"ძალით თუ მოვლენ და შემომახევენ სამოსს, არ ვიცი, თუმცა ნებით არ დავთმობ" - მიტროპოლიტ სტეფანეს მიერ განკვეთილი ბერი
სასულიერო პირები, რომლებიც ჭყონდიდის მიტროპოლიტმა სტეფანე კალაიჯიშვილმა ეკლესიიდან განკვეთა, ბრძანების შესრულებას და კელიების დატოვებას არ აპირებენ.
განკვეთილ ბერებს დღეს ეპარქიის ეკონომისტი, დეკანოზ ტარიელ რუხაძე შეხვდა.
როგორც დეკანოზი აღნიშნავს, ბერებს კელიების დატოვებას დღეს არავინ მოსთხოვს, თუმცა, მომავალში რა მოხდება, ეს მეუფე სტეფანეს გადასაწყვეტია.
„ეს ბრძანება მე გუშინ გადმომცეს და დღეს აქ გამომიშვეს. მაქვს კურთხევა და ეს კურთხევა უნდა აღვასრულო კარგად თუ ცუდად. თუ მოხერხდა, მეგობრულად დაველაპარაკები. თუ არადა, ჩემი საქმე მაქვს გასაკეთებელი. ღვთის წინაშეც მართალი უნდა ვიყო, ჩემი ეპისკოპოსის წინაშეც და ჩემი სინდისის წინაშეც. დღეს არავინ მოსთხოვს მათ კელიების დატოვებას. მომავალში ეპისკოპოსი გადაწყვეტს, რას იზამს“, - აღნიშნა ტარიელ რუხაძემ ჟურნალისტებთან საუბრისას.
სალხინოს მონასტრის წინამძღვრის, მამა დანიელის თქმით, მეუფე სტეფანეს ბრძანება არანაირ კანონიკაში არ ჯდება.
„ბერობა არის აღთქმის დადება. მე რომ ღმერთს სიტყვა შევფიცე, ეგ როგორ უნდა ამიკრძალოს და ჩემი ცხოვრების წესში როგორ უნდა შემოვიდეს სტეფანე? ეს არავის შეუძლია. ბერობიდან განყენება დედამიწაზე არ მომხდარა, არაკანონიკურია. მკვდარიც რომ ვიყო, ბერი ვიქნები. ძალით თუ მოვლენ და შემომახევენ [სამოსს] ეგ არ ვიცი, თუმცა, ამასაც არ დავთმობ“, - აღნიშნა მამა დანიელმა.
ბალდის მამათა მონასტრის ყოფილი წინამძღვარი მამა ათინოგენე ითხოვს მონასტერში მეუფე სტეფანე თვითონ მივიდეს და სასულიერო პირებს დაელაპარაკოს.
„ეს კაცი თუ ამ ცრუ არსების, მისი ნების და განკარგულების აღსრულებას დაიწყებს, მოვიდეს, ჩაგვხედოს თვალებში! თუ ის ქრისტიანია და თავის თავში ღირსებას ატარებს, მოვიდეს და დაგველაპარაკოს“, - აღნიშნა მან ჟურნალისტებთან საუბრისას.
არსებული ინფორმაციით, მეუფის მიერ წარგზავნილ დეკანოზსა და განკვეთილ პირებს შორის დაპირისპირებაც იყო. დაპირისპირება დეკანოზის მიერ ბერებისთვის მეუფე სტეფანეს ბრძანების გაცნობამ გამოიწვია, რის მიხედვითაც, ობიექტები უნდა დაილუქოს, შემდეგ კი აღწერა დაიწყოს. სიტუაცია მას შემდეგ განიმუხტა, რაც მეუფის წარგზავნილმა პირებმა კელია დატოვეს. ადგილზე მობილიზებულნი იყვნენ სამართალდამცავებიც.