"არც ერთი პარტიის და საელჩოს წარმომადგენელი არ გვინახავს... ვნახეთ მხოლოდ სასულიერო პირები, რომლებიც ეფარებიან და იცავენ ჟურნალისტებს" - დეკანოზი ანდრია ჯაღმაიძე

არც ერთი პოლიტიკური პარტიის და საელჩოს წარმომადგენელი არ გვინახავს, რომ ჟურნალისტს ეფარებოდეს. ვნახეთ, მხოლოდ სასულიერო პირები, რომლებიც ეფარებიან და იცავენ ჟურნალისტებს, - ამის შესახებ საპატრიარქოს საზოგადოებასთან ურთიერთობის სამსახურის ხელმძღვანელმა, დეკანოზმა ანდრია ჯაღმაიძემ ჟურნალისტებთან 5-6 ივლისს განვითარებულ მოვლენებზე საუბრისას განაცხადა.

როგორც ჯაღმაიძე აღნიშნავს, იმ სასულიერო პირმა, რომელიც ძალადობრივ მოწოდებებს აკეთებდა "სასტიკი საყვედური მიიღო".

"თქვენ როგორც ნახეთ, ამ დღეს არც ერთი პოლიტიკური პარტიის წარმომადგენელი, არც ერთი საელჩოს წარმომადგენელი არ გვინახავს, რომ ჟურნალისტს ეფარებოდეს. ვნახეთ, მხოლოდ სასულიერო პირები, რომლებიც ეფარებიან და იცავენ ჟურნალისტებს, აი ამაზე ვისაუბროთ.

ის სასულიერო პირი, რომელმაც მსგავსი მოწოდებები გააკეთა (ძალადობრივი) დაბარებული იყო, მიიღო სასტიკი საყვედური და მან საჯაროდ, ჩაწერა და გაავრცელა თავისი შენდობის ვიდეო. მიიღო სასტიკი საყვედური ეს ნიშნავს, რომ რაიმე კიდევ ერთი გადაცდომა გამოიწვევს მძიმე სასჯელს. თუ მსგავსი ფაქტი ისევ იქნება, მომაწოდეთ და განვიხილავთ", - აღნიშნავს ჯაღმაიძე.

კითხვაზე, რატომ არ მოუწოდა საპატრიარქომ მრევლს ძალადობის შეჩერებისკენ, ჯაღმაიძე აღნიშნავს, რომ მშვიდობისკენ მოწოდებაზე განცხადებები საპატრიარქოს მიერ რამდენჯერმე გაკეთდა.

"თქვენ ეტყობა არ გინახავთ ჩვენი განცხადებები. გავრცელდა დაახლოებით 5 ან 6 განცხადება მშვიდობისკენ მოწოდების.

მამა შალვა კეკელიამ პირდაპირ ტრიბუნიდან გამოაცხადა, რომ მოხდა ინციდენტი ჟურნალისტებთან დაკავშირებით და მოუწოდა ყველას მშვიდობისაკენ. ამის გარდა, იყო საპატრიარქოს გვერდზე გავრცელებული დაახლოებით 5 განცხადება.

წინასწარაც გავაკეთეთ ჩვენ ამის შესახებ განცხადება და ვაფრთხილებდით ყველას, რომ ასეთი ესკალაცია შეიცავდა გარკვეულ საფრთხეებს. რამდენი განცხადება გავაკეთეთ, ყველას ვაფრთხილებდით, საელჩოებს ვაფრთხილებდით ასევე, ვაფრთხილებდით "პრაიდის" მონაწილეებს, სახელმწიფოსაც და ზოგადად ყველას. ბოლო დღემდე მოვუწოდებდით, რომ "პრაიდი" გაუქმებულიყო და ყველას ეგრძნო პასუხისმგებელობა.

ნახეთ ჩემი განცხადებები, იქ არის მრევლისადმი მოწოდება.

გვაჩვენეთ კადრები და თუ რაიმე პასუხისმგებელობა გამოიკვეთება სასულიერო პირების მიმართ ან ვინმეს მიმართ, ვინც უკავშირდება საპატრიარქოს და აუცილებლად მივიღებთ ზომას“, - ამბობს დეკანოზი.

კითხვაზე, იზიარებს თუ არა მეუფე ანტონის განცხადებას, რომ მედიის ბრალია 5-6 ივლისს განვითარებული მოვლენები, ჯაღმაიძე დასძენს, რომ "ეს ჟურნალისტები ბრალი არ არის“.

"მე ვფიქრობ, რომ თქვენი ბრალი არ არის ეს. ბრალი არის თქვენი რედაქციების. მე მინდა მოსახლეობამ უბრალოდ მოიკითხოს, ვინ არიან იმ ტელევიზიის მფლობელები, რომლებსაც თქვენ წარმოადგენთ. ახალგაზრდა ჟურნალისტებს უშვებენ დავალებებით და თვითონ ვინ არიან? რა მოტივაცია აქვთ? მე არ ვამბობ, რომ რაიმე გამართლება აქვს იმ ძალადობას, იმ საშინელებას, რაც ვნახეთ. სრულიად წარმოუდგენელი რამე და ვერავინ ამას წინასწარ ვერ გათვლიდა, ვერ წარმოიდგენდით, რომ ჟურნალისტებზე იქნებოდა ასეთი აგრესია. მე არ ვიცი, რითი უნდა ავხსნათ ეს. სხვა საქმეა, როდესაც მე ვლაპარაკობ ტელევიზიის რედაქციებზე ვგულისხმობ ყველაფერ იმას, რაც ბოლო დღეებში, აი ამ პერიოდში, ამ დღეებში მიტინგებზე ხდება, საშინელი აგრესია და სიძულვილი, სიმყრალე თუ შეიძლება ითქვას, ყველაფერი მანდ გაისმა ეკლესიის მიმართ", - აღნიშნავს დეკანოზი.