"კახა მოკლეს ამათ" - რა განაცხადა მიხეილ სააკაშვილმა ეკონომიკის ყოფილი მინისტრის გარდაცვალებაზე?
ექსპრეზიდეტმა მიხეილ სააკაშვილმა სასამართლო პროცესზე ისაუბრა ეკონომიკის ყოფილ მინისტრ კახა ბენდუქიძის გარდაცვალებაზე და განაცხადა:
"ყველას გესმით, რომ ეს ბრალდებები არის ისეთი შეთითხნილი, რომ იმის იქით არაფერი არსებობს. მე კარგად მესმის კახა ბენდუქიძის, რომელსაც შევხვდი მის სიკვდილამდე 2 დღით ადრე ბრიუსელში და რომელიც ძალიან ნერვიულობდა, რადგან მასზე აღძრული იყო სისხლის სამართლის საქმე, საკუთარ უნივერსიტეტში თანხის გაფლანგვაზე.
კახა მოკლეს ამათ, კახა ბენდუქიძეს, გენიალურ ქართველ რეფორმატორს, ნიშნავდნენ უკრაინის ეკონომიკის მინისტრად და ვიცე-პრემიერად, ამისთვის ჩავედი, რომ ეს მეთქვა. მისი სიკვდილი გავიგე მაშინ, როდესაც მივედი აეროპორტში და აღარ ჩამოვიდა, ვურეკავდი და არ იღებდა. მერე გავიდა ნიუსებში, - კახა ბენდუქიძე აღარ არის... თან ეუბნებოდნენ პატარა საკანში იქნები, არაფრის უფლება არ გექნება, იქნები ისეთ დიეტაზე, კუჭი გაგისკდება... რაღაც საოცრებებს უყვებოდნენ. კარგად ვიცი, სად იხარშება ეს სიბინძურეები, რომელ შუშის სასახლეებში... არ დაგვავიწყდეს კახა ბენდუქიძის მკვლელობა, მე ვიცი კარგად, რატომ წავიდა კახა ამ ცხოვრებიდან".
ცოდნის ფონდის დამფუძნებელი, თავისუფალი და აგრარული უნივერსიტეტების სამეთვალყურეო საბჭოს თავმჯდომარე, ეკონომიკის ყოფილი მინისტრი კახა ბენდუქიძე 2014 წელს, 58 წლის ასაკში, ლონდონში გარდაიცვალა. მან გულის ოპერაცია გაიკეთა და გარდაცვალების სავარაუდო მიზეზიც სწორედ გულის უკმარისობა გახდა.