ე.წ. სუს-ის ჩანაწრების სკანდალი გრძელდება - რატომ გადააქვს ისრები ხელისუფლებას გიორგი გახარიასკენ და რას ამბობს სუს-ის უფროსის ექსმოადგილის ძმა?
ე.წ. სუს-ის ჩანაწრების სკანდალი გრძელდება. პრემიერი ირაკლი ღარიბაშვილი სუს-იდან გამოჟონილ ჩანაწერებთან დაკავშირებით ექსპრემიერ გახარიას გუნდისკენ მიანიშნებს და ალექსანდრე ხოჯევანიშვილს ახსენებს, რომელიც უსაფრთხოების სამსახურის უფროსის მოადგილე გახლდათ.
"სამწუხაროდ, სააკაშვილის დიდ გუნდს სხვა მოღალატეებიც შეუერთდნენ. გუშინ პროკურატურამ განაცხადა, რომ დაწყებულია გამოძიება და ყველა ვერსიას დაამუშავებენ, მათ შორის იმ ვერსიასაც, ხომ არ შეიძლება იყოს ჩართული გახარია ან ხოჯევანიშვილი, რომელიც, სხვათა შორის, ძალიან მნიშვნელოვან დანაყოფებს კურირებდა “, - აღნიშნა პრემიერმა. თუმცა პრემიერამდე ამ საქმეში გიორგი გახარიას ჩართულობაზე ვერსია თეა წულუკიანმა განავითარა, რომელმაც პირდაპირ დაადო ხელი პრემიერყოფილს, დანარჩენმა ლიდერებმა კი ამაზე ირიბად მიანიშნეს.
პარტია "საქართველოსთვის“ წევრმა, ბექა ლილუაშვილმა არ გამორიცხა, რომ ფარულ ჩანაწერებთან დაკავშირებით, სუს-ის უფროსის ყოფილი მოადგილე, ალექსანდრე ხოჯევანიშვილი დააკავონ.
“როგორც ჩანს, მმართველი პარტიისთვის დღეს მთავარი პრიორიტეტია ძალაუფლების შენარჩუნება, შესაბამისად, არ გამოვრიცხავთ არაფერს, მათ შორის ბუტა რობაქიძის საქმეზე, საერთაშორისო სასამართლოს მიერ დაზარალებულად მიჩნეული ჩვენი მხარდამჭერი ბართაია ციხეშია, არაფერია გამორიცხული“, - განაცახდა ლილუაშვილმა.
გიორგი გახარიას თანაგუნდელი, ალექსანდრე ხოჯევანიშვილის ძმა და პარტია "საქართველოსთვის“ ერთ-ერთი ლიდერი გიორგი ხოჯევანიშვილი არ აღიარებს პრემიერის ბრალდებას და ამბობს, რომ "უღირს ადამიანებს ხშირად კარგად გამოსდით სიცრუისა და ბოროტების ტირაჟირება“.
"ჯერ ისაა გასარკვევი, საერთოდ რა მიზანს შეიძლება ემსახურებოდეს ამ ჩანაწერების სამზეოზე გამოტანა და დასადგენია, რამდენად ავთენტურია ისინი. რაც შეეხება უსაფუძვლო ბრალდებებს, ეს პრემიერზე წინ, სხვებისგან აქამდეც მოვისმინეთ და, სამწუხაროდ, ამის მერეც შეიძლება მოვისმინოთ. ზოგადად, უღირს ადამიანებს, თუ დასჭირდათ, ხშირად კარგად გამოსდით ბოროტებისა და სიცრუის ტირაჟირება. უკანონო და უსაფუძვლო ბრალდებებზე რა კომენტარი უნდა გავაკეთო? ამ ბოროტების ტირაჟირებას ქართველი ხალხი ამ არჩევნებზე გასცემს პასუხს. ასეთი გონიერებას მოკლებული კითხვის დასმაც კი შეურაცხმყოფელია ჩემთვის. აშკარაა, ხელისუფლება აგონიაშია და მათი ყველა ნათქვამი, თუ გადაწყვეტილება შიშზეა დაფუძნებული“, - ამბობს გიორგი ხოჯევანიშვილი.
ექსპერტი გიორგი გობრონიძე მიიჩნევს, რომ მმართველი პოლიტიკური ელიტა თავის მართლების რეჟიმშია და გახარიას გუნდზე ისრების გადატანით ცდილობს, ამ კატასტროფულ მოვლენას იმგვარი ახსნა მოუძებნოს, რაც მას პასუხისმგებლობას აარიდებს.
"ჩვენი პოლიტიკური კულტურიდან გამომდინარე, ლოგიკურია, რომ მმართველი გუნდი ცდილობს, თავი იმართლოს, ისრები სხვისკენ მიმართოს და ამ მოვლენას იმგვარი ახსნა მოუძებნოს, რაც მას პასუხისმგებლობას აარიდებს. რაც მოხდა, ეს არის კატასტროფული ფაქტი გამომდინარე იქიდან, რომ რამოდენიმე საშიშ ტენდენციას უსვამს ხაზს.
პირველი, ესაა თვითონ ის მომენტი, რომ საქართველო წლებია ფუნქციონირებს, როგორც პოლიციური სახელმწიფო. იყო ამგვარი პრობლემა წინა ხელისუფლების ადმინისტრაციის პირობებში და გვახსოვს, საზეიმო ვითარებაში განადგურებული ფარული ჩანაწერები. ახლა ვხედავთ, რომ აღნიშნულ პრაქტიკაზე უარი არ უთქვამს ახლანდელ ხელისუფლებასაც. აქ არ შეიძლება ლაპარაკი იმაზე, რომ უპირობოდ არცერთი ჩანაწერი არ უნდა კეთდებოდეს. ლოგიკურია, რომ სახელმწიფო უსაფრთხოების სამსახურს უნდა გააჩნდეს თავისი ინტერესი, იმ პირთა წრე, რომელიც უნდა დაექვემდებაროს ოპერატიულ კონტროლს, მაგრამ ეს ყველაფერი უნდა ხდებოდეს კანონით გაწერილი პროცედურების შესაბამისად, ლეგიტიმური მიზნებისთვის და არა საკუთარი პოლიტიკური ინტერესის დასაკმაყოფილებლად, რისთვისაც ამ ყველაფერს იყენებს მმართველო პოლიტიკური კვაზიძალა.
უსაფრთხოების სტრუქტურები ნებისმიერ შემდგარ სახელმწიფოში ეს არის ზეპოლიტიკური ორგანო, რამდენადაც მის წინაშე არსებული გამოწვევები ნებისმიერი ხელისუფლების პირობებში, არის სახელმწიფოს წინაშე არსებული პრობლემა, რომელსაც სჭირდება მოგვარება და ვინც არ უნდა იყოს ხელისუფლებაში, მან უნდა გასცეს პასუხი. ჩვენ რასაც დღეს ვხედავთ, აქ საგანგაშოა ის მომენტი, რომ ჩვენი უსაფრთხოების სტრუქტურების რესურსი არ არის მიზნობრივად გამოყენებული და ამას გააჩნია სამი ნეგატიური მხარე:
1. გულისხმობს ადამიანების პირად სივრცეში შესვლას უკანონოდ, მხოლოდ იმის გამო, რომ უზრუნველყოფილ იქნას ცალკეული პირთა წრის პოლიტიკური ლოიალობა, რაც მიუთითებს იმაზე, რომ მმართველ პოლიტიკურ ელიტას აწუხებს ლეგიტიმურობის პრობლემა. მათ გაუჭირდებათ დემოკრატიის პირობებში საკუთარი ძალაუფლების შენარჩუნება, ამიტომ მიმართავენ "არასპორტულ“ ხერხებს.
2. ის რესურსი, რაც ხმარდება ქვეყანაში საკუთარი მოსახლეობის არც თუ მცირე ნაწილს (სამღვდელოება იქნება, პედაგოგები თუ სხვა), ლოგიკურია, ის აკლდება იმ ძირითად და მნიშვნელოვან ამოცანებს, რომელიც უნდა შეასრულოს სუს-მა.
3. ერთ დღეს ეს ყველაფერი საჯარო ხდება, ანუ ეს ინფორმაციაც კი არ არის დაცული, რაც ნიშანია იმისა, რომ შიგნით არსებობს სისტემური კრიზისი. რაღაცა "ვიკილიქსის“ ტიპის სკანდალში გავეხვიეთ და ლოგიკურია, რომ ეს მოითხოვს რეაგირებას. პასუხისმგებლიანი პოლიტელიტა ამ პირობებში, პირველ რიგში, თვითონ უნდა სვამდეს კითხვას, რა ხდება სახელმწიფოში და რისი ან ვისი დამსახურებით მივიღეთ ასეთი მძიმე სიტუაცია ქვეყანაში. ამ მოვლენას მორალური, ეთიკური, ლეგალური, თუ სუფთა პოლიტიკური თვალსაზრისით, ძალიან ნეგატიური გავლენა გააჩნია სახელმწიფოზე, რომლის მიმართაც ნდობა იკარგება.
ახლა გახარიასკენ რომ გადააქვთ ისრები, დიდი ბოდიში და, ეს პოლიტელიტა იმ პრემიერის დროსაც ადგილზე იყო და მისი წინა პრემიერების დროსაც, შესაბამისად, აქ საკითხი უნდა დაისვას შემდეგნაირად - რასთან გვაქვს საქმე, საიდან წამოვიდა ეს ყველაფერი?
პირველი, რაც უნდა გაეკეთებინა პასუხისმგებლიან ხელისუფლებას, სულ მცირე, თუნდაც პარლამენტში, საჯარო ახსნა-განმარტებისთვის უნდა დაებარებინათ უსაფრთხოების სექტორის ხელმძღვანელები, რომელთაც უშუალოდ უკავშირდება ეს ყველაფერი.
მეორე, უნდა დამდგარიყო პოლიტიკური, თუ სამართლებრივი საკითხი იმ პირებისა, ვინც შეიძლება იყოს დამნაშავე, ვინაიდან თვითონ მმართველი ელიტის წევრებიც არ არიან ამისგან დაცული.
აქ უკვე ვაწყდებით დიდ სისტემურ კრიზისსა და პრობლემებს იმიტომ, რომ ეს არ არის შემდგარი და დემოკრატიული სახელმწიფოს ნაბიჯი, ეს არ არის ის პროცესი, რომელიც ქვეყნის განვითარებას წაადგება. ეს ყველაფერი აუცილებლად წარმოშობს როგორც ცალკეული პირების და ლიდერების სამართლებრივი, თუ პოლიტიკური პასუხისმგებლობის საკითხს, ასევე დღისწესრიგში აყენებს მთელი რიგი სტრუქტურების რეფორმირების საკითხს. რას ვაშენებთ ჩვენ და ვის წინააღმდეგ ვიყენებთ იმ ადამიანებს, ვინც წესით, დღე და ღამეს უნდა ასწორებდეს სახელმწიფოს წინაშე არსებული საფრთხეების განეიტრალებაში. რეალურად რომ შევხედოთ, ეს არის საკმაოდ სერიოზული პრობლემა და აქვე არის მეორე პრობლემაც - ძალიან ბევრი ადამიანის დანაშაულებრივი საქმიანობის შესახებ გამოჟონა ინფორმაციამ, ჩვენ ვხედავთ, რომ სახელმწიფო ფლობს ამ ინფორმაციას და ამაზე არ რეაგირებს. ეს ცალკე პრობლემაა და ამაზე ცალკე უნდა იყოს მსჯელობა“, - ამბობს გიორგი გობრონიძე.