"ქოცებო", არასოდეს გაპატიებთ, რომ ჩემი ქვეყნის სიმბოლოს იატაკზე ნახევრად შიშველს ახოხიალებთ და ამას აქვეყნებთ!" - მამუკა ღლონტი
ტელეპროდიუსერი მამუკა ღლონტი მიხეილ სააკაშვილთან დაკავშირებით გამოქვეყნებული კადრების გამო ხელისუფლებას აკრიტიკებს.
როგორც ღლონტი "ფეისბუქზე" წერს, პრეზიდენტი ქვეყნის სიმბოლოა და მისი "იატაკზე ნახევრად შიშველი ხოხიალით" მმართველი გუნდი კარგს ვერაფერს მიაღწევს.
"რუსეთში ვსწავლობდი არქიტექტურის ინსტიტუტში, ხოდა მომრჩა იქაური სტუდენტობის მეგობრები, ერთხელ ერთმა მიშაზე ცუდი რაღაცეები მომწერა (იმ პერიოდში როცა მიშა და მისი რეჟიმი ყველაზე მეტად მდევნიდა) ხოდა დავახურე თავზე იმ ჩემს მეგობარს, იმიტომ რომ მან ჩემი ქვეყნის სიმბოლო პრეზიდენტი (კარგია თუ ცუდი) აუგად მოიხსენია.
ჩემთვის ჯერ სამშობლოა შემდეგ ყველაფერი, მათ შორის მეგობრობაც. იმასაც შეგახსენებთ რამდენი ვიბრძოლე მიშას რეჟიმის დასანგრევად და ამით ყოველთვის ვიამაყებ!
აქვე გეტყვით რომ "ნაცების" გამოსწორების არ მჯერა! ახლა კი რატომ ვწერე ამდენი: "ქოცებო" ჩემი ქვეყნის სიმბოლოს იატაკზე ნახევრად შიშველს რომ ახოხიალებთ და ამას აქვეყნებთ, თქვენ გგონიათ ვინმე როდესმე გაპატიებთ? მე არა, არასდროს!" - წერს ღლონტი.
ცნობისთვის, სპეციალური პენიტენციური სამსახური მიხეილ სააკაშვილის გლდანის ციხის სამკურნალო დაწესებულებაში გადაყვანის კადრებს ასაჯაროებს. კადრებში ჩანს, რომ მიხეილ სააკაშვილი უარს აცხადებს სასწრაფო დახმარების მანქანიდან გადმოსვლაზე, რის შემდეგაც ის რეანიმობილიდან იძულებით გადმოჰყავთ.
კადრების მიხედვით, მიხეილ სააკაშვილს ციხის ადმინისტრაციის თანამშრომლები ხელებსა და ფეხებში ჰკიდებენ ხელს და სასწრაფოს მანქანიდან ციხის სამკურნალო დაწესებულების პალატამდე ამ მდგომარეობაში გადაჰყავთ. ვიდეოში ჩანს, რომ მიხეილ სააკაშვილი ტანს ზემოთ შიშველია.