"ჟვანიამ გაგდებას, ფორმალურად საკუთარი ნებით წასვლა არჩია" - "ოცნებაში" ამტკიცებენ, რომ ჟვანიას წასვლა "ფეისბუქიდან" შეიტყვეს, მაგრამ ამის არავის სჯერა

დღეს თამარ ჟვანია ცესკო-ს თავმჯდომარის პოსტიდან გადადგა, რომელმაც სოციალურ ქსელში სპეციალური განცხადება გაავრცელა.

თამარ ჟვანია წერს: "მსურს საზოგადოებას ვაცნობო, რომ მივიღე გადაწყვეტილება - 2021 წლის 1 ივლისიდან აღარ გავაგრძელო ცესკოს თავმჯდმარის უფლებამოსილება, რაც მისცემს საშუალებას პოლიტიკურ მხარეებს განახლებული საარჩევნო კოდექსის საფუძველზე აირჩიონ ცესკო-ს თავმჯდომარე. იმის მიუხედავად, რომ კანონმდებლობით 2 წელი კიდევ შემეძლო გამეგრძელებინა ადმინისტრაციაში საქმიანობა, მიმაჩნია, რომ შარლ მიშელის დოკუმენტის საფუძველზე მიღებულმა საარჩევნო რეგულაციებმა ახალი რეალობა მოიტანა. შესაბამისად, ცესკოს თავმჯდომარის ახალი წესით არჩევა იქნება დამატებითი ხელშემწყობი ფაქტორი ფართო პოლიტიკური თანხმობისთვის. დარწმუნებული ვარ, რომ ჩემი გადაწყვეტილება გაზრდის კონსტრუქციული ურთიერთობის შესაძლებლობას პოლიტიკურ ძალებს შორის, რაც თავის მხრივ, წაადგება ადმინისტრაციას, მომავალ საარჩევნო პროცესს და მთლიანად ჩვენს ქვეყანას“. იხილეთ სრულად

თამარ ჟვანია პოსტს 8 წლის განმავლობაში იკავებდა და 2013 წლიდან მას ქვეყანაში 7 არჩევნები აქვს ჩატარებული.

ambebi.ge-ს მმართველ პარტიაში უთხრეს, რომ თამარ ჟვანიას გადაწყვეტილება მათაც სოციალური ქსელიდან შეიტყვეს და ეს "ოცნებასთან“ შეთანხმებული არ ყოფილა.

ალუდა ღუდუშაური, პარლამენტარი:

"ქალბატონი ჟვანია არის არჩეული თანამდებობის პირი და, შესაბამისად, ის სრულიად დამოუკიდებელია. ეს გადაწყვეტილება "ქართულ ოცნებასთან“ არ ჰქონია შეთანხმებული, მისი გადადგომა ჩვენთვისაც მოულოდნელი იყო, ეს ამბავი მის მიერ გამოქვეყნებული პოსტით შევიტყვეთ. ახალ კანდიდატს რაც ეხება, ამაში "ქართული ოცნება“ არ ვმონაწილეობთ, კონსტიტუციის თანახმად, ეს პრეზიდენტის პრეროგატივაა, შესაბამისად, ჩვენ ამაში არ და ვერც ჩავერევით“.

საპირისპიროს ფიქრობენ მთავარ ოპოზიციურ პარტიაში. როგორც ენმ-ს წევრი რომან გოცირიძე გვეუბნება, თამარ ჟვანიას მაინც გადააყენებდნენ და მან ფორმალურად საკუთარი ნებით წასვლა არჩია.

"რა თქმა უნდა, ეს "ქართული ოცნების“ გადაწყვეტილება იყო. ვინაიდან მის მიერ ჩატარებული ნებისმიერი არჩევნები ყოველთვის იქნებოდა ნდობადაკარგული, ამიტომ "ოცნებამ“ სამომავლოდ თავის ტკივილი აიცილეა. ეს ჟვანიასაც აწყობდა - გაგდებას, ფორმალურად საკუთარი ნებით წასვლა არჩია. რა თქმა უნდა, მას რაღაცას შეპირდებოდნენ, მაგალითად, თანამდებობას და სულ მალე ვნახავთ, რა პირობებით დაითანხმეს. მეორეც - მათ, რა თქმა უნდა, აწყობთ ცესკო-ს თავმჯდომარედ რომელიმე უცნობი, ოღონდ, მათთვის მორჩილი ადამიანის დანიშნვა, ისეთი ადამიანის, რომელსაც არ აქვს ძველი ცოდვები და რომელსაც ახალი ცოდვებს ჩაადენინებენ. ამიტომაა ახლა საჭირო სიფრთხილე და ოპოზიციის, მათ შორის, ჩვენი საერთაშორისო პარტნიორების, არასამთავრობო სექტორის მაქსიმალური მობილიზება, რათა ისეთი კანდიდატი შეირჩეს, რომელიც არ იქნება ხელისუფლების მარიონეტი. ახალი კანონი, რომელიც მივიღეთ, ერთი შეხედვით ითვალისწინებს ძალიან მაღალ კვორუმს პარლამენტში, მაგრამ თუ ერთხელ ჩავარდა კანდიდატურა, მმართველ პარტიას იგივეს წამოყენება მეორედ შეუძლია, მესამედაც და ბოლოს გადის მარტივ უმრავლესობამდე. პროცედურულად დიდად არაფერი შეცვლილა, თუმცა პოლიტიკურად შეიცვალა, რადგან ერთხელ როდესაც ჩავარდება და ოპოზიცია მხარს არ დაუჭერს მათ კანდიდატურას, მეორედ და მესამედაც თუ ჯიუტად გინდა ამ ადამიანის გათრევა, ე.ი. რაღაც შავ-ბნელი იდეები გაწუხებს. დღევანდელი პროცედურა, რა თქმა უნდა, სჯობს ძველს და ეს პროცედურა უნდა იყოს მაქსიმალურად გამოყენებული, რომ არ მივიღოთ თამარ ჟვანია - 2. ეს, რა თქმა უნდა, ჩვენი უცხოელი პარტნიორებისთვისაც იყო კოჭის გაგორება. მიშელის შეთანხმებამ განაპირობა სწორედ ის, რომ ჟვანია გადააყენეს. მას მაინც მოუწევდა წასვლა, ყველა ვარიანტში.“

როგორც პარტია "საქართველოსთვის“ წევრი, დეპუტატი გიორგი ხოჯევანიშვილი ამბობს, იმ საკითხების გადასაფარად, რაც დღეს სასამართლო სისტემაში მიმდინარეობს, "ქართულმა ოცნებამ", სავარაუდოდ, იძულების ფორმით გადააყენა თამარ ჟვანია და ამით ცდილობენ სახის შენარჩუნებას.

"ცოტა ხნის წინ, ჩვენი გუნდის ლიდერი საუბრობდა, რომ "ქართულმა ოცნებამ" ვერ შეძლო არჩევნების შედეგების შენარჩუნება. ამის მიზეზი არის სახელმწიფო ინსტიტუტებისადმი ძალიან დაბალი ნდობის დონე, შესაბამისად, იმის გამო, რომ მომხდარიყო გარკვეულწილად რეაბილიტაცია და იმ საკითხების გადასაფარად, რაც დღეს სასამართლო სისტემაში მიმდინარეობს, "ქართულმა ოცნებამ" სავარაუდოდ, იძულების ფორმით გადააყენა თამარ ჟვანია და ამით ცდილობენ სახის შენარჩუნება", - განაცხადა ხოჯევანიშვილმა.

როგორც პოლიტოლოგი გია ხუხაშვილი ამბობს, მთავარია, სისტემური ცვლილებები საარჩევნო პროცესში , ჟვანიას თანამდებობიდან გათავისუფლება კი პრობლემას ვერ გადაწყვეტს.

"არა მგონია, რომ ეს ამდენად მნიშვნელოვანი ფაქტი იყოს. მე არც ადრე მქონია იმის ილუზია, რომ თამარ ჟვანია იყო რაღაცაში დამნაშავე და ახლა იბერია გაბრწყინდება. ის თუ რამეს აშავებდა, იმიტომ კი არა, რომ ბოროტი იყო და ეს თვითონ უნდოდა, არამედ იმიტომ, ასეთ დავალებებს იღებდა. თამარ ჟვანიასნაირ შემსრულებელს ესენი ათასს იპოვიან, მთავარია, სისტემური ცვლილებების მოხდენა. ჟვანიას, ან ნებისმიერი სხვა ადამიანის თანამდებობიდან გათავისუფლება თავისთავად რომ წყვეტდეს პრობლემას, მაშინ რაღა გვიჭირდა. დამოუკიდებლად ასეთ გადაწყვეტილებას არავინ იღებს, ეს არის პოლიტიკური ტაქტიკის საკითხი, მეტი არაფერი. ამათ უნდათ ილუზიის შექმნა, რომ ვითომ არჩევნებს ჩაატარებენ. ეს არც არაფერს შეცვლის. ჩვენ თამარ ჟვანია -1, 2, 3 და 15 კი არა, სისტემური ცვლილებები გვჭირდება, რომ პროცესი იყოს კონკურენტული, გამჭვირვალე და სამართლიანი, ისეთი, რომ ძალიან ბოროტი ადამიანიც რომ დანიშნო, იმანაც ვერ შეძლოს საქმის გაფუჭება. ოპოზიციამ უნდა მიაღწიოს იმას, რომ სისტემური ცვლილებები მოხდეს საარჩევნო პროცესში“.

პოლიტოლოგ ვახტანგ ძაბირაძის შეფასებით, ერთ-ერთი არგუმენტი, რომლითაც ოპოზიციას შეუძლია ილაპარაკოს არჩევნების კანონიერებაზე და სამართლიანობაზე, ანუ ჟვანიას ფაქტორი, რომელიც უკვე მოთელილია, აღარ არსებობს, ამიტომ მათ ახალი არგუმენტის მოძებნა დასჭირდებათ.

"ვფიქრობ, ეს ერთობლივი გადაწყვეტილება იყო. რა თქმა უნდა, "ოცნებაში“ შეთანხმდა ეს საკითხი და ერთობლივი გადაწყვეტილება მიიღეს. მე თუ მკითხავს კაცი, ეს სწორი გადაწყვეტილებაა იმიტომ, რომ მიუხედავად იმისა, რამდენ პროცენტს აიღებდა "ქართული ოცნება“, ჟვანიას ფაქტორი გუნდისთვის (და თავად ჟვანიასთვისაც) ყველა ვარიანტში წამგებიანი იყო. დავუშვათ, თუ "ქართული ოცნება“ აიღებდა 43%-ზე ნაკლებს, ოპოზიცია იტყოდა, რომ მათ ჟვანიამაც ვერ უშველა, თუ 43%-ს გადაცილდებოდა, იმას იტყოდნენ, ჟვანია გამყალბებელია და ისევ გააყალბაო. ასე რომ, რაღაც მესამე კრიტერიუმი ამ შემთხვევაში არ იარსებებდა. ერთ-ერთი არგუმენტი, რომლითაც ოპოზიციას შეუძლია ილაპარაკოს არჩევნების კანონიერებაზე და სამართლიანობაზე - გაყალბდა, თუ არა, ანუ ჟვანიას ფაქტორი მოიხსნა.

ეს იმას არ ნიშნავს, რომ "ოცნება“ არ შეეცდება არჩევნების გაყალბებას, ან ოპოზიცია პირველივე შედეგებს უსიტყვოდ აღიარებს, მაგრამ ფაქტორი, რომელიც უკვე მოთელილია, აღარ არსებობს, ასე რომ, მათ ახალი არგუმენტის მოძებნა დასჭირდებათ.

ოპოზიციის წამყვანი პარტია არის "ნაციონალური მოძრაობა", რომელმაც, ზოგადად მის წარმომავლობას და გენეზისს თუ გადავხედავთ, 1995 წლიდან მოყოლებული 2012 წლამდე, ყველა არჩევნები გააყალბა ხან "მოქკავშირის", ხანაც - "ნაცმოს" სახელით. ამით იმის თქმა მინდა, რომ დღეს ოპოზიციაში არიან ადამიანები, მათ შორის ზოგი ყოფილი ცესკოს თავმჯდომარეცაა, რომლებმაც მშვენივრად იციან, რა მექანიზმები აქვს ცესკო-ს თავმჯდომარეს.

აქედან უნდა დაიწყოს ლაპარაკი არჩევნების გაყალბებაზეც და იმაზეც, რომელი პიროვნება რას წარმოადგენს, ან რა დოზით შეუძლია რეაგირება მოახდინოს და არჩევნები არ გააყალბოს. ეს არის პირველ რიგში გასარკვევი ოპოზიციის მხრიდან. ბოლოს და ბოლოს, მათ დანერგეს საქართველოში არჩევნების გაყალბება, ყველა ნიუანსი იციან - სომხურიც, კარუსელიც და ა.შ. ამიტომ დადგნენ და თქვან, როცა ვირჩევთ ცესკო-ს თავმჯდომარეს, რა მექანიზმები აქვს მას, რომ ზეგავლენა მოახდინოს არჩევნების წესიერად ჩატარებაზე. თუ აქვს ეს მექანიზმები, ჩამოთვალონ ისინი იმიტომ, რომ მე რასაც ვუყურებ ამ 30 წლის განმავლობაში, ცესკო-ზე და მის თავმჯდომარეზე მეტად, უბნის თავმჯდომარეს შეუძლია გააყალბოს არჩევნები. კიდევ მუშაობს სხვა მექანიზმებიც, რომლებიც ცესკო-ს არ ეხება და ესეც მშვენივრად უნდა იცოდნენ".