"გირჩის" სამეფოს მეფე მართლაც მეფეა - გარკვეული თამაშია, ახალ რაღაცას ვქმნით - ვახტანგ მეგრელიშვილი
სათათბიროში ჩვენთვის ძალიან ღირებული ადამიანები არიან, მეფე მართლაც მეფეა, მის გადაწყვეტილებებზე ვიყავით ყველანი დამოკიდებულები, რასაც შიგნით ვაკეთებთ გარე დამკვირვებლისთვის საინტერესო ხდება, - ამის შესახებ პარტია "გირჩის“ ერთ-ერთმა ლიდერმა ვახტანგ მეგრელიშვილმა "პალიტრანიუსის“ ეთერში, გადაცემა "360 გრადუსში“ განაცხადა.
როგორც ვახტანგ მეგრელიშვილი აღნიშნავს, პარტიას წინასაარჩევნოდ ინოვაციური კამპანია ექნება, რაც "ცოტა ექსტრავაგანტურად გამოიყურება“.
"გვჯერა, რომ ძალიან ინოვაციური კამპანია გვექნება, თავისი შინაარსით უკვე ინოვაციურია თუნდაც იმით, რაც დღეს გამოვაცხადეთ. მეფის მარჯვენა ხელი, თავკაცი ოთო ზაკალაშვილი პარტიის ახალი წესრიგით არის არჩეული, ისეთი კადრია, რომელსაც ნებისმიერი პარტია იოცნებებდა, რომ ჰყოლოდა. მიუხედავად იმისა, რომ ეს ყველაფერი თავისი ფორმით ცოტა ექსტრავაგანტურად გამოიყურება, შინაარსით არის დატვირთული. ამ შინაარსს აძლევენ ის ადამიანები, რომლებიც ჩვენთან ერთად საქმიანობენ. იცით, სამეფოს სათათბირო აქვს, სათათბიროში ჩვენთვის ძალიან ღირებული ადამიანები არიან ამ დედამიწის სხვადასხვა კონტინენტიდან. ჩვენ ასეთი წესრიგი გვაქვს, შესაბამისად, მეფე მართლაც მეფეა, მის გადაწყვეტილებებზე ვიყავით ყველანი დამოკიდებულები რაღაც კრიზისის დროს, რომელიც ჩვენ თავს გადაგხვდა. ჩვენი შეფასება არ არის ეპატაჟური გარე სამყაროსთვის, შიგნით ასე ვიქცევით. ის რასაც შიგნით ვაკეთებთ გარე დამკვირვებლისთვის საინტერესო ხდება. ეს ფორმები იმიტომ მოვიფიქრეთ, რომ გარკვეული თამაშია, მთელი საზოგადოება ახალ რაღაცას ვქმნით, სხვა ჯგუფისგან განსხვავებით, ჩვენ იდეა გვაქვს“, - აღნიშნავს მეგრელიშვილი.