"აქ ქალებს კლავენ.. ამას არ შევეგუებით" - თურქეთში, ქალთა ძალადობის წინააღმდეგ გამართულ აქციაზე  სპეცრაზმმა ცრემლსადენი გაზი გამოიყენა (ფოტოები)

თურქეთის ქალაქ სტამბოლში ქალთა ძალადობის წინააღმდეგ გამართული საპროტესტო აქციის დასაშლელად სპეცრაზმმა ცრემლსადენი გაზი გამოიყენა.

ქალაქის ცენტრალურ, თაქსიმის მოედნისკენ მსვლელობა ათასობით ადამიანმა, უმეტესად ქალებმა მოაწყვეს. ისინი თურქეთში, გენდერული ძალადობის წინააღმდეგ სასწრაფო ზომების მიღებას მოითხოვდნენ.

დემონსტრანტების ნაწილი სკანდირებდა: "გადადგეს მთავრობა“. ადგილობრივი მედიის ცნობით, ზოგიერთმა დემონსტრანტმა პოლიციელებს ქვები და ბოთლები ესროლა. თურქეთის პოლიციის ცნობით, დაშავდა 17 ადამიანი და მათ შორის, 10 ქალი პოლიციელი.

"ამ ქვეყანაში ქალებს საჯაროდ კლავენ. ჩვენ ამას არ მივიღებთ, არ შევეგუებით და ბრძოლას გავაგრძელებთ. ", - უთხრა ერთ-ერთმა დემონტრანტმა სააგენტო "როიტერსის" კორესპონდენტს.

თურქეთის უფლებადამცველთა ორგანიზაციის მონაცემებით, მიმდინარე წელს ქვეყანაში 345 ქალი მოკლეს.

მიმდინარე წლის ივლისში თურქეთის მთავრობამ სტამბოლის კონვენცია დატოვა, რომელიც ქალების მიმართ ძალადობის წინააღმდეგაა მიმართული. ამ გადაწყვეტილებამ დასავლეთის მწვავე კრიტიკა გამოიწვია. თურქეთის პრეზიდენტმა, რეჯეფ თაიფ ერდოღანმა განაცხადა, რომ ქვეყანა, ქალთა უფლებების დასაცავად, ადგილობრივ კანონებს გამოიყენებს.