"არ გამოვრიცხავ, რომ სააკაშვილს შეცდომები ჰქონდა, მაგრამ ეს უნდა დაადასტუროს არა თადუმაძის სასამართლომ, არამედ თავისუფალმა სასამართლომ" - პაატა მანჯგალაძე
"არ გამოვრიცხავ, რომ შეცდომები იყო, მაგრამ ეს უნდა დაადასტუროს არა თადუმაძის სასამართლომ, რომელიც ივანიშვილის ადვოკატი იყო, მერე პროკურორი გახდა და მერე მოსამართლე, არამედ თავისუფალმა სასამართლომ" - ამის შესახებ "სტრატეგია აღმაშენებლის“ დეპუტატმა პაატა მანჯგალაძემ განაცხადა.
როგორც მან აღნიშნა, სააკაშვილი პოლიტიკური პატიმარია, რადგან მართლმსაჯულების ინტერესს წინ უსწრებს პოლიტიკური ინტერესი.
"ბრალდებები საფუძვლიანიც რომ იყოს მის მიმართ, ვიდრე ქვეყანაში არ არსებობს სამართლიანი სასამართლო, ყველა ბრალდება პოლიტიკურად მოტივირებული იქნება, რადგან მართლმსაჯულების ინტერესს უსწრებს პოლიტიკური ინტერესი და ეს სახეზეა. ჩვენ ვიცით, "ქართული ოცნების“ პრემიერ-მინისტრების განცხადებები, რომ თუ ჭკუით არ იქნება ოპოზიცია, რიგებს დააყენებდნენ სასამართლოსთან. მე არ გამოვრიცხავ, რაიმე შეცდომა არსებობდეს, მაგრამ ეს უნდა დაადასტუროს არა თადუმაძის სასამართლომ, რომელიც ადვოკატი იყო ჯერ ივანიშვილის, მერე პროკურორი გახდა და მერე მოსამართლე, თავისუფალმა სასამართლომ უნდა დაადასტუროს. 7 ნოემბერს შეიძლება ყოფილიყო სამართლებრივი გადაცდომაც, მაგრამ ეს უნდა დაადასტუროს არა პოლიტიკურად მოტივირებულმა ჯგუფმა, ერთი ჯგუფის მეორეზე ანგარიშსწორების ნიადაგზე, არამედ მართლა თავისუფალმა და სამართლიანმა სასამართლომ. იმ რეალობიდან, როცა მთელი საერთაშორისო საზოგადოება და საქართველოს საზოგადოება შეთანხმებულია, რომ არ არსებობს სამართლიანი სასამართლო ქვეყანაში, დასაბუთებული, საფუძვლიანი ბრალდების პირობებშიც კი ადამიანი არის პოლიტიკური მოტივაციით დაპატიმრებული, რადგან მართლმსაჯულების ინტერესს წინ უსწრებს პოლიტიკური ანგარიშსწორების ინტერესი,“ - განაცხადა მანჯგალაძემ.