"თუ ბავშვს მასწავლებელი უყვარს, საგანიც უყვარდება და შესაბამისად, სწავლაც უადვილდება“ -  ინტერვიუ იმერეთის რეგიონის საუკეთესო მასწავლებელთან მათემატიკაში

USAID-ის საბაზისო განათლების პროგრამის ეგიდით, მიმდინარე წელს, წიგნიერებისა და მათემატიკის მიმართულებით „მასწავლებელთა აღიარების რეგიონული კონკურსი“ ჩატარდა. პირველი სამი რეგიონის – კახეთის, შიდა ქართლისა და იმერეთის საუკეთესო მასწავლებლების გამოსავლენად პროგრამას ფინანსური მხარდაჭერა გუდავაძე-პატარკაციშვილის ფონდმა გაუწია. საქართველოში მოქმედი USAID-ის საბაზისო განათლების პროგრამის მთავარი მიზანი სწორედ საგანმანათლებლო რეფორმების მხარდაჭერა და დაწყებით საფეხურზე მოსწავლეთა მიღწევების გაუმჯობესების ხელშეწყობაა. დღეს, განათლების სპეციალისტები და თავად კონკურსის მონაწილეები უკვე აღნიშნავენ, რომ „მასწავლებელთა აღიარების რეგიონულმა კონკურსმა“ მასწავლებლების პროფესიის პოპულარიზაციასა და ამ პროფესიის მნიშვნელობის გააზრებას კიდევ უფრო მეტად შეუწყო ხელი. ამჯერად გაგაცნობთ იმერეთის რეგიონის მათემატიკის საუკეთესო მასწავლებელს ქ. ხონის N3 საჯარო სკოლიდან.

რას თვლის სწავლების პროცესში ყველაზე მნიშვნელოვნად და ელოდა თუ არა მასწავლებელთა აღიარების კონკურსში იმერეთის რეგიონის საუკეთესო მასწავლებლის წოდების მოპოვებას - შორენა ქავზინაძეს ისტორია.

რატომ გადაწყვიტეთ მიგეღოთ მონაწილეობა მასწავლებელთა აღიარების კონკურსში?

ყოველთვის მთელი ჩემი მუშაობის პრაქტიკაში ვაკეთებდი სხვადასხვა მრავალფეროვან პროექტებს, ღონისძიებებს. შარშან, მიუხედავად პანდემიისა და ონლაინ სწავლებისაა, საკმაოდ ბევრი პროექტი თუ აქტივობა განვახორციელე. დირექტორს ყოველთვის ვაცნობდი ამ აქტივობების შესახებ, რადგან ბავშვებს ძალიან მოსწონთ თავიანთი ნამუშევრების სხვებისთვის ჩვენება, მით უმეტეს დირექტორისთვის.

დირექტორმა დამიბარა და მითხრა, მომეყარა ყველაფრისთვის თავი და მიმეღო მონაწილეობა კონკურსში. ეს ჩემი ყოველდღიურობაა და საკონკურსოს ვერაფერს ვხედავ მეთქი, მაგრამ მოძებნე სურათები და აუცილებლად მიიღე მონაწილეობაო... ვეღარ ვუთხარი უარი. ნამდვილად არ მეგონა თუ გავიმარჯვებდი. ის, რაც წარვადგინე, ჩემი ყოველწლიური ნამუშევრებიდან ერთ-ერთი იყო. დიდი მადლობა ყველას, ვინც ჩემი და ჩემი მოსწავლეების ნამუშევრები ობიექტურად შეაფასა, დაინახა ჩემი საქმისადმი და ბავშვებისადმი დამოკიდებულება და სიყვარული.

რამ იმოქმედა თქვენს გადაწყვეტილებაზე, რომ გამხდარიყავით პედაგოგი?

მე გავიზარდე ხონის რაიონის სოფელ ქუტირში. დედა მასწავლებელი იყო. სულ ვხედავდი მის საყვარელ საქმეს როგორი კრძალვით, სიყვარულით და პატივისცემით ემსახურებოდა. შესაბამისად, მთელი სოფელი პატივს სცემდა. დედა ჩემთვის იდეალი იყო ყოველთვის და არის დღესაც. ჩემი არჩევანი თავისთავად მოხდა და ყველაფერი გადმოვიდა თითქოს ტრადიციულად, მთელი თავისი პასუხისმგებლობით, სიყვარულითა და ცოდნით.

რას ნიშნავს იყო მასწავლებელი?

მასწავლებლობა ჩემთვის ყველაფერია, მე მიყვარს ჩემი საქმე, ვცდილობ ყველა გაკვეთილიდან ცოდნა თუ არა, რაღაც ერთი სიტყვა მაინც გაიტანონ მოსწავლეებმა. ვცდილობ, დავანახო ჩემი თანადგომა, სიყვარული, ზრუნვა, რათა ამ რთულ ცხოვრებაში თავიანთი სათქმელი ცოტათი უფრო მტკიცედ და თამამად თქვან.

ორიოდე თვის წინ შემხვდა ჩემი პირველი მოსწავლე, მარიამი, რომელიც თბილისში ცხოვრობს და მუშაობს. დიდი მადლობა გადამიხადა: პროფესია თქვენი და თქვენი საგნის სიყვარულით ავირჩიეო, მაგრამ ყველაზე დიდი მადლობა, რომ თქვენგან ადამიანობა ვისწავლე, რომელიც დღემდე მომყვებაო. კლასელები რომ ვიკრიბებით, პირველი თქვენით ვიწყებთ და ყოველთვის აღვნიშნავთ თქვენს დამოკიდებულებას ჩვენდამიო. არადა, ამ კლასს 23 წლის წინ ვასწავლიდი...

თქვენ სულ ამბობთ, რომ სწავლობთ ბავშვებისგან - რას გულისხმობთ?

ვცდილობ, მათგან ვისწავლო რა და როგორ ვასწავლო. ისეთ კარგ და ლამაზ აზრებს მაწოდებენ, მიკვირს მე როგორ ვერ მოვიფიქრე თქო. ვცდილობ, მათ იდეებს ხორც შევასხა და უფრო საინტერესო გავხადო გაკვეთილი. ძალიან დიდ მნიშვნელობას ვანიჭებ რესურსებს, პროექტებს, კომპლექსურ დავალებებს. ეს საკმაოდ მოსწონთ და უფრო მოტივირებულები არიან. ერთი აქტივობა არ გვაქვს დამთავრებული, მეორეს მთხოვენ.

როგორ უნდა შეაყვაროს მასწავლებელმა მოსწავლეს კონკრეტული საგანი, თქვენს შემთხვევაში მათემატიკა?

თუ ბავშვს მასწავლებელი უყვარს, საგანიც უყვარდება და შესაბამისად, სწავლაც უადვილდება, ამიტომ დიდ როლს ვანიჭებ ურთიერთობებს, ვცდილობ ვიყო სამართლიანიც, მომთხოვნიც, მკაცრიც. ვცდილობ რაც შეიძლება ფრთხილად, ცოტ-ცოტათი შევაპარო „რთული“ მათემატიკა.

რა ეტყოდით მას, ვინც გეგმავს მომავალში თქვენი კოლეგა, პედაგოგი გახდეს?

იმას, ვისაც სურვილი აქვს დაიწყოს პედაგოგიური მოღვაწეობა, ვეტყვი, რომ წარმატების პირამიდა, წარუმატებლობის აგურებისგან არის აშენებული. ძალიან ბევრი უნდა იშრომო და შედეგიც ყოველთვის დაიდება.

NS