"ვიდრე ის პრემიერია, საფრთხის ქვეშაა ყველა მოქალაქის სიცოცხლე და ქვეყნის მომავალი" - ჟურნალისტების მიმართვა შარლ მიშელს და ორი საპროტესტო აქცია თბილისსა და ბათუმში

უნდა იცოდეთ, რომ სანამ ეს კაცი, ირაკლი ღარიბაშვილი, საქართველოს პრემიერ-მინისტრია, საფრთხის ქვეშ არის უკლებლივ ყველა ჟურნალისტის და მოქალაქის სიცოცხლე ისევე, როგორც ამ ქვეყნის ღირსება და თავისუფალი მომავალი. ასეთ კაცს ხვდებით თქვენ დღეს, - ამის შესახებ ნათქვამია სხვადასხვა მედიასაშუალების იმ ერთობლივ განცხადებაში, რომლითაც ისინი საქართველოში ვიზიტად მყოფ ევროპული საბჭოს პრეზიდენტს, შარლ მიშელს მიმართავენ.

მთავრობის ადმინისტრაციასთან შეკრებილ მოქალაქეებსა და მედიის წარმომადგენლებს ერთობლივი განცხადების შინაარსი ჟურნალისტმა ეკა მიშველაძემ გააცნო.

როგორც მან აღნიშნა, მთავრობის ადმინისტრაციასთან, იქ, “სადაც ე.წ. პრემიერ-მინისტრის კაბინეტია”, შეიკრიბნენ იმისათვის, რომ დღეს, საქართველოში ვიზიტად მყოფ ევროპული საბჭოს პრეზიდენტს შარლ მიშელს და მთელს მსოფლიოს კიდევ ერთხელ გააგებინონ, როგორი ხელისუფლება ჰყავს ქვეყანას.

„მოგმართავთ ჟურნალისტები, რომელთა 53 კოლეგას 5 ივლისს ფიზიკურად გაუსწორდნენ ღიად პრო-რუსული, აგრესიული ჯგუფები. მოგმართავთ ჟურნალისტები, რომლებიც უკვე წლებია ვართ ქვეყნის არაფორმალური მმართველის ბიძინა ივანიშვილისა და მისი ხელისუფლების მაღალჩინოსნების შეურაცხყოფისა და დისკრედიტაციის ობიექტები.

დღეს, თქვენ ქვეყნის დემოკრატიულ განვითარებაზე გესაუბრებათ ის პრემიერ-მინისტრი, რომელიც პასუხისმგებელია 5-6 ივლისს ჟურნალისტების, სამოქალაქო აქტივისტებისა და უმცირესობის წინააღმდეგ ჩატარებულ სადამსჯელო ღონისძიებაზე. დღეს, თქვენ დემოკრატიაზე გესაუბრებათ ის პრემიერ-მინისტრი, რომელიც მუდმივად სიძულვილის ენით საუბრობს, აღვივებს ზიზღს და ქადაგებს შეუწყნარებლობას. დღეს, თქვენ "ქართული ოცნების" დემოკრატიულ მიღწევებზე გესაუბრებათ ის პრემიერ-მინისტრი, რომელიც წლებია მფარველობს და ასაზრდოებს მოძალადე ჯგუფებს, იყენებს მათ განსხვავებული პოლიტიკური და სამოქალქო პოზიციის მქონე ადამიანების წინააღმდეგ ისე, როგორც ეს 5 ივლისს მოხდა, როდესაც მხოლოდ მის მიერ წახალისებულმა და ამ ხელისუფლების მიერ წახალისებულმა ძალადობამ აქამდე არანახულ მასშტაბებს მიაღწია და ჟურნალისტებისა და სამოქალაქო აქტივისტების წინააღმდეგ ნამდვილ სადამსჯელო ღინისძიებად იქცა. დღეს, თქვენ დემოკრატიაზე გესაუბრებათ ის, ვინც უმცირესობაზე ძალადობას უმრავლესობის ნების აღსრულებით ამართლებს. რაც მთავარია, თქვენ დღეს, დემოკრატიაზე გესაუბრებათ კაცი, რომელიც ანგარიშვალდებულია არა ამ ქვეყნის მოსახლეობის, არამედ ამ ქვეყნის არაფორმალური მმართველის ბიძინა ივანიშვილის წინაშე. დღეს, თქვენ გესაუბრებათ იმ ხელისუფლების წარმომადგენელი, რომელმაც უმრავლესობის მიერ მხარდაჭერილი და კონსტიტუციით გარანტირებული პროდასავლური კურსიდან გადაუხვია და ბელარუსის გზას დაადგა, ვინც 5-6 ივლისს საშუალება მისცა მოძალადე ჯგუფებს პარლამენტის წინ აღმართული ევროკავშირის დროშა ორჯერ ჩამოეხიათ და დაეწვათ. დროშის დაწვა კი, საგარეო კურსის ცვლილების სიმბოლურ გზავნილად ექცია. დღეს, თქვენ გესაუბრებათ ამ ქვეყნის არაფორმალური მმართველის, ბიძინა ივანიშვილის გუნდის წევრი, რომელმაც არაერთხელ სცადა, როგორც ამ ქვეყნის მოქალაქეების, ისე საერთაშორისო პარტნიორების მოტყუება, ნაკისრი ვალდებულებების შესრულებაზე უარის თქმით, რომელმაც რამდენიმე დღის წინ, უზენაესი სასამართლოს მოსამართლეების დანიშვით ცინიკურად და უხეშად დაარღვია თქვენი მედიაციით შექმნილი დოკუმენტიც. უნდა იცოდეთ, რომ სანამ ეს კაცი, ირაკლი ღარიბაშვილი, საქართველოს პრემიერ-მინისტრია, საფრთხის ქვეშ არის უკლებლივ ყველა ჟურნალისტისა და მოქალაქის სიცოცხლე ისევე, როგორც ამ ქვეყნის ღირსება და თავისუფალი მომავალი. ასეთ კაცს ხვდებით თქვენ დღეს და გვინდა, რომ სიმართლე იცოდეთ", - ნათქვამია მედიის წარმომადგენლების ერთობლივ განცხადებაში.

კანცელარიასთან გამართული აქციის პარალელურად ბათუმში, სასტუმრო „შერატონთან“, სადაც საერთაშორისო კონფერენცია უნდა გაიხსნას, ჟურნალისტები და არასამთავრობო ორგანიზაციების წევრები საპროტესტო აქციას მართავენ.

ისინი 5 ივლისს თბილისში განვითარებული მოვლენების გამო დროულ გამოძიებას ითხოვენ და აცხადებენ, რომ „აუცილებლად უნდა დაისაჯონ მკვლელები“. მათივე განცხადებით, ჟურნალისტებს უნდა მიეცეთ უსაფრთხო გარემოში მუშაობის შესაძლებლობა.

ამასთან, აქციაზე იმყოფებიან სხვადასხვა ოპოზიციური პარტიის აჭარის ორგანიზაციის წარმომადგენლები. მათი განცხადებით, ხელისუფლებამ უნდა აიღოს პოლიტიკური პასუხისმგებლობა. როგორც „ნაციონალური მოძარაობის“ წევრი მირდატ ქამადაძე აცხადებს, შეკრების მიზანია, რომ პარტნიორებს ქვეყანაში მიმდინარე პოლიტიკური პროცესების შესახებ ინფორმაცია მიაწოდონ. მისი თქმით, ქვეყანაში 5 ივლისს სამარცხვინო ფაქტი მოხდა და საქართველოში განსხვავებული აზრის მქონე ადამიანებს დევნიან.