16 წლის ლიზა კობერიძე - კიდევ ერთი ქართველი მოდელი Dolce & Gabbana-ს მოდის სამყაროდან - "ეს ჩვენი ოცნებების ხურჯინიდან ერთ-ერთია" (ფოტოები)

Dolce & Gabbana-ს ჩვენებაზე, რომელიც მილანის მოდის კვირეულის ფარგლებში გაიმართა, 16 წლის ლიზა კობერიძემ სხვა ცნობილ მოდელებთან ერთად, 2022 წლის გაზაფხული/ზაფხულის კოლექცია წარადგინა.

ლიზა სამოდელო სააგენტო "ნატალის“ მოდელია. სააგენტოს კრეატიულმა დირექტორმა, მარიამ გიორგობიანმა სოციალურ ქსელში პოსტი გამოაქვეყნა, სადაც ლიზას შესახებ წერს.

"ლიზა ამ ყველაფრის მთავარი გმირია. ლიზა ნატალიდან / ნატალის ლიზა, 12 წლის იყო როცა ნატალის დიდ ოჯახში შემოაბიჯა, დანახვის წუთიდან Top გოგოს ვეძახდი. დიდი გზა გავიარეთ, დიდი შრომა ჩადო აქამდე რომ მოვსულიყავით. ჯერ დავიწყეთ საქართველოთი (რადგან როგორც ნატა იტყოდა: ჯერ შენ ქვეყანაში უნდა შედგე და შემდეგ სხვაგან დაიმკვიდრო თავი), შემდეგ იტალია “Smart Bambina” იყო 13 წლის ლიზას მეტსახელი, შემდეგ დიდი ტოკიო, კორეა და ეხლა მილანი, ერთ-ერთი დიდი სააგენტოს წევრი გახდა და დღეს მილანის მოდის კვირეულს ამშვენებს ჩემი "Top გოგო“.

P.S რაც ყველაზე მეტად მიხარია პატარა ლიზა ნატას იცნობდა მისი პირველი მზადება პოდიუმისთვის სწორედ ნატას ხელში მოხდა.

ეს იმ ჩვენი ოცნებების ხურჯინიდან არის ერთ-ერთი ცაცულიკ, რომელსაც შეგპირდი რომ შევასრულებდით...“ - წერს მარიამი.

ლიზა კობერიძე მესამე ქართველი მოდელია, რომელმაც Dolce & Gabbana-ს ჩვენებაში მიიღო მონაწილეობა. სხვადასხვა დროს ქართველი ტოპ-მოდელი თათია ახალაია სამჯერ გამოვიდა ჩვენებაზე.

2019 წლის მილანის მოდის კვირეულის ფარგლებში Dolce & Gabbana-ს 2020 წლის გაზაფხულის კოლექციის ჩვენებაში მონაწილეობა თათია ახალაიასთან ერთად კიდევ ერთმა ქართველმა მოდელმა, მატილდა გვარლიანმა მიიღო.