ტოკიოში ოლიმპიადაზე კორონავირუსი კიდევ 17 პირს გამოუვლინდა
ტოკიოს ოლიმპიური თამაშების ორგანიზატორების განცხადებით, კორონავირუსი კიდევ 17 პირს გამოუვლინდა, რომლებიც თამაშებში მონაწილეობენ ან მის ჩატარებასთან არიან კავშირში. ამრიგად, ოლიმპიადის ფარგლებში სულ კორონავირუსი 123 ადამიანს დაუდასტურდა.
მანამდე ცნობილი გახდა, რომ თამაშებს ინფიცირების გამო გამოეთიშნენ ნიდერლანდელი სკეიტბორდერი ქენდი ჯეიკობსი და ჩეხი მაგიდის ჩოგბურთელი პაველ სირუცეკი.
მიუხედავად იმისა, რომ ოლიმპიურ სოფელში მკაცრი რეგულაციები მოქმედებს, ინფიცირების ახალი შემთხვევები მაინც ფიქსირდება. ახალი წესებით, ოლიმპიადაზე მონაწილეები მაქსიმუმ 5 დღით ადრე უნდა ჩავიდნენ და საკუთარი გამოსვლიდან 48 საათში უნდა დატოვონ იაპონია. ამასთან, შეჯიბრებების დიდი ნაწილი მაყურებლის გარეშე ტარდება.