გოგონა "კალმარის თამაშებიდან" - ვინ არის სამხრეთ კორეელი მსახიობი,  რომელსაც სერიალმა მილიონობით ფანი შესძინა

"კალმარის თამაშები“ - ასე ჰქვია Netflix-ის კორეულ პროდუქტს, სერიალს, რომელიც სენსაციად იქცა და წარმოუდგენელი პოპულარობა მოიპოვა. შესაძლოა, სერიალი არ გქონდეთ ნანახი, თუმცა აუცილებლად მოჰკრავდით თვალს სოციალურ ქსელში სერიალის განხილვას, მისი გმირების ფოტოებს, მიმებს და სხვა ინფორმაციას.

ამ სტატიაში არ ვისაუბრებთ სერიალის სიუჟეტზე და იქ განხილულ თემებზე. მის ერთ-ერთ მთავარ გმირზე, ჰოიონ ჩონზე მოგიყვებით, მსახიობზე, რომელსაც "კალმარის თამაშების" სილამაზეს უწოდებენ.

27 წლის ჰოიონ ჩონს სერიალმა მსოფლიოს მასშტაბით მოუტანა პოპულარობა და აღიარება. ჩონი სამხრეთ კორეელი მოდელი და მსახიობია. სამოდელო კარიერა 16 წლის ასაკში დაიწყო, ორი წლის განმავლობაში სეულის მოდის კვირეულზე გამოდიოდა. 2013 წელს მონაწილეობდა კონკურსში - Korea's Next Top Model, სადაც ფინალისტებს შორის მოხვდა.

კარიერის გამო, მან სამშობლო დატოვა და 2016 წელს უკვე ნიუ-იორკის მოდის კვირეულზე გამოჩნდა და ამით მისი დებიუტი შედგა საერთაშორისო მოდის სამყაროში. მას შემდეგ იყო ისეთი ბრენდების სახე, როგორებიცაა Adidas, Chanel, Bottega Veneta და ა.შ.

"კალმარის თამაშები“ მის სამსახიობო კარიერაში სადებიუტო ნამუშევარია. აღნიშნულმა სერიალმა "ინსტაგრამზე" ყველაზე პოპულარულ სამხრეთ კორეელ მსახიობად აქცია და აღნიშნულ სოციალურ ქსელში ჩონის გამომწერების რაოდენობა უკვე 19 მილიონს აჭარბებს. აღსანიშნავია, რომ სერიალამდე მსახიობს 5 მილიონი გამომწერი ჰყავდა.

ახლახანს პოპულარული ბრენდის , louis vuitton-ის საერთაშორისო ელჩი გახდა და საათებსა და სამკაულს წარადგენს. ჩონი ამბობს, რომ ამ ეტაპზე მისთვის მსახიობის კაერიერა უფრო მნიშვნელოვანია, თუმცა მისივე თქმით, შეუძლია ბევრი საქმე ერთად აკეთოს და თანაც წარმატებულად, ამიტომაც არ აპირებს ისეთ შეთავაზებებზე უარის თქმას, რომელიც მოდელის კარიერას უკავშირდება.

ჩონი შეყვარებულია და ის 2016 წლიდან ურთიერთობაშია სამხრეთ კორეელ მსახიობ ლი დონგთან.