"სოცქსელში დაწერეს, - თუ ვინმეს ზედმეტი საწოლი აქვს, ჰოსპიტალში მიიტანოსო... რა დროს სკოლაა" - აფხაზეთში, მძიმე ეპიდვითარების ფონზე, სასწავლო პროცესის დაწყებას მწვავედ ეხმაურებიან
ოკუპირებულ აფხაზეთში 1-ელ სექტემბერს სკოლებში სასწავლო პროცესი იწყება. რეგიონში, კორონავირუსის გავრცელების მხრივ, უმძიმესი ვითარებაა. გუდაუთის კოვიდჰოსპიტალი იმდენად გადატვირთულია, რომ რამდენიმე ადგილობრივმა, სამედიცინო პერსონალის თხოვნით, სოციალურ ქსელში დაწერა, რომ თუ ვინმეს ზედმეტი საწოლი აქვს, ჰოსპიტალში მიიტანოს, რადგან ექიმებს მძიმე პაციენტებისთვის სკამები თავიანთი კაბინეტებიდან გამოაქვთ.
ინფიცირებულებს შორის არიან არასრულწლოვნებიც. რამდენიმე დღის წინ, ანქვაბი-ბჟანიას გუნდის თხოვნის საფუძველზე, რუსეთმა რეგიონში საველე ჰოსპიტლები განათავსა.
ადგილობრივი მოსახლეობის ერთი ნაწილი სკოლების გახსნას კატეგორიულად ეწინააღმდეგება. მათი მოსაზრებით, არც ერთი ბავშვის განათლება არ ღირს სიცოცხლის გარისკვად.
"სოციალურ ქსელში დაწერეს, რომ თუ ვინმეს ზედმეტი საწოლი აქვს, ჰოსპიტალში მიიტანოსო... რა დროს სკოლაა, ხალხო, თორემ ერთბაშად კემბრიჯის უნივერსიტეტისთვის არ ამზადებდნენ ამ ბავშვებს, სიტუაცია ყოველდღე უარესდება. ჯანმრთელობის ფასი არაფერია. მოვითხოვოთ, ერთი თვით მაინც გადავდოთ სწავლა. პუტინის ხელმოწერებიან წიგნებს თუ ვერ მიიტანენ ბავშვები სახლში 1-ელ სექტემბერს, როგორმე ავიტანთ", - წერს ადგილობრივი ასტამურ ფაჩულია.
"კოვიდპანდემიის საფრთხეს რომ თავი დავანებოთ, ტურისტული ქვეყანა ვართ და უამრავი მასწავლებელი თუ სკოლის სხვა პერსონალი ტურისტულ ბიზნეშია დასაქმებული, იქნებ ვაცადოთ 20 სექტემბრამდე მაინც მუშაობა? ისედაც კაპიკებზე მუშაობენ სკოლებში და ამ დროსაც გამოიყენებდნენ. ამასთან, თვის ბოლომდე ვირუსის აფეთქებაც ჩაცხრებოდა. საქართველოს თავისი გასჭირვებია, უმძიმესი ვითარება აქვთ, ყოველდღე რამდენიმე ათეული ადამიანი ეღუპებათ. ყველაფერზე იქით იყურებით", - წერს სოციალური ქსელში ელიზა წუჟბა.
"ვის იმედზე იწყებთ სასწავლო პროცესს? რა მოხდება ინფიცირებისა და სიკვდილიანობის მაჩვენებელმა ბავშვებშიც რომ მოიმატოს?!" - კითხულობს იამზე კვეკვესკირი.
სხვების თქმით, არავინ იცის, კოვიდპანდემია რამდენ ხანს გასტანს.
"ისედაც მხოლოდ სკოლის განათლებაზე ვართ დამოკიდებული, რომლის ხარისხის მაჩვენებელიც ნულს ქვემოთ არის და ისიც არ მივცეთ? წერა-კითხვის უცოდინარი თაობა გინდათ, რომ მერე უფრო მარტივად მართოთ, თქვენი კოვიდშირმებით და სახიფათო აცრებით? რა გაქვთ ჩაფიქრებული ყველას ერთად, ერის სრული გადაშენება?!" - კითხულობს ადგილობრივი ანჟელა გოგოხია.
"ტურიზმის სეზონი დუღს. ყოველდღიურად ასობით აუცრელი რუსი ტურისტი შემოდის და არავინ იცის, რა შტამები შემოაქვთ. ახლა ამბობენ, რომ ვირუსის უწყვეტი მუტაცია ხდება და ეს აცრები მისი პრევენციისთვის უძლურია. თუმცა, ტურისტულ ქალაქებში არანაირ რეგულაციას არ იცავენ და სკოლა გახდა პრობლემა? სადაც მეტ-ნაკლებად კონტროლდება ვითარება... ბავშვები ისედაც მუდმივად ერთმანეთს ეკონტაქტებიან, ვინმეს ჰგონია, რომ მშობლებს ისინი სახლში ჰყავთ დამწყვდეული?" - წერს ალიას ხახუბია.
"გასაგებია, სკოლის დაწყების თემა რატომაც შემოაგდეს, მშობლებს აიძულებენ აიცრან, არადა, ყველას სხვადასხვანაირი ორგანიზმი გვაქვს და არავინ იცის, ნებისმიერ ჩვენგანზე როგორ აისახება. კონტროლი დააწესეთ და რეგულაციები გაამკაცრეთ, თორემ ცუდად გვაქვს საქმე, ხალხი არ იცრება, ეშინიათ. რუხის, ქუთაისის, თბილისისკენ იყურებიან და ამოუწურავი რესურსი არავის აქვს", - მიაჩნია ნელი კუჩბას.
"ის ხალხია სასწავლო პროცესის გადადების მომხრე, ვისი სასტუმროებიც და კაფეებიც ხალხით სავსეა. როგორმე ბოლომდე გარისკეთ, რომ რუსებს არ შეეშინდეთ და აფხაზეთში დასვენებისგან თავი არ შეიკავონ. ფაშისტებივით იქცევით, თავად არღვევთ ყველანაირ რეგულაციას და სხვებს მოუწოდებთ შვილები სკოლაში არ გაუშვათო. თავად რატომ არ ხურავთ სასტუმროებს და კაფეებს? რა სამწუხაროა, რომ ფულმა ადამიანის სახე დაგვიკარგა", - წერს იაგო ქეცბა.