"კორონავირუსით მეორედ დავინფიცირდი" - რას ჰყვება თიკა ფაცაცია და როგორი სირთულით მიმდინარეობდა დაავადება მეორედ?
ტელეწამყვანი თიკა ფაცაცია ამბობს, რომ კორონავირუსით მეორედ დაინფიცირდა. აღნიშნულის შესახებ ის "ინსტაგრამზე" გამოქვეყნებულ ვიდეოში საუბრობს.
"მოვიდა დრო, რომ გითხრათ, რატომ არ ვჩანდი ამდენი ხანი, კორონავირუსით მეორედ დავინფიცირდი. ახლა დავასრულე ეს პერიოდი, რომელიც ეკუთვნის მასთან ბრძოლას. სრულიად უსიმპტომო ვიყავი და ანტისხეულებიც მქონდა. ერთადერთი გზა ამ ვირუსთან ბრძოლის, არის აცრა და ყველა უნდა ავიცრათ.
ცხრა თვე გავიდა ჩემი პირველი კოვიდიდან, აცრა არ გამიკეთებია, იმიტომ რომ მქონდა პირველი კოვიდის დატოვებული ანტისხეულები, მეგონა ეს მიცავდა და რეალურად დამიცვა კიდეც, ალბათ ამის დამსახურება იყო, მისი ასეთი მსუბუქი მიმდინარეობა.
ალბათ, ვაქცინის მთელი ლოგიკა იმაშია, რაც ჩემს შემთხვევაში იყო. მე მქონდა ბუნებრივად შეძენილი ანტისხეულები, ვიღაცას ექნება ვაქცინით შეძენილი და ეს დაგვიცავს. არ ვიცი, რომელი შტამი იყო.
პირველზე მქონდა ყნოსვის და გემოს დაკარგვა, ტემპერატურა, თავის ტკივილი, სუნთქვის უკმარისობის ეპიზოდები, რომ დავასრულე, მერე მქონდა ხველა. ამ კოვიდზე მე არანაიარი სიმპტომი არ მქონია", - ყვება თიკა ფაცაცია.
შეგახსენებთ, რომ თიკამ "კოვიდ-19" 2020 წლის დეკემბერში დაამარცხა. მაშინ თიკა "კვირის პალიტრასთან ინტერვიუში ამბობდა, რომ ვირუსის დასამარცხებლად მთავარი განწყობაა.
"12 დღე ვიავადმყოფე და ამ ხნის განმავლობაში სულ სახლში ვიყავი. ყველაზე ძნელი დასაძლევი ამ დროს არის შიში, იმ ადამიანების გამო, ვისთან ერთადაც იყავი. ვფიქრობდი, ვირუსი ვინმეს ხომ არ გადავდე-მეთქი და ამიტომ, პირველად ჩემი კონტაქტების ძიება დავიწყე. პირბადით ვისთანაც ვიყავი, იმ ადამიანების რიცხვი ავტომატურად აკლდებოდა ინფიცირებულთა სიას და ეს მახარებდა", -ამბობდა თიკა.