"ეკატერინე ტიკარაძის გადადგომა "კარის ინტრიგების" შედეგია" - ვახტანგ კალოიანი
"პოლიტიკურ ინტრიგებში იხლართება ეს საკითხი და არ ღებულობს სერიოზულობას განსჯის თვალსაზრისით - ეს არის "კარის ინტრიგების“ შედეგი და არა რაიმე მოლოდინი, რომ ჯანდაცვის პოლიტიკაში რაიმე სასიკეთოდ შეიცვლება" - ამის შესახებ კრიტიკული მედიცინის დეპარტამენტის ხელმძღვანელმა, "ევროპული საქართველოს“ წევრმა ვახტანგ კალოიანმა "პალიტრანიუსის“ გადაცემაში "360 გრადუსი“ განაცხადა, რითაც ჯანდაცვის მინისტრის, ეკატერინე ტიკარაძის გადადგომას გამოეხმაურა.
მისი შეფასებით, მინისტრის გადადგომა ჯანდაცვის პოლიტიკას არ უკავშირდება.
"რასაც ცალასახად არ უკავშირება ჯანდაცვის მინისტრის გადადგომა - ეს არის ჯანდაცვის პოლიტიკა, ეს არის ჯანდაცვის სტრატეგია, ეს არის ის პრობლემები, რაც ჩვენ გვაქვს, ეს არ არის კონცეპტუალური გადადგომა. ეს უფრო "კარის თამაშების“ გადადგომაა, ვიდრე კონცეპტუალური განსხვავება მთავრობის თავმჯდომარეს და ჯანდაცვის მინისტრს შორის.
ყველაზე ცუდი არის ის, რომ ამ გადადგომამაც კი არ გამოიწვია საზოგადოებაში კონცეპტუალური განხილვა - რა გვჭირს ჯანდაცვაში, რა ინდიკატორებით დავიწყეთ ჩვენ ტიკარაძის მინისტრობა, რა ინდიკატორებით და რა შედეგებით ვამთავრებთ, რა გვაქვს შემდგომი სტრატეგია და შესაბამისად, ისევ პოლიტიკურ ინტრიგებში იხლართება ეს საკითხი და არ ღებულობს სერიოზულობას განსჯის თვალსაზრისით. ეს არის "კარის ინტრიგების“ შედეგი და არა რაიმე მოლოდინი, რომ ჯანდაცვის პოლიტიკაში რაიმე სასიკეთოდ შეიცვლება“, - განაცხადა კალოიანმა.