"დამიდგინდა მძიმე დაავადება, არსებობს თუ არა სამხედრო ტექნოლოგია, რომელსაც შეუძლია ამ დაავადების გამოწვევა, ვერ გავარკვევ" - ლევან ვასაძე მიმართვას ავრცელებს

პარტია "ერის" ლიდერი ლევან ვასაძე ვიდეომიმართვას ავრცელებს, სადაც მისი ჯანმრთელობის მდგომარეობის შესახებ საუბრობს. ვასაძის თქმით, მძიმე ქრონიკული დაავადება დაუდგინდა, რასაც საეჭვოდ მიიჩნევს.

"დამიდგინდა მძიმე ქრონიკული დაავადება, რომელიც არის ერთ-ერთი ყველაზე იშვიათი მსოფლიოში. მე მას განზრახ არ დავასახელებ, რათა ამ კერძო სივრცეში არ შევიჭრა. ეგ დაავადება არის რამდენიმე სახის - არის სისტემური, რომელიც ემართება ადამიანს სხვადასხვა ორგანოზე, მე ეგ არ დამიდგინა, მე მაქვს ის მარტო გულზე, ასევე ეს დაავადება არის გენეტიკური. მე არც ეგ დამიდგინდა, მე მაქვს შეძენილი ფორმით...

უცნაურია, როგორ შევიძინე მე ის, იმიტომ, რომ 50 წლის კაცი ვარ, სპორტსმენი, არ ვეწევი, არ ვსვამ, ვვარჯიშობ და თითქმის არ ვავადმყოფობ. სანამ პოლიტიკაში შემოვიდოდი, აპრილის ბოლოს ხველა მაწუხებდა გრიპის შემდეგ და მოსკოვის აკადემიკოს ლადოვის სარეაბილიტაციო კლინიკაში გავიარე კომპლექსური შემოწმება, ყველაფერი მქონდა წესრიგში, გულის ჩათვლით. 6 მაისს, გიორგობა დღეს, შემოვედი პოლიტიკაში და აი, თვე-ნახევარში დამეტაკა ეს უიშვიათესი დაავადება, რომელიც ამ სახით, ანუ მარტო გულზე და არა გენეტიკური, არამედ შეძენილი, ემართება მილიონ ადამიანში 2 კაცს. არსებობს თუ არა რაღაც სამხედრო ან გასაიდუმლოებული ტექნოლოგიები, რომლებსაც შეუძლიათ დასხივების ან ინტოქსიკაციის შედეგად ამ დაავადების გამოწვევა, მე ვერ გავარკვევ, ალბათ, ვერც ვერავინ ვერ გაარკვევს. ექიმები ამას ვერც მიდასტურებენ და ვერც უარყოფენ. ხაზი მინდა გავუსვა, რომ 50 წელი ჯანმრთელად ვიცხოვრე, შემოვედი პოლიტიკაში და მსოფლიოში ერთ-ერთი ყველაზე იშვიათი და მძიმე დაავადება დამიდგინდა. ვისაც როგორ უნდა, ისე გაიგოს.

უცნაურია, რომ რაც საქართველოდან წამოვედი, ჩემი მდგომარეობა მკვეთრად გაუმჯობესდა, თუმცა, სამწუხაროდ, დაავადება დამიდგინდა. ჩემი თვითშეგრძნება არის შეუდარებლად უკეთესი, რაც მე მანდ აღარ ვარ. გარდა ამისა, ძალიან მაინტერესებს, საიდან იცოდნენ ან როგორ გაიგო სამმა ულტრალიბერასტულმა ტელევიზიამ - "ფორმულამ", "მთავარმა არხმა" და "TV პირველმა" ამის შესახებ და სამივემ რატომ გაუსვა ხაზი, რომ მე ვარ მოწამლული", - აცხადებს ლევან ვასაძე.

მისი თქმით, მას წინ მძიმე მედიკამენტოზური მკურნალობა ელოდება და არც ოპერაციული მკურნალობაა გამორიცხული.

ლევან ვასაძის თქმით, ის თავის გეგმების ცვლილებას არ აპირებს.

"არ ვაპირებ უკან დახევას, მათ შორის რამდენადაც ჯანმრთელობა გამიშვებს, არც იმ გზაზე, რომელზეც შევდექი გულით, აი რითიც შევდექი, იმაში დამეტაკა სწორედ უხსენებელი", - აღნიშნა ლევან ვასაძემ.