ტერორისტული თავდასხმა ქაბულის აეროპორტზე: 90-მდე დაღუპული და 150-ზე მეტი დაჭრილი - ვინ აიღო პასუხისმგებლობა და რას აცხადებს "თალიბანი"?

26 აგვისტოს, ქაბულის აეროპორტში ძლიერი აფეთქების ხმა ორჯერ გაისმა. ბოლო ინფორმაციით დაღუპულია 90 -მდე ადამიანი, დაშავებულია 150-ზე მეტი. BBC-მ "თალიბანის“ წარმომადგენლებზე დაყრდნობით გაავრცელა ინფორმაცია, რომ დაღუპულთა შორის არიან ქალები და ბავშვები, ასევე დაშავდნენ "თალიბანის“ დაცვის წარმომადგენლები. პენტაგონის ინფორმაციით, მსხვერპლია ამერიკელ სამხედრო მოსამსახურეებს შორისაც: დაღუპულია 13 სამხედრო, დაშავებულია - 18.

ქაბულის აეროპორტთან მომხდარ თავდასხმაზე პასუხისმგებლობა ტერორისტულმა დაჯგუფება "ისლამურმა სახელმწიფომ“ აიღო. შესაბამისი განცხადება "ტელეგრამზე“ გავრცელდა. დაჯგუფების თქმით, თვითმკვლელმა ტერორისტმა ე.წ. შაჰიდის ქამარი აამოქმედა. მანამდე ასევე გახმაურდა ამერიკის თავდაცვითი უწყების ოფიციალური პირების ვერსიები, რომ თავდასხმა "ისლამური დაჯგუფების“ რეგიონულმა "ბოევიკებმა" მოაწყეს.

აშშ-ის პრეზიდენტის, ჯო ბაიდენის განცხადებით, მიაკვლევენ მათ, ვინც ქაბულის აეროპორტთან მომხდარ თავდასხმაზეა პასუხისმგებელი და პასუხს აგებინებენ.

ამის შესახებ ბაიდენმა სპეციალურ პრესკონფერენციაზე განაცხადა.

"მათ, ვინც ეს თავდასხმა მოაწყო, ასევე ნებისმიერს, ვისაც სურს ამერიკას ავნოს, ეს იცოდეთ: არ გაპატიებთ, არ დავივიწყებთ, ჩვენ მოგაგნებთ და გაზღვევინებთ. მე დავიცავ ჩვენს ინტერესებს და ჩვენს ხალხს ჩემს განკარგულებაში არსებული ყველა ზომით“, - განაცხადა ბაიდენმა.

მისივე თქმით, სამხედრო მეთაურებს დაავალა შეიმუშაონ ოპერატიული გეგმები, რათა დაარტყან "ისლამური სახელმწიფოს“ ობიექტებსა და ხელმძღვანელობას.

"ისლამური სახელმწიფოს“ ტერორისტები ვერ გაიმარჯვებენ, ჩვენ გადავარჩენთ ამერიკელებს. ჩვენ არ გავაჩერებთ მისიას და გავაგრძელებთ ევაკუაციას, ჩვენ გამოვიყვანთ ავღანელ მოკავშირეებს. ამერიკას ვერ დააშინებენ“, - აღნიშნა ჯო ბაიდენმა.

ბაიდენის განცხადებით, ავღანეთიდან ევაკუაცია გაგრძელდება, აფეთქებების მიუხედავად.

ტერაქტის შედეგად დაღუპულთა პატივსაცემად აშშ-ში თეთრი სახლსა და სახელმწიფო უწყებების სხვა შენობებზე სახელმწიფო დროშას დაუშვებენ.

"პატივისცემის ნიშნად, დღეიდან თეთრ სახლზე, ყველა საზოგადოებრივ შენობაზე, ყველა სამხედრო პოსტზე, საზღვაო სადგურსა და ხომალდზე შეერთებული შტატების დროშებს დაუშვებენ,“- განაცხადა თეთრი სახლის პრესსპიკერმა ჯენ ფსაკიმ.

მისივე თქმით, დროშები 30 აგვისტომდე იქნება დაშვებული.

ქაბულის აეროპორტზე მომხდარი თავდასხმის შედეგად "თალიბანის“ სულ მცირე 28 მებრძოლი დაიღუპა, - Reuters-ის ინფორმაციით, ამის შესახებ "თალიბების“ ოფიციალურმა წარმომადგენელმა განაცხადა.

"აეროპორტში მომხდარი აფეთქების შედეგად ამერიკელებზე მეტი ადამიანი დავკარგეთ", - განაცხადა "თალიბანის“ წარმომადგენელმა, რომელმაც ვინაობის გასაჯაროვება არ ისურვა.

მისივე თქმით, "თალიბანი“ არ არის პასუხისმგებელი უცხო ქვეყნების მიერ შემუშავებულ "ქაოტურ საევაკუაციო გეგმაზე“.

მანამდე "თალიბანის“ პრესსპიკერმა ზაბიჰულა მუჯაჰიდმა განაცხადა, რომ ქაბულის აეროპორტთან თავდასხმა ამერიკელების მიერ კონტროლირებულ ზონაში მოხდა. "ჩვენი სახელმწიფო მკაცრად გმობს ქაბულის აეროპორტში სამოქალაქო პირებისკენ მიმართულ აფეთქებას. ეს მოხდა იმ ზონაში, რომლის უსაფრთხოებაზეც ამერიკული სამხედრო ძალები არიან პასუხისმგებელნი“, - განაცხადა ზაბიჰულა მუჯაჰიდმა.