"იმედი მაქვს, ნაფიცი მსაჯულები სამართლიან გადაწყვეტილებას მიიღებენ" - გუდაურში მომხდარი მკვლელობის საქმეს სასამართლო ამ წუთებში განიხილავს

გუდაურში მომხდარი მკვლელობისა და მკვლელობის მცდელობის საქმეზე ბრალდებულ მერაბ კობიაშვილის საქმეს ნაფიც მსაჯულთა სასამართლო ამ წუთებში განიხილავს.

გორის რაიონულ სასამართლოში ბრალდების მხარის მოწმეებს დაკითხავენ. კერძოდ, ჩვენებას გარდაცვლილის მეგობრები და კონფლიქტში მონაწილე პირები მისცემენ.

როგორც მკვლელობაში ბრალდებულმა მერაბ კობიაშვილმა "ინტერპრესნიუსს" განუცხადა, მისი შეფასებით, ნაფიც მსაჯულთა სასამართლომ გამამართლებელი ვერდიქტი უნდა გამოიტანოს.

"ძალიან დიდი იმედი მაქვს, რომ ნაფიცი მსაჯულები სამართლიან გადაწყვეტილებას მიიღებენ. მხოლოდ და მხოლოდ ამას ველოდები. მტკიცებულებები, ვიდეოჩანაწერები არის და ამ ყველაფრის გათვალისწინებით, დიდი იმედი მაქვს, რომ სამართლიან გადაწყვეტილებას და გამამართლებელ ვერდიქტს გამოიტანენ", - განაცხადა კობიაშვილმა.

შეგახსენებთ, რომ 2020 წლის 16 თებერვალს, გუდაურში ახალგაზრდა მამაკაცი მოკლეს, ერთი კი დაჭრეს. აღნიშნულთან დაკავშირებით, სამართალდამცავებმა მერაბ კობიაშვილი დააკავეს. კობიაშვილს ბრალი მკვლელობის, მკვლელობის მცდელობისა და ძალადობისთვის აქვს წარდგენილი.

ამასთან, პროკურატურამ მერაბ კობიაშვილის მიმართ ჯგუფურად განხორციელებული ძალადობის ფაქტზე ბრალი 6 პირს წარუდგინა და მათი საქმე ცალკე წარმოებად გამოიყო.

კობიაშვილი გორის რაიონული სასამართლოს გადაწყვეტილებით აღკვეთის ღონისძიების გარეშეა დატოვებული.