სროლა ქორწილში, მოკლულია სამი ადამიანი - მორიგი ტრაგედია ავღანეთში მუსიკის გამო
ავღანეთში, ნანგარჰარის პროვინციაში, პარასკევ ღამეს, ქორწილში მუსიკის ჩართვისთვის სამი ადამიანი მოკლეს და 10 - მდე დაჭრეს. თავდამსხმელები ირწმუნებოდნენ, რომ თალიბანის წევრები იყვნენ.
თალიბების სპიკერი ზაბიჰულა მუჯაჰიდი კვირას გამართულ პრესკონფერენციაზე განაცხადა, რომ ცერემონიის ჩატარების ადგილზე სამი შეიარაღებული მამაკაცი შეიჭრა და მუსიკის გამორთვა მოითხოვა.
თალიბების სპიკერმა ისიც დაამატა, რომ გამოიძიებენ ეს ყველაფერი პირადი კონფლიქტის საფუძველზე ხომ არ მოხდა.
მისი თქმითვე, ეჭვმიტანილები თალიბანის წევრობას ამტკიცებდნენ, თუმცა, რეალურად არიან თუ არა თალიბები - ჯერ უცნობიაო. მან ასევე თქვა, რომ ინციდენტთან დაკაშირებული ორი ადამიანი უკვე დააკავეს, მესამე კი მიმალვაშია.
მიუხედავად იმისა, რომ თალიბები არ აღიარებენ ქორწილში ან სხვა საზოგადოებრივ ღონისძიებებზე მუსიკის დაკვრის ტრადიციას, ჯერ ოფიციალური განკარგულება მუსიკის აკრძალვის შესახებ არ გაუციათ.
იმის მიუხედავად, რომ თალიბები იცილებენ მომხდარზე პასუხისმგებლობას და არ აღიარებენ ინციდენტთან კავშირს, საპირისპიროზე მიუთითებს ზაფხულში მომხდარი მკვლელობა. აგვისტოს ბოლოს, ფოლკლორული სიმღერების შემსრულებელი ფავად ანდარაბი თალიბებმა სახლიდან ძალით გამოიყვანეს და მოკლეს, სავარაუდოდ მკვლელობის მოტივი ისევ მუსიკასთანაა კავშირში, რადგან ხელისუფლება მთელი ქვეყნის მუსიკოსებს უკრძალავს ინსტრუმენტებზე დაკვრას.
თალიბების წინა მმართველობისას, 1996-2001 წლებში, თალიბანმა მუსიკის თითქმის ყველა ჟანრი/ფორმა აკრძალა, რადგან ანტიისლამურად მიიჩნია.
თარგმნა ანა სიბოშვილმა