"ცემის ფაქტთან შეხება არ მქონდა, იქ ახლოსაც არ ვიყავი" - რა თქვა პროცესზე "ტვ პირველის" ოპერატორის მიმართ ძალადობაში ბრალდებულმა?

"ტვ პირველის“ ოპერატორისთვის, ლევან ბრეგვაძისთვის პროფესიულ საქმიანობაში უკანონოდ ხელის შეშლისა და ჯგუფურ ძალადობაში მონაწილეობის ბრალდებით დაკავებულ ვანო ბურდულის განცხადებით, ის უდანაშაულოა.

როგორც ბურდულმა სასამართლო პროცესზე განაცხადა, მას ოპერატორის მიმართ ძალადობა არ განუხორციელებია.

"ვცხოვრობ ქალაქ დუშეთში, მყავს მეუღლე და შვილი. წავიკითხე დაზარალებულის ჩვენება, სადაც აღნიშნავს, რომ მის მიმართ ძალადობის ფაქტის განხორციელების შემდეგ სამართალდამცავები ერევიან, მისი განეიტრალება და ამ პროცესებიდან გაყვანა ხდება.

კადრებში, სადაც მასთან ერთად ვჩანვარ, შავი ფერის ავტომობილთან ხალხი უკნიდან მაწვება და ავდივარ მანქანაზე, ჩავვარდი ავტომობილის ჩამსხვრეულ მინაში და ფეხი დავიზიანე. იქ უკვე სამართალდამცავები იყვნენ. მე ცემის ფაქტთან შეხება არ მქონდა. ბრალდების მხარე რომ მედავება, თითქოს ძალადობრივ ქმედებებში ჩავერიე, ტყუილია. დაზარალებულის ჩვენებიდანაც ხანს, რომ ჩხუბის შემდეგ სამართალდამცავები მიდიან, კადრებში ჩანს, რომ იქ სამართალდმაცავების მისვლის შემდეგ მივდივარ, იქ ახლოსაც არ ვიყავი. შემდეგ უკან დავბრუნდი, აფთიაქში შევედი და დუშეთში დავბრუნდი",- განაცხადა ბურდულმა.

ცნობისთვის, სამართალდამცველებმა ვანო ბურდული 15 ივლისს, ხოლო დავით ქოჩიაშვილი 14 ივლისს დააკავეს. ვანო ბურდულს ბრალდება სისხლის სამართლის კოდექსის 154-ე მუხლის მეორე ნაწილით (ჟურნალისტისთვის პროფესიულ საქმიანობაში უკანონოდ ხელის შეშლა, ჩადენილი ძალადობის მუქარით), 156-ე მუხლის მე-2 ნაწილის „ა“ ქვეპუნქტით (ადამიანის დევნა პროფესიულ მოღვაწეობასთან დაკავშირებით, ჩადენილი ძალადობით) და 225-ე მუხლის მეორე ნაწილით (ჯგუფურ ძალადობაში მონაწილეობა) წარედგინა.

"თბილისი პრაიდის” საწინააღმდეგოდ გამართული აქციის საქმეებზე მიმდინარე გამოძიების ფარგლებში, ამ დროისთვის, ბრალი 24 პირს წარედგინა.

ამ ეტაპზე, საქმეზე დაზარალებულად ცნობილია 41 პირი, მათ შორის, 35 ჟურნალისტი და ოპერატორი.