"ვუყურებდი როგორ კვდებოდა და სასწრაფოს თავისუფალი მანქანა არ ჰყავდა... მძიმე რეალობაა, გაუფრთხილდით ოჯახის წევრებს" - რას წერს მაიკო კაჭკაჭიშვილი?

კომპოზიტორი მაიკო კაჭკაჭიშვილი წერს, რომ საკუთარ თავზე გამოსცადა ის მძიმე რეალობა, რაც ქვეყანაში და სამედიცინო სექტორში დგას.

როგორც ის სოციალურ ქსელში წერს, მას შემდეგ, რაც დედა უმძიმეს მდგომარეობაში ჩაუვარდა, მასთან სასწრაფო დახმარების ბრიგადა ვერ მივიდა, რადგან თავისუფალი მაქანები არ იყვნენ.

"ეხლა შემიძლია წერა. დღეს მეგონა რომ ყველაფერი დასრულდა ჩემთვის, დედაჩემს დაეწყო თირკმელის შეტევა სიცხე ავარდა 40 ზე და ვერ ვაკავებდით, ისე ხტოდა და სიცხესაც ვერაფერს ვშველიდი, გაშავდა გასივდა და კითხვებზე არასწორი პასუხები გამცა. მანდ უკვე დავინახე, რომ მორჩა ყველაფერი. ვუყურებდი როგორ კვდებოდა. სასწრაფოს ზუსტად 4 საათი და 25 წუთი ველოდე. არ ვიცოდი კოვიდი იყო თუ რას ჰქონდა ასეთი კრიზი, ყველა ტიროდა ჩემს გარდა, მე უბრალოდ აზროვნების უნარი დავკარგე და ტირილი რა იყო არ ვიცოდი.

გამოვიყვანე მდგომარეობიდან, მაგრამ როგორ ბუნდოვნად მახსოვს, სასწაფოს ვეხვეწებოდი უგონოა და დამეხმარეთთქო და არ გვყავს თავისუფალი მანქანაო. ვერც გავბრაზდი იმიტომ რომ იმ ხალხსაც ყავს შვილები და ისინიც ჩემსავით ელოდებოდნენ ექიმებს.

ანუ დღეს ჩავხედე იმ რეალობას თვალებში, რომელიც გვჭირს და ხალხთან ექიმი ვერ მიდის... მძიმე რეალობაა, გაუფრთხილდით ოჯახის წევრებს, საკუთარ თავებს. დაიცავით რეგულაციები ზედმეტად ზედმიწევნით. დამიჯერეთ, ძალიან რთულია შველას რომ ითხოვ და შველა არ არის, იმიტომ რომ რიგში მერამდენე ხარ კაცმა არ იცის…." - წერს კაჭკაჭიშვილი.