში ვიდეო გამოჩნდა. ძალიან ბევრი რეაქცია და საუბარი მოჰყვა ამ ფაქტს. ერთი ასეთი კომენტარი იყო სოციალურ ქსელში: "ბატონო პრეზიდენტო, ახლა შეიძლება დავიძინო?!" , იმდენად ბევრი ახალი ინფორმაცია ვრცელდებოდა მიშას შესახებ.
მერე დაიწყო ჩემთვის ძალიან რთული პერიოდი... აღარ მინდოდა ახალი ამბების ყურება, რადგან ძალიან ბევრი რეაქცია იყო პირადი ცხოვრების შესახებ ვიდეოზე.
ეს იყო უკვე მეორე ფაზა - დაცვითი მექანიზმი, რომელიც გიბიძგებს, რეალობას არ შეხედო თვალებში. ეს არის იზოლაცია. მე კი ვიგებდი რაც ხდებოდა, ედუარდის საშულებით, მაგრამ მხოლოდ მშრალ ფაქტებს მაწვდიდა. არ მინდოდა დეტალურად გამეგო ამბები, რადგან მტკივნეული იყო.
მესამე ფაზა ,დაცვითი მექანიზმი, იყო პროექცია - ეს მიშას ბრალი არ არის, ეს სხვისი ბრალია, ვიღაცამ აიძულა. ვცდილობდი, რომ აგრესიის ობიექტი არ ყოფილიყო მიშა.
მოკლედ ეს სამი რეაქცია მქონდა მოკლე დროში და საერთოდ, ეს ჯანსაღი ადამიანის ჩვეულებრივი, ბუნებრივი რეაქციაა, თუმცა ეს ძალიან დიდხანს არ უნდა გაგრძელდეს" - თქვა სანდრა რულოვსმა "ფორმულას" ეთრეში.