"სიტყვები არ მყოფნის ჩემი შოკის და მწუხარების გადმოსაცემად" - ალეკ ბოლდუინი მის მიერ გასროლილი ტყვით დაღუპული ოპერატორის ქმარ-შვილს შეხვდა
ჰოლივუდის მსახიობი ალეკ ბოლდუინი გადასაღებ მოედანზე, მის მიერ გასროლის შედეგად ტრაგიკულად დაღუპული ოპერატორის, ჰალინა ჰატჩინსის მეუღლეს და 9 წლის შვილს შეხვდა.
სანტა ფეს სასტუმროში შეხვედერის ამსახველი ფოტოები მედიამ გაავრცელა. კადრებში ჩანს მსახიობისა და დაღუპული ოპერატორის ქმარ-შვილის ემოციური შეხვედრა.
ალეკ ბოლდუინმა გადასაღებ მოედანზე მომხდარი ტრაგიკული შემთხვევის შესახებ კომენტარი რამდენიმე დღის წინ გააკეთა.
"სიტყვები არ მყოფნის ჩემი შოკის და მწუხარების გადმოსაცემად ტრაგიკულ უბედურ შემთხვევასთან დაკავშირებით, რაც მეუღლის, დედის და ჩვენი პატივცემული კოლეგის, ჰალინა ჰატჩინსის ცხოვრებაში მოხდა. გულმოკლული ვარ მისი ქმრის, შვილის და ყველა იმ ადამიანის გამო, ვინც ჰალინას იცნობდა და ვისაც ის უყვარდა,“- დაწერა მსახიობმა "ტვიტერში“.
შეგახსენებთ, რამდენიმე დღის წინ ჰოლივუდის მსახიობმა ალეკ ბოლდუინმა გადასაღებ მოედანზე ცეცხლსასროლი იარაღიდან გაისროლა, რის შედეგადაც ოპერატორი ქალი გარდაიცვალა, ფილმის რეჟისორი კი - დაიჭრა. მედიის ინფორმაციით, მსახიობმა გასროლა განახორციელა იარაღიდან, რომელშიც ფუჭი ვაზნები უნდა ყოფილიყო. ინციდენტი ნიუ-მექსიკოს შტატში ვესტერნის ჟანრის ფილმის, Rust-ის გადაღების მოედანზე მოხდა. ალეკ ბოლდუინს იარაღი რეჟისორის ასისტენტმა მიაწოდა და უთხრა, რომ უსაფრთხო იყო.